ରୂପସାରେ ରାଷ୍ଟ୍ରୀୟ ନବବର୍ଷ ପାଳିତ ,
ଯଜ୍ଞ, ଭଜନ, ବୃକ୍ଷରୋପଣ ଓ ଦୀପ ଦାନରେ ନବବର୍ଷକୁ ସ୍ବାଗତ
ବସ୍ତା,10/4 ଚୈତ୍ର ଶୁକ୍ଳ ପ୍ରତିପଦା ଅବସରରେ ରୂପସା ଥାନା ଅନ୍ତର୍ଗତ ଦୟାନନ୍ଦ ଗୁରୁକୁଳ ଶିକ୍ଷାଶ୍ରମ, ଅଗ୍ନିହୋତ୍ର ପରିବାର ଓ ଷ୍ଟାର କ୍ଲବ ଆନୁକୂଲ୍ୟରେ ପୋଡାଡିହାସ୍ଥିତ ଆମ ଗାଁ ନର୍ସରୀ ପରିସରରେ ମଙ୍ଗଳବାର ରାଷ୍ଟ୍ରୀୟ ନବବର୍ଷ ପାଳିତ ମହାସମାରୋହରେ ହୋଇଯାଇଛି l 
ଶିକ୍ଷାଶ୍ରମର ପ୍ରତିଷ୍ଠାତା ସୁରେଶ ଚନ୍ଦ୍ର ପାଣି ଙ୍କ ପୌରାହିତ୍ୟରେ ବିଶ୍ୱକଲ୍ୟାଣ ଯଜ୍ଞ, ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା l ମୁଖ୍ୟ ଅତିଥି ନୀଳମଣି ମହାବିଦ୍ୟାଳୟର ଅଧ୍ୟକ୍ଷ ଡ଼. ତପନ କୁମାର ବେହେରା, ମୁଖ୍ୟ ବକ୍ତା ରୂପସା ଥାନାଧିକାରୀ ସଚ୍ଚିଦାନନ୍ଦ ଗିରି ଯୋଗ ଦେଇ ଚୈତ୍ର ଶୁକ୍ଳ ପ୍ରତିପଦାରେ ପ୍ରଭୁ ଶ୍ରୀରାମଚନ୍ଦ୍ର ଓ ଯୁଧିଷ୍ଠିରଙ୍କ ରାଜ୍ୟାଭିଷେକ, ମହର୍ଷି ଦୟାନନ୍ଦ ସରସ୍ବତୀଙ୍କ ଦ୍ୱାରା ଆର୍ଯ୍ୟ ସମାଜ ପ୍ରତିଷ୍ଠା ଲାଭ କରିଥିବାରୁ ଏହି ଦିନଟି ଅତ୍ୟନ୍ତ ଗୁରୁତ୍ୱପୂର୍ଣ୍ଣ l ଏହି ଦିବସରେ ରାଷ୍ଟ୍ରୀୟ ନବବର୍ଷ ପାଳନ ଦ୍ୱାରା ସମଗ୍ର ଦେଶ ଓ ଦେଶବାସୀଙ୍କ ମର୍ଯ୍ୟାଦା ଅକ୍ଷୁର୍ଣ୍ଣ ରହିଥାଏ ବୋଲି ବକ୍ତବ୍ୟରେ କହିଥିଲେ l ସମ୍ମାନିତ ଅତିଥି ଅଧ୍ୟାପକ ରବୀନ୍ଦ୍ର କୁମାର ପଣ୍ଡା ଓ ଗୌରାଙ୍ଗ ପଣ୍ଡା, ପୂର୍ବତନ ପ୍ରଧାନ ଶିକ୍ଷକ ପର୍ଶୁରାମ ବେହେରା ଓ ଅନନ୍ତ କୁମାର ସାହୁ, ମହୋତ୍ସବ କମିଟି ଉପଦେଷ୍ଟା ଜଗଦୀଶ ପଟ୍ଟନାୟକ, ପୂର୍ବତନ ଟେଲିସେବା ଅଧିକାରୀ ସୁଧାକର ଗିରି, ସମାଜସେବୀ ତପନ କୁମାର ଗିରି ପ୍ରମୁଖ ଯୋଗ ଦେଇ ରାଷ୍ଟ୍ରୀୟ ନବବର୍ଷ ପାଳନ ସମ୍ପର୍କରେ ଆଲୋକପାତ କରିଥିଲେ l ଅଗ୍ନିହୋତ୍ର ପରିବାରର ଆବାହକ ବାଞ୍ଛାନିଧି ଦେ ମଞ୍ଚ ସଂଯୋଜନା କରିଥିଲେ l ଏହି ଅବସରରେ ଅତିଥିମାନଙ୍କ ଦ୍ୱାରା 108 ଘିଅ ଦୀପ ପ୍ରଜ୍ବଳନ କରାଯାଇ ବିଶ୍ୱବାସୀଙ୍କ କଲ୍ୟାଣ କାମନା କରାଯାଇଥିଲା l ସନ୍ଧ୍ୟାରେ ସଂଗୀତଗୁରୁ ଅର୍ଜୁନ କୁମାର ଦଳାଇଙ୍କ ତତ୍ତ୍ୱାବଧାନରେ କଣ୍ଠଶିଳ୍ପୀ ଦୀପ୍ତରାଗ, ଅର୍ଚ୍ଚିସ୍ମିତା ଓ ରୁଚିସ୍ମିତାଙ୍କ ଦ୍ୱାରା ବୈଦିକ, ଆଧ୍ୟାତ୍ମିକ ଭଜନ ପରିବେଷଣ ହୋଇଥିଲା l ଷ୍ଟାର କ୍ଲବ ସଭାପତି ବିଜୟ କୁମାର ବେହେରା ଧନ୍ୟବାଦ ଅର୍ପଣ କରିଥିଲେ l କାର୍ଯ୍ୟକର୍ତ୍ତା ଚନ୍ଦନ ଜେନା, ଦୀପକ ସାମଲ, ଅର୍ଚ୍ଚନା ବେହେରା,ଝିଲ୍ଲୀ ବେହେରା,ଶଶିକାନ୍ତ ବେହେରା, ପ୍ରତାପ ବେହେରା, ଶ୍ରୀଧର ବୁଗୁଡ଼ି ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ l
ବସ୍ତା ରୁ ଜଗତ କୁମାର ଗିରି ଙ୍କ ରିପୋର୍ଟ୍
