ଗୋପାଳପୁର ବେଳାଭୂମିରେ ଅନ୍ତର୍ଜାତୀୟ ଯୋଗ ଦିବସ ପାଳନ ସହ ଏସ୍ଆଇଆର୍ କାର୍ଯ୍ୟକ୍ରମ
ବ୍ରହ୍ମପୁର,ତା.୨୧/୦୬ ‘ଯୋଗ’ ଶରୀର, ମନ ଓ ଆତ୍ମାକୁ କରେ ସକାରାତ୍ମକ ଭାବେ ପ୍ରଭାବିତ l ‘ଯୋଗ’ କରେ ସଂଯୋଗ ଐଶ୍ଵରୀୟ ଚେତନା ସହିତ l ସମଗ୍ର ବିଶ୍ଵକୁ ଏକ ସୂତ୍ରରେ ବାନ୍ଧି ରଖିବାର ପ୍ରୟାସରେ ପ୍ରତିବର୍ଷ ପାଳନ କରାଯାଇଆସୁଥିବା ଅନ୍ତର୍ଜାତୀୟ ଯୋଗ ଦିବସର ମହତ୍ତ୍ବ ତଥା ମହତ ବାର୍ତ୍ତା ଆଜି ବିଶ୍ଵର କୋଣ ଅନୁକୋଣରେ ଗୁଞ୍ଜରିତ l ଏହି ପରିପ୍ରେକ୍ଷୀରେ ଗୋପାଳପୁର ବେଳାଭୂମି ପରି ଏକ ମନୋରମ ସ୍ଥାନରେ ପାଳିତ ହୋଇଯାଇଛି ଅନ୍ତର୍ଜାତୀୟ ଯୋଗ ଦିବସ l ଗୋପାଳପୁର ବିଜ୍ଞାପିତ ଅଞ୍ଚଳ ପରିଷଦ ନିର୍ବାଚ଼ନ ଅଧିକାରୀ ମନୋଜ ନାହାକଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଆୟୋଜିତ ଉକ୍ତ ଦିବସରେ ଯୋଗ ଦେଇ ବ୍ରହ୍ମପୁର ସବ୍ କଲେକ୍ଟର ଅବିନାଶ କୁମାର (ଆଇଏଏସ୍) ସାଂପ୍ରତିକ ସ୍ଥିତିରେ ‘ଯୋଗ’ର ଗୁରୁତ୍ୱ ସଂପର୍କରେ ସଂକ୍ଷିପ୍ତ ବକ୍ତବ୍ୟ ରଖିଥିଲେ l ନୀରୋଗ ଶରୀର, ସୁସ୍ଥ ମନ, ସୁସ୍ଥ ଜୀବନ, ସୁସ୍ଥ ବାର୍ଦ୍ଧକ୍ୟ ନିମନ୍ତେ ନିୟମିତ ଯୋଗାଭ୍ୟାସ ଅବଶ୍ୟ କରଣୀୟ ବୋଲି ସେ କହିଥିଲେ l ଏଠାରେ ଅନ୍ତର୍ଜାତୀୟ ଯୋଗ ଦିବସ ପାଳନ ଅବସରରେ ସ୍ୱତନ୍ତ୍ର ସଘନ ସଂଶୋଧନ(ଏସ୍ ଆଇ ଆର୍) କାର୍ଯ୍ୟକ୍ରମ ସଂପର୍କରେ ମଧ୍ୟ ପ୍ରଚାରପ୍ରସାର ନିମନ୍ତେ ଉପସ୍ଥିତ ଜନସାଧାରଣଙ୍କୁ ସେ ପରାମର୍ଶ ଦେଇଥିଲେ l ଆନ୍ତରିକ ଭାବେ ସମ୍ମିଳିତ ପ୍ରଚେଷ୍ଟା ହିଁ ଏସ୍ଆଇଆର୍ କାର୍ଯ୍ୟକ୍ରମର ବ୍ୟାପକ ସଫଳତା ଦିଗରେ ଅଭିପ୍ରେତ ବୋଲି ସେ ଅଭିହିତ କରିଥିଲେ l ଉକ୍ତ କାର୍ଯ୍ୟକ୍ରମରେ ଡେପୁଟି କଲେକ୍ଟର ଅଲେଖ ରଞ୍ଜନ ମହାଙ୍କୁଡ଼ଙ୍କ ସମେତ ବହୁ ଅଧିକାରୀ, କର୍ମଚାରୀ ଏବଂ ଯୋଗପ୍ରେମୀ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିବାରେ ନିଜ ନିଜର ଭୂମିକା ସୁଚାରୁରୂପେ ନିର୍ବାହ କରିଥିଲେ l
