ଝୁଲନ୍ତା ଅବସ୍ଥାରେ ନିଖୋଜ ବ୍ଯକ୍ତିଙ୍କ ମୃତ ଦେହ ଉଦ୍ଧାର
ଖଇରା,୦୪/୩/୨୫) – ବାଲେଶ୍ୱର ଜିଲ୍ଲା ଖଇରା ଥାନା ନନ୍ଦୁର ପଞ୍ଚାୟତ ଅସୁରିଆ ଗାଁ ବିଲ ମଝିରେ ଥିବା ଏକ ଆମ୍ବ ଗଛରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି ।ମୃତ ଯୁବକଙ୍କ ଘର ଡଗରପଡା ପଞ୍ଚାୟତ ଓଗାଳପୁର ଗାଁର ୪୯ ବର୍ଷୀୟ ମନୋରଞ୍ଜନ ବେହେରା । ସେ ଗତ ଶନିବାର ସକାଳୁ ବ୍ୟାଙ୍କ କାମରେ ତୁଡିଗଡ଼ିଆ ବଜାରକୁ ଆସି ଘରକୁ ଫେରି ନଥିଲେ । ବହୁ ଖୋଜାଖୋଜି ପରେ ପରିବାର ଲୋକେ ଏନେଇ ଖଇରା ଥାନାରେ ଅଭିଯୋଗ କରି ବିଭିନ୍ନ ସୋସିଆଲ ମିଡ଼ିଆରେ ଫଟୋ ସହିତ ପ୍ରଚାର କରିଥିଲେ । କିନ୍ତୁ ମନୋରଞ୍ଜନଙ୍କର କୌଣସି ସନ୍ଧାନ ମିଳିନଥିଲା । ଆଜି ହଠାତ୍ ଅସୁରିଆ ଗାଁ ବିଲ ମଝିରେ ଥିବା ଏକ ଆମ୍ବ ଗଛରେ ମନୋରଞ୍ଜନଙ୍କ ଝୁଲନ୍ତା ମୃତଦେହ ସ୍ଥାନୀୟ ଲୋକମାନେ ଦେଖି ଖଇରା ଥାନାକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ମୃତ ଦେହକୁ ଚିହ୍ନଟ କରିଥିବା ବେଳେ ମୃତ୍ୟର କାରଣ ଅସ୍ପଷ୍ଟ ରହିଛି । ପୋଲିସ ମୃତଦେହ ଜବଦ କରି ତଦନ୍ତ ଆରମ୍ଭ କରିଛି । ତଦନ୍ତ ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପରିବାର ଓ ଦେଖଣାହାରୀ ଭରସାରେ ଅଛନ୍ତି ।।
ବାଲେଶ୍ବରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
