ପଞ୍ଚତତ୍ତ୍ବରେ ଲୀନ ହେଲେ ଯାତ୍ରା ଜଗତର ମହାନ କଳାକାର
ଖଇରା, ୦୩/୫/୨୪- ବାଲେଶ୍ଵର ଜିଲ୍ଲା ଖଇରା ବ୍ଲକ ଖଇରା ପଞ୍ଚାୟତ ଅନ୍ତର୍ଗତ ବଣପାରିଆ ଗ୍ରାମର ସୁରେନ୍ଦ୍ର ଦାସ ପିତା କୃଷ୍ଣ ପ୍ରସାଦ ଦାସଙ୍କ ଘର । ଯାତ୍ରା ଜଗତରେ ସେ ଜଣେ ମହାନ କଳାକାର ଥିଲେ । ଦୀର୍ଘ ପ୍ରାୟ ୩୦ ବର୍ଷରୁ ଉର୍ଦ୍ଧ୍ବ ହେବ ବିଭିନ୍ନ ଅପେରା ପାର୍ଟିରେ ଅଭିନୟ କରି ଦର୍ଶକ ମାନଙ୍କର ପ୍ରିୟପାତ୍ର ହୋଇଥିଲେ । କିନ୍ତୁ ସମୟ ତାଙ୍କ ପାଇଁ କାଳ ହେଲା । ଘୋଟିଲା ଅକାଳ ରୋଗ । ବହୁ ଚିକିତ୍ସା ପରେ ମଧ୍ୟ ରୋଗରୁ ନିସ୍ତାର ପାଇଲେ ନାହିଁ । ଚିକିତ୍ସା ନିମନ୍ତେ ପରିବାର ଲୋକେ ବହୁ ଅର୍ଥ ମଧ୍ୟ ଖର୍ଚ୍ଚ କରିଛନ୍ତି । କୌଣସି ଚିକିତ୍ସା କାମ ନ ଦେବାରୁ ଦୀର୍ଘ ୬ ମାସରୁ ଉର୍ଦ୍ଧ୍ବ ହେବ ଘରେ ପଡି ରହିଥିଲେ । ଆଜି ତା ୦୩/୫/୨୦୨୪ ରିଖ ଶୁକ୍ରବାର ସକାଳେ ନିଜ ବାସଭବନରେ ତାଙ୍କର ମୃତ୍ୟୁ ହୋଇଯାଇଛି । ଏ ଖବର ପ୍ରଚାରିତ ହେବା ପରେ ବହୁ ଲୋକ ବଣପାରିଆ ସ୍ଥିତ ବାସ ଭବନରେ ପହଞ୍ଚି ଶେଷ ଦର୍ଶନ କରିଥିଲେ । ଯାତ୍ରା ଜଗତ ଜଣେ ମହାନ କଳାକାରଙ୍କୁ ହରାଇଲା ବୋଲି ଦେଖଣାହାରୀ ମାନେ ପ୍ରକାଶ କରିଛନ୍ତି । ସ୍ବର୍ଗତ ଦାସ ଜଣେ ଅତି ସରଳ, ନିରୀହ, ମିଷ୍ଟଭାଷୀ, ଉଦାର ହୃଦୟେଷୁ, ସଚ୍ଚୋଟ, ନିଷ୍କପଟ ଓ ଧାର୍ମିକ ପରାୟଣ ବ୍ଯକ୍ତି ଥିଲେ । ସମସ୍ତଙ୍କ ସହିତ ତାଙ୍କର ଉତ୍ତମ ସମ୍ପର୍କ ଥିଲା । କାହାରିକୁ କେବେ ସମ୍ମାନ ପ୍ରଦାନରେ ଅବହେଳା କରୁନଥିଲେ । ମୃତ୍ୟୁ ବେଳକୁ ତାଙ୍କର ବୟସ ୭୩ ବର୍ଷ ହୋଇଥିଲା । ବିଧବା ପତ୍ନୀ ସମେତ ତାଙ୍କର ୨ ପୁଅ ଓ ୧ ଝିଅ ଅଛନ୍ତି । ବେସାହାରା ଅଭାବୀ ପରିବାର ପ୍ରତି ଦୃଷ୍ଟି ଦେବାକୁ ସମାଜସେବୀ, ସରକାର ଓ ରାଜନେତାଙ୍କୁ ନିବେଦନ କରିଛନ୍ତି ଗ୍ରାମବାସୀ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
