ଆମ୍ବ ବନ୍ଧ ମରାମତି ନେଇ ଅଭିଯୋଗ କଲେ ସରପଞ୍ଚ
ଖଇରା,୨୪/୮/୨୪- ବାଲେଶ୍ଵର ଜିଲ୍ଲା ଖଇରା ବ୍ଲକ ନନ୍ଦୁର ପଞ୍ଚାୟତରେ ଥିବା ଆମ୍ବ ବନ୍ଧଟି ପ୍ରାୟ ୩୦ ବର୍ଷ ପୂର୍ବେ ନିର୍ମାଣ ହୋଇଥିଲା । ଏହା ସୋର ଇରିଗେସନ୍ ସେକସନ୍ ଅଧିନ ଅଟେ । ଦୀର୍ଘ ହେବ ବନ୍ଧର ରକ୍ଷଣାବେକ୍ଷଣ ଓ ମରାମତି ଅଭାବରୁ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ନିର୍ମାଣ ହୋଇଥିବା କଂକ୍ରିଟ୍ ଷ୍ଟକଚର ଫାଟିଯିବା ଓ ଦୁଇ ପାର୍ଶ୍ଵ ଅତଡା ଖାଇଯିବା ଫଳରେ ଚାଷ ଜମିକୁ ଆଦୌ ପାଣି ଯାଉ ନାହିଁ । ଫଳରେ ଏହା ଉପରେ ନିର୍ଭର କରୁଥିବା ପ୍ରାୟ ୧୫ଟି ରାଜସ୍ୱ ଗ୍ରାମର ଚାଷୀମାନେ ପାଣି ପାଇଁ ଡ଼ହଳବିକଳ ହେଉଛନ୍ତି । ଯଦି ବନ୍ଧଟିକୁ ରକ୍ଷଣାବେକ୍ଷଣ ବା ମରାମତି କରାନଯାଏ ଚାଷୀମାନେ ମରୁଡ଼ିର ସମ୍ମୁଖୀନ ହେବେ,ଏଥିରେ ସନ୍ଦେହ ନାହିଁ । ଚାଷ ଉପରେ ନିର୍ଭର କରୁଥିବା ସେମାନଙ୍କ ପରିବାର ଅନ୍ଧାର ଭିତରକୁ ଠେଲି ହୋଇଯିବେ । ବନ୍ଧର ମରାମତି ସଙ୍ଗେ ସଙ୍ଗେ ଚାଷ ଜମିକୁ ପାଣି ଯିବାର ସୁବ୍ଯବସ୍ଥା କରିବା ନିମନ୍ତେ ନନ୍ଦୁର ସରପଞ୍ଚ ଜୟନ୍ତୀ ପତି ବାଲେଶ୍ଵର ଇରିଗେସନ୍ ଡିଭିଜନର ସୁପରିଟେଣ୍ଡେଣ୍ଟଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
