ଆଜିର ଦିବସର ଅନୁଚିନ୍ତା: ଅଗଷ୍ଟ ୬ ତାରିଖ :ଇତିହାସର ସଂଘର୍ଷ,ବିଜ୍ଞାନର ଚରମ ବିପର୍ଯ୍ୟୟ ଏବଂ ମାନବୀୟ ସମ୍ବେଦନାର ଏକ ମୂକସାକ୍ଷୀ
ଡା.ଦେବୀ ପ୍ରସାଦ ମିଶ୍ର,
କାଳର କରାଳ ବକ୍ଷରେ ପ୍ରତିଟି ଦିନ ଏକ ନୂତନ ସନ୍ଦେଶ ଓ ଚେତାବନୀ ନେଇ ଆସିଥାଏ।ଆଜି ଅଗଷ୍ଟ ୬ ତାରିଖ।ସମଗ୍ର ବିଶ୍ୱ ପାଇଁ ଏହି ଦିନଟି କେବଳ ଗୋଟିଏ ସାଧାରଣ ତାରିଖ ନୁହେଁ,ବରଂ ମାନବ ଇତିହାସର ସବୁଠାରୁ ବଡ଼ ସଂଘର୍ଷ,ବିଜ୍ଞାନର ଚରମ ବିପର୍ଯ୍ୟୟ ଏବଂ ମାନବୀୟ ସମ୍ବେଦନାର ଏକ ମୂକସାକ୍ଷୀ।
ବିଶ୍ୱ କ୍ଷେତ୍ରରେ ଇତିହାସର ଏକ କଳା ଅଧ୍ୟାୟ ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ୧୯୪୫ ମସିହା ଅଗଷ୍ଟ ୬ ତାରିଖରେ ଜାପାନର ସୁନ୍ଦର ସହର ହିରୋସିମା ଉପରେ ଆମେରିକା ଦ୍ୱାରା ନିକ୍ଷେପ କରାଯାଇଥିବା ଆଣବିକ ବୋମା ‘ଲିଟିଲ୍ ବୟ’ ମାତ୍ର କେଇ ସେକେଣ୍ଡରେ ଲକ୍ଷାଧିକ ଜୀବନ ଛଡ଼ାଇ ନେଇଥିଲା।ବିଜ୍ଞାନ ଯେତେବେଳେ ମାନବିକତା ଶୂନ୍ୟ ହୁଏ,ସେତେବେଳେ ତାହା କେତେ ଭୟଙ୍କର ରୂପ ଧାରଣ କରିପାରେ,ଏହା ତାର ସବୁଠାରୁ ବଡ଼ ଉଦାହରଣ।ସେଥିପାଇଁ ଆଜିର ଦିନକୁ ସାରା ବିଶ୍ୱରେ ‘ହିରୋସିମା ଦିବସ’ ଭାବେ ପାଳନ କରାଯାଇ ପରମାଣୁ ମୁକ୍ତ ଏବଂ ଶାନ୍ତିପୂର୍ଣ୍ଣ ବିଶ୍ୱ ଗଠନର ସଂକଳ୍ପ ନିଆଯାଏ।ଆଜିର ଦିନଟି ଜ୍ଞାନ ଏବଂ ବିଜ୍ଞାନ ଜଗତ ପାଇଁ ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।୧୮୮୧ ମସିହା ଆଜିର ଦିନରେ ଚିକିତ୍ସା ବିଜ୍ଞାନରେ କ୍ରାନ୍ତି ଆଣିଥିବା ପେନିସିଲିନ୍ ର ଆବିଷ୍କାରକ,ନୋବେଲ ବିଜେତା ଜୀବବିଜ୍ଞାନୀ ସାର୍ ଆଲେକ୍ ଜାଣ୍ଡାର ଫ୍ଲେମିଙ୍ଗ ଜନ୍ମଗ୍ରହଣ କରିଥିଲେ। ସେହିପରି ୧୮୦୯ ମସିହାରେ ଇଂରାଜୀ ସାହିତ୍ୟର ମହାନ କବି ଆଲ୍ ଫ୍ରେଡ୍ ଲର୍ଡ ଟେନିସନ୍ ମଧ୍ୟ ଆଜି ଜନ୍ମ ହୋଇଥିଲେ।ଭାରତୀୟ ପରିବେଶ ବିଜ୍ଞାନ କ୍ଷେତ୍ରରେ ‘ୱାଟରମ୍ୟାନ୍ ଅଫ୍ ଇଣ୍ଡିଆ’ ଭାବେ ଖ୍ୟାତ ମାଗସାସେ ବିଜେତା ରାଜେନ୍ଦ୍ର ସିଂଙ୍କ ଜନ୍ମ ୧୯୫୯ ମସିହାରେ ଆଜିର ଦିନରେ ହୋଇଥିଲା,ଯିଏ ଜଳ ସଂରକ୍ଷଣର ଏକ ନୂତନ ଦିଗନ୍ତ ବିଶ୍ୱ ସମ୍ମୁଖରେ ରଖିଥିଲେ।
ଭାରତ ଓ ଓଡ଼ିଶାର ବୀରତ୍ୱର ସ୍ମୃତି ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଭାରତୀୟ ସ୍ୱାଧୀନତା ସଂଗ୍ରାମର ଇତିହାସକୁ ଦେଖିଲେ, ଓଡ଼ିଶାର ବାଲେଶ୍ୱର ମାଟି ସହ ଜଡ଼ିତ ମହାନ ବିପ୍ଳବୀ ବାଘା ଯତିନ (ଯତୀନ୍ଦ୍ରନାଥ ମୁଖାର୍ଜୀ)ଙ୍କ ସଶସ୍ତ୍ର ଆନ୍ଦୋଳନର ପ୍ରସ୍ତୁତି ଏହି ଅଗଷ୍ଟ ମାସରେ ହିଁ ଓଡ଼ିଶାର ଚାଷୀଖଣ୍ଡ ମାଟିରେ ତୀବ୍ର ରୂପ ଧାରଣ କରିଥିଲା,ଯାହା ଭାରତୀୟଙ୍କ ମନରେ ସ୍ୱାଧୀନତାର ସ୍ପୃହା ଜାଗ୍ରତ କରିଥିଲା।ଏହା ସହିତ ଆଜି ଭାରତର ପୂର୍ବତନ ବୈଦେଶିକ ମନ୍ତ୍ରୀ ତଥା ପ୍ରଖର ଜନନେତ୍ରୀ ସୁଷମା ସ୍ୱରାଜଙ୍କ ପୁଣ୍ୟତିଥି।ତାଙ୍କର ଦେଶପ୍ରେମ ଓ ସମ୍ବେଦନଶୀଳ ରାଜନୀତି ସଦା ସ୍ମରଣୀୟ।
ଆଜିର ଆହ୍ୱାନ ଓ ଅନୁଚିନ୍ତା ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଆଜିର ଏହି ଐତିହାସିକ ଘଟଣାବଳୀ ଆମକୁ ଶିକ୍ଷା ଦିଏ ଯେ ପ୍ରଗତି ଏବଂ ଶକ୍ତି ମଧ୍ୟରେ ଯଦି ମାନବୀୟ ମୂଲ୍ୟବୋଧ ନରହେ,ତେବେ ସଭ୍ୟତା ବିନାଶ ଆଡ଼କୁ ଗତି କରିବ।ବିଜ୍ଞାନ,ଗଣିତ ଏବଂ ଜ୍ଞାନର ବ୍ୟବହାର କେବଳ ମାନବ କଲ୍ୟାଣ ଏବଂ ବିଶ୍ୱ ଶାନ୍ତି ପାଇଁ ଉଦ୍ଦିଷ୍ଟ ହେବା ଉଚିତ।ତେବେ ଆସନ୍ତୁ,ଆମେ ସମସ୍ତେ ଆଜିର ଏହି ପବିତ୍ର ଦିବସରେ ହିଂସା ଓ ଯୁଦ୍ଧର ମାନସିକତାକୁ ଦୂରେଇ ଏକ ସୁନ୍ଦର,ସବୁଜ ଏବଂ ଶାନ୍ତିପୂର୍ଣ୍ଣ ସହାବସ୍ଥାନ ଭିତ୍ତିକ ବିଶ୍ୱ ଗଠନ ଦିଗରେ ନିଜକୁ ସମର୍ପିତ କରିବା।
ଡା.ଦେବୀ ପ୍ରସାଦ ମିଶ୍ର,
