ଦୁଃଖ ଦେଇଗଲା ବାତ୍ୟା ” ଦାନା ”
ବାଲେଶ୍ଵର,୨୭/୧୦/୨୪- ବାତ୍ୟା ” ଦାନା ” ଅପସରି ଯାଇଛି ସତ ହେଲେ ଦେଇଯାଇଛି ଅନେକ ଦୁଃଖ । ବାତ୍ୟା ସାଙ୍ଗକୁ ବର୍ଷା ଲୋକ ମାନଙ୍କୁ ଅଥୟ କରିଥିଲା । ଲୋକ ମାନଙ୍କ ମନରେ ଭୟ ଥିଲା ଅନେକ । ହେଲେ ବାଲେଶ୍ଵର ଜିଲ୍ଲାରେ ସେଭଳି କିଛି ବଡ଼ ଧରଣର କ୍ଷତି ହୋଇ ନଥିଲେ ମଧ୍ୟ ଅନେକ ଗଛ ଉପୁଡି ପଡି ଘର ନଷ୍ଟ କରିବା ସହିତ ରାସ୍ତା ଅବରୋଧ ହୋଇଥିଲା । ପ୍ରବଳ ବାତ୍ଯା ସତ୍ତ୍ୱେ ମଧ୍ୟ ଦମକଳ ବାହିନୀ, ବିଦ୍ଯୁତ୍ ବାହିନୀ, ଓଡ୍ରାଫ ଟିମ୍ ଉଧାର କାର୍ଯ୍ୟରେ ନିୟୋଜିତ ଥିଲେ । ସ୍ଥାନୀୟ ପ୍ରଶାସନ ପକ୍ଷରୁ ଲୋକ ମାନଙ୍କ ନିରାପଦ ନିମନ୍ତେ ସମସ୍ତ ପ୍ରକାର ବ୍ଯବସ୍ଥା କରାଯାଇଥିଲା । ଯେମିତି କୌଣସି ଲୋକ କ୍ଷତିଗ୍ରସ୍ତ ନ ହୁଅନ୍ତି ସେଥିପାଇଁ ସ୍ଥାନୀୟ ପ୍ରଶାସନ ତୀକ୍ଷ୍ଣ ନଜର ରଖିଥିଲା । ବାତ୍ୟା ଅନେକ ଗଛ ଓ ବିଦ୍ଯୁତ୍ ଖୁଣ୍ଟ ଉପୁଡି ପଡିଥିଲା । ବର୍ତ୍ତମାନ ସୁଦ୍ଧା ମରାମତି କାର୍ଯ୍ୟ ପ୍ରତ୍ୟେକ ଅଞ୍ଚଳରେ ଜାରି ରହିଛି । ପ୍ରତି ବିଭାଗର ଉଦ୍ୟମ ପ୍ରଚେଷ୍ଟାକୁ ସାଧାରଣରେ ମଧ୍ୟ ପ୍ରଶଂସା କରାଯାଇଛି । ତହସିଲ ପକ୍ଷରୁ ପ୍ରତି ଆର ଆଇ ମାନଙ୍କୁ ନିର୍ଦ୍ଦେଶ ହୋଇଛି ପ୍ରତ୍ୟେକ ଗ୍ରାମକୁ ଯାଇ କ୍ଷୟକ୍ଷତି ଆକଳନ ପାଇଁ । ଆର ଆଇ ମଧ୍ୟ ପ୍ରତ୍ୟେକ ଗ୍ରାମକୁ ଯାଇ କ୍ଷୟକ୍ଷତିର ଆକଳନ ଜାରି ରହିଛି । ଖଇରା ବ୍ଲକ ତାଳମହୁରୀ ଗ୍ରାମର ଗଦାଧର ବେହେରା, ରମେଶ ବେହେରା, ଭାସ୍କର ବେହେରା, ଲୋଚନ ବେହେରା, ମହେନ୍ଦ୍ର ବେହେରା, ଅକ୍ଷୟ ବେହେରା, ବିଜୟ ବେହେରା ଓ କୁମୁଦ ରଞ୍ଜନ ବେହେରାଙ୍କ ଘର ବାତ୍ୟାରେ ନଷ୍ଟ ହୋଇଥିବା ଖବର ଖଇରା ଆର ଆଇ ଏବଂ ତାଙ୍କ ଷ୍ଟାଫ୍ ସର୍ଜମିନ୍ କରିଛନ୍ତି । ଏଥି ସହିତ ଜିଲ୍ଲାର ବିଭିନ୍ନ ଗ୍ରାମକୁ ଆର ଆଇ ଏବଂ ତାଙ୍କ ଷ୍ଟାଫ୍ ଭ୍ରମଣ କରି କେଉଁଠି କାହାର କି ପ୍ରକାର କ୍ଷତି ହୋଇଛି ତନ୍ନ ତନ୍ନ କରି ତଦନ୍ତ କରୁଛନ୍ତି । ବିଦ୍ଯୁତ୍ କର୍ମଚାରୀ ମାନେ ଅକ୍ଳାନ୍ତ ପରିଶ୍ରମ କରି ଯୁଦ୍ଧକାଳୀନ ଭିତ୍ତିରେ ଲୋକ ମାନଙ୍କୁ ବିଦ୍ଯୁତ୍ ଯୋଗାଇ ଦେବାରେ ସକ୍ଷମ ହୋଇଛନ୍ତି । ବର୍ଷା ଜଳରେ ଅନେକ ଚାଷଜମି ଜଳମଗ୍ନ ଥିଲା ବର୍ତ୍ତମାନ ପାଣି ପ୍ରାୟ ସୁଖିଗଲାଣି । ତଥାପି ଚାଷଜମି ନଷ୍ଟକୁ ଏଡାଇ ହେବନାହିଁ । ବିଳମ୍ବରେ ପାଣି ବିଳମ୍ବ ଚାଷକୁ ବାତ୍ୟା ” ଦାନା ” ଅନେକ ଲୋକଙ୍କୁ ଦେଇଛି ଦୁଃଖ । ଲୋକମାନେ କେତେ ଆଶା ନେଇ ଚାଷ କରିଥିଲେ ଵର୍ଷକ ପାଇଁ ଦାନା ମୁଠେ ସଂଗ୍ରହ କରିବା ପାଇଁ ହେଲେ ବାତ୍ୟା ” ଦାନା ” ଛଡ଼ାଇ ନେଇ ସେବବୁ । ଜିଲ୍ଲାର ଅନେକ ସ୍ଥାନରେ ତାଣ୍ଡବଲୀଳା ରଚିଛି ବାତ୍ୟା ” ଦାନା ” । ଅନେକ ଚାଷଜମି କରିଛି କ୍ଷତି ଯାହାକି ଲୋକ ମାନଙ୍କୁ ଅନେକ ବାଧିଛି । କଥାରେ କୁହନ୍ତି ” ଦୁଃଖ ଦେଇଗଲା ଦରଦୀ ବନ୍ଧୁ ” କିନ୍ତୁ ଜିଲ୍ଲାର ଅନେକ ସ୍ଥାନରେ ଅନେକ ଲୋକଙ୍କୁ ବାତ୍ୟା ” ଦାନା ” ଦେଇଛି ଦୁଃଖ । ସିମୁଳିଆ ନିର୍ବାଚନର ପୂର୍ବତନ ବିଧାୟକ ତଥା ମନ୍ତ୍ରୀ ଜ୍ଯୋତିପ୍ରକାଶ ପାଣିଗ୍ରାହୀ ଏବଂ ବର୍ତ୍ତମାନର ବିଧାୟକ ପଦ୍ମଲୋଚନ ପଣ୍ଡା କ୍ଷତିଗ୍ରସ୍ତ ଅଞ୍ଚଳ ବୁଲି ଦେଖୁଛନ୍ତି ଓ କ୍ଷତିଗ୍ରସ୍ତ ପରିବାରଙ୍କୁ ଭେଟି ସୁଖଦୁଃଖ ପଚାରି ବୁଝୁଛନ୍ତି । ସରକାର ମଧ୍ୟ କ୍ଷତିଗ୍ରସ୍ତ ଲୋକଙ୍କୁ ସହାୟତା ପ୍ରଦାନ କରିବେ ବୋଲି ଘୋଷଣା କରିଛନ୍ତି । କ୍ଷୟକ୍ଷତି ଆକଳନ ପରେ କି ପ୍ରକାର ସହାୟତା ପ୍ରଦାନ କରୁଛନ୍ତି ମୋହନ ସରକାର ସାଧାରଣରେ ଦେଖିବାକୁ ବାକି ରହିଲା ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
