ସୁନାବେଶରେ ଝଲସିଲେ ଚତୁର୍ଦ୍ଧାମୂର୍ତ୍ତି
ହିଞ୍ଜିଳିକାଟୁ,୨୫/୦୭ ପବିତ୍ର ବଡ଼ ଏକାଦଶୀ ଓ ଶ୍ରୀଜଗନ୍ନାଥଙ୍କ ସୁନାବେଶ ଅବସରରେ ହିଞ୍ଜିଳିକାଟୁ ସହର ସମେତ ଆଖପାଖ ଅଞ୍ଚଳର ବିଭିନ୍ନ ଜଗନ୍ନାଥ ମନ୍ଦିରରେ ଦେଖିବାକୁ ମିଳିଥିଲା ଏକ ଅପୂର୍ବ ଭକ୍ତିମୟ ପରିବେଶ। ସକାଳୁ ମନ୍ଦିରଗୁଡ଼ିକରେ ମଙ୍ଗଳ ଆଳତି, ବିଶେଷ ପୂଜାର୍ଚ୍ଚନା, ବେଦପାଠ, ଭୋଗ ନୀତି ଓ ଧାର୍ମିକ କାର୍ଯ୍ୟକ୍ରମ ଆରମ୍ଭ ହୋଇଥିବା ବେଳେ ଦିନ ବଢ଼ିବା ସହ ମନ୍ଦିର ପରିସରରେ ଭକ୍ତଙ୍କ ଭିଡ଼ ବଢ଼ିଥିଲା।
ଅପରାହ୍ନରେ ଶ୍ରୀଜଗନ୍ନାଥ, ବଡ଼ଭାଇ ବଳଭଦ୍ର ଓ ଦେବୀ ସୁଭଦ୍ରାଙ୍କୁ ସୁନାର ମୁକୁଟ, ହାର, ଚକ୍ର, ଗଦା, କୁଣ୍ଡଳ ଓ ବିଭିନ୍ନ ସ୍ୱର୍ଣ୍ଣ ଅଳଙ୍କାରରେ ସୁସଜ୍ଜିତ କରାଯାଇ ସୁନାବେଶ କରାଯାଇଥିଲା। ସୁନାବେଶରେ ମହାପ୍ରଭୁଙ୍କ ଦିବ୍ୟ ରୂପ ଦର୍ଶନ କରିବା ପାଇଁ ହଜାର ହଜାର ଭକ୍ତଙ୍କ ଭିଡ଼ ଜମିଥିଲା। ଦୀର୍ଘ ସମୟ ଧାଡ଼ିରେ ରହି ଭକ୍ତମାନେ ମହାପ୍ରଭୁଙ୍କ ଦର୍ଶନ କରି ଆଶୀର୍ବାଦ ଲାଭ କରିଥିଲେ। ବଡ଼ ଏକାଦଶୀ ଅବସରରେ ଅନେକ ଶ୍ରଦ୍ଧାଳୁ ଉପବାସ ପାଳନ କରିବା ସହ ହରିନାମ ସଂକୀର୍ତ୍ତନ, ଭଜନ ଓ କୀର୍ତ୍ତନରେ ଯୋଗଦେଇଥିଲେ। ମନ୍ଦିର ପରିସର ‘ଜୟ ଜଗନ୍ନାଥ’ ଧ୍ୱନିରେ ପ୍ରକମ୍ପିତ ହୋଇଉଠିଥିଲା। ଅନେକ ସ୍ଥାନରେ ଭକ୍ତମାନଙ୍କ ପାଇଁ ପ୍ରସାଦ ସେବନ, ପାନୀୟ ଜଳ ଓ ବିଶ୍ରାମର ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା। ମନ୍ଦିର କମିଟି ଓ ସ୍ୱେଚ୍ଛାସେବକମାନେ ଶୃଙ୍ଖଳିତ ଦର୍ଶନ ବ୍ୟବସ୍ଥା ପରିଚାଳନା କରିଥିବା ବେଳେ ପୋଲିସ ପ୍ରଶାସନ ପକ୍ଷରୁ ମଧ୍ୟ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା। ସୁନାବେଶ ଓ ବଡ଼ ଏକାଦଶୀ ପାଳନ ପରେ ଏବେ ଭକ୍ତମାନଙ୍କ ନଜର ରହିଛି ଆସନ୍ତାକାଲିର ଶ୍ରୀମନ୍ଦିର ପ୍ରବେଶ ନୀତି ଉପରେ। ନିର୍ଦ୍ଧାରିତ ନୀତିକାନ୍ତି ସମ୍ପନ୍ନ ହେବା ପରେ ମହାପ୍ରଭୁ ଶ୍ରୀଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରା ଶ୍ରୀ ମନ୍ଦିରକୁ ପ୍ରବେଶ କରିବେ। ଏହି ପବିତ୍ର ନୀତିକୁ ଦର୍ଶନ କରିବା ପାଇଁ ଭକ୍ତମାନଙ୍କ ମଧ୍ୟରେ ଉତ୍ସାହ ଓ ଆଧ୍ୟାତ୍ମିକ ଉତ୍କଣ୍ଠା ବଢ଼ିଚାଲିଛି। ମହାପ୍ରଭୁଙ୍କ ରତ୍ନବେଦୀକୁ ପ୍ରତ୍ୟାବର୍ତ୍ତନ ସହ ଚଳିତ ବର୍ଷର ରଥଯାତ୍ରା ମହୋତ୍ସବର ଶେଷ ପର୍ଯ୍ୟାୟ ସମ୍ପନ୍ନ ହେବ। ଭକ୍ତମାନଙ୍କ ବିଶ୍ୱାସ ରହିଛି, ସୁନାବେଶରେ ମହାପ୍ରଭୁଙ୍କ ଦର୍ଶନ ଓ ବଡ଼ ଏକାଦଶୀରେ ପୂଜାର୍ଚ୍ଚନା କଲେ ସୁଖ, ଶାନ୍ତି, ସମୃଦ୍ଧି ଓ ମନୋକାମନା ପୂରଣ ହୋଇଥାଏ। ସେଥିପାଇଁ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ହିଞ୍ଜିଳି ଓ ଆଖପାଖ ଅଞ୍ଚଳରେ ଏହି ପବିତ୍ର ଉତ୍ସବ ଭକ୍ତି, ଶ୍ରଦ୍ଧା ଓ ଆଧ୍ୟାତ୍ମିକ ଉଲ୍ଲାସର ସହ ପାଳିତ ହୋଇଛି।
