ଝରୀଗାଁ ନିର୍ବାଚନ ମଣ୍ଡଳୀରୁ ସରକାରୀ ବସ ଚଳାଚଳ ଓ +୩ବିଜ୍ଞାନ କଲେଜ ପାଇଁ ବିଧାୟକଙ୍କ ଦାବୀ
ନବରଙ୍ଗପୁର:(ତା ୨୪/୦୮)(ରବି ନାରାୟଣ ମହାନ୍ତି)ବିଧାୟକ ନରସିଂହ ଭତରା ଓଡିଶା ସଡ଼କ ଓ ପରିବହନ ମନ୍ତ୍ରୀ ବିଭୁତି ଭୂଷଣ ଜେନାଙ୍କୁ ସାକ୍ଷାତ କରି ଝରୀଗାଁ ନିର୍ବାଚନ ମଣ୍ଡଳୀର ୨ ପ୍ରମୁଖ ବ୍ଲକରୁ ସରକାରୀ ବସ ଚଳାଚଳ ପାଇଁ ଏକ ଦାବୀପତ୍ର ପ୍ରଦାନ କରିଛନ୍ତି |ଉକ୍ତ ଦାବୀପତ୍ରରେ ସେ ଉଲ୍ଲେଖ କରିଛନ୍ତି କି ନବରଙ୍ଗପୁର ଜିଲ୍ଲାର ଝରୀଗାଁ ନିର୍ବାଚନ ମଣ୍ଡଳୀ ଅଞ୍ଚଳ ଓଡିଶାର ଶେଷ ସୀମାରେ ଓ ଛତିଶଗଡର ସୀମାନ୍ତରେ ଅବସ୍ଥିତ |ପରିବହନ ଓ ଯୋଗାଯୋଗ ଦୃଷ୍ଟିକୋଣରୁ ଝରୀଗାଁ ନିର୍ବାଚନ ମଣ୍ଡଳୀ ସବୁଠୁ ପଛରେ ରହିଛି |ସ୍ୱାଧୀନତାର ଦୀର୍ଘ ବର୍ଷ ପରେ ମଧ୍ୟ ଏହି ଅଞ୍ଚଳରୁ ଗୋଟିଏ ହେଲେ ସରକାରୀ ବସ ରାଜ୍ୟ ରାଜଧାନୀକୁ ଚଳାଚଳ କରୁନାହିଁ |ସେହିପରି ଅଞ୍ଚଳର ସାଧାରଣ ଅଧିବାସୀ ଓ ପଡୋଶୀ ରାଜ୍ୟ ଛତିଶଗଡ ସହ ରୋଟି ବେଟିର ସମ୍ପର୍କ ତେଣୁ ଛତିଶଗଡ ଅଞ୍ଚଳକୁ ମଧ୍ୟ ବସ ଚଳାଚଳ ଜରୁରୀ ହୋଇପଡିଛି |ତେଣୁ ଝରୀଗାଁ ନିର୍ବାଚନ ମଣ୍ଡଳୀରୁ ୭ଗୋଟି ରାସ୍ତା (୧-ଝରୀଗାଁ ଠାରୁ ପୁରୀ, ଭାୟା ଚନ୍ଦାହାଣ୍ଡି, ଭୁବନେଶ୍ୱର, ୨-ଝରୀଗାଁ ଠାରୁ ରାୟପୁର ଭାୟା ଚନ୍ଦାହାଣ୍ଡି, ଉରମାଳ, ୩-ଝରୀଗାଁ ଠାରୁ ବ୍ରହ୍ମପୁର ଭାୟା ଚନ୍ଦାହାଣ୍ଡି ଭବାନୀପାଟଣା, ଭଞ୍ଜନଗର, ୪-ଝରୀଗାଁ ଠାରୁ ସମ୍ବଲପୁର ଭାୟା ଚନ୍ଦାହାଣ୍ଡି, ରାଜା ଖଡ଼ିଆର ୫-ଚନ୍ଦାହାଣ୍ଡି ଠାରୁ ବିଶାଖାପାଟଣା ଭାୟା ଝରୀଗାଁ, ଉମରକୋଟ ୬-ଚନ୍ଦାହାଣ୍ଡି ଠାରୁ ଭବାନୀପାଟଣା ଭାୟା ଉରମାଳ, ଦେଓଭୋଗ ୭-ଚନ୍ଦାହାଣ୍ଡି ଠାରୁ ଜଗଦଳପୁର ଭାୟା ଉମରକୋଟ, ଶିଙ୍ଗଶାରୀ )ଦେଇ ସରକାରୀ ବସ ଯାତାୟାତ କରିବା ପାଇଁ ଅନୁମତି ଦେଲେ ଅଞ୍ଚଳର ପରିବହନ ବ୍ୟବସ୍ଥା ସୁଦୃଢ ହୋଇପାରନ୍ତା ବୋଲି ବିଧାୟକ ଦାବୀପତ୍ରରେ ଉଲ୍ଲେଖ କରିଛନ୍ତି |ତତ ସହିତ ଝରୀଗାଁ ନିର୍ବାଚନ ମଣ୍ଡଳୀରେ ଗୋଟିଏ ହେଲେ +୩ ବିଜ୍ଞାନ କଲେଜ ନଥିବା ହେତୁ ଅଧିକାଂଶ ଛାତ୍ରଛାତ୍ରୀ +୨ (ବିଜ୍ଞାନ) ପରୀକ୍ଷା ଉତୀର୍ଣ୍ଣ କରିବା ପରେ +୩(ବିଜ୍ଞାନ )ପଢିବାରୁ ବଞ୍ଚିତ ରହୁଛନ୍ତି |ଝରୀଗାଁ ଅଞ୍ଚଳର ଅତି କମ ସଂଖ୍ୟକ ଛାତ୍ରଛାତ୍ରୀ (ଯେଉଁ ମାନଙ୍କ ଆର୍ଥିକ ସ୍ଥିତି ସ୍ୱଚ୍ଛଳ )ସୁଦୂର ନବରଙ୍ଗପୁର, ଜୟପୁର, କଳାହାଣ୍ଡି କୁ ଯାଇ +୩(ବିଜ୍ଞାନ ) ଶିକ୍ଷା ଗ୍ରହଣ କରୁଛନ୍ତି |ତେଣୁ ଚନ୍ଦାହାଣ୍ଡି ଠାରେ ଏକ +୩(ବିଜ୍ଞାନ )କଲେଜ ଖୋଲିବା ନେଇ ରାଜ୍ୟର ଉଚ୍ଚ ଶିକ୍ଷାମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ ସାକ୍ଷାତ କରି ଏକ ଦାବିପତ୍ର ପ୍ରଦାନ କରିଛନ୍ତି |
ମସିହା ନିଯୁଜ୍ ସର୍ଭିସ୍
