ପର୍ବ ପୂର୍ବରୁ ରାୟଗଡ଼ାରେ ମିଠା ଓ ଦୁଗ୍ଧଜାତ ଖାଦ୍ୟର ମାନ ଯାଞ୍ଚ ଦାବି
ଅପମିଶ୍ରିତ ମିଠା, ଖୋଆ ଓ ପନିର ବିକ୍ରି ନେଇ ଅଭିଯୋଗ; ଅଚାନକ ଚଢ଼ାଉ ପାଇଁ ଦାବି
ରାୟଗଡ଼ା: ଆଗକୁ ବିଭିନ୍ନ ପର୍ବପର୍ବାଣି ଆରମ୍ଭ ହେବାକୁ ଥିବା ବେଳେ ରାୟଗଡ଼ା ଜିଲ୍ଲାରେ ମିଠା, ଖୋଆ, ପନିର ଓ ଅନ୍ୟାନ୍ୟ ଦୁଗ୍ଧଜାତ ଖାଦ୍ୟ ସାମଗ୍ରୀର ଚାହିଦା ବଢ଼ିବାରେ ଲାଗିଛି। ଭକ୍ତ ଓ ଗ୍ରାହକମାନେ ନିଜ ଆସ୍ଥା ଓ ପରମ୍ପରା ଅନୁଯାୟୀ ପର୍ବପର୍ବାଣିରେ ମିଠା ଓ ବିଭିନ୍ନ ଖାଦ୍ୟ ସାମଗ୍ରୀ କିଣୁଥିବାରୁ ବଜାରରେ ଏହି ସାମଗ୍ରୀର ବିକ୍ରି ବୃଦ୍ଧି ପାଇଥାଏ। ତେବେ ଏହି ବଢ଼ୁଥିବା ଚାହିଦାର ସୁଯୋଗ ନେଇ କେତେକ ଅସାଧୁ ବ୍ୟବସାୟୀ ଅପମିଶ୍ରିତ କିମ୍ବା ନିମ୍ନମାନର ମିଠା, ଖୋଆ ଓ ପନିର ପ୍ରସ୍ତୁତ କରି ବିକ୍ରି କରୁଥିବା ନେଇ ଅଭିଯୋଗ ଉଠିଛି।
ବିଶେଷକରି ମିଠା ପ୍ରସ୍ତୁତିରେ ନିମ୍ନମାନର କଞ୍ଚାମାଲ, ଅସ୍ୱାସ୍ଥ୍ୟକର ଉପାଦାନ କିମ୍ବା ଅନୁମୋଦିତ ନଥିବା ରଙ୍ଗ ଓ ଅନ୍ୟାନ୍ୟ ପଦାର୍ଥ ବ୍ୟବହାର କରାଯାଉଥିବା ନେଇ ଗ୍ରାହକ ମହଲରେ ଆଶଙ୍କା ପ୍ରକାଶ ପାଇଛି। ଖୋଆ ଓ ପନିର ଭଳି ଦୁଗ୍ଧଜାତ ସାମଗ୍ରୀରେ ମଧ୍ୟ ଗୁଣବତ୍ତା ଓ ଶୁଦ୍ଧତା ନେଇ ନିୟମିତ ଯାଞ୍ଚର ଆବଶ୍ୟକତା ରହିଛି।
ଅପମିଶ୍ରିତ ଓ ନିମ୍ନମାନର ଖାଦ୍ୟ ସାମଗ୍ରୀ ଖାଇବା ଦ୍ୱାରା ଗ୍ରାହକଙ୍କ ସ୍ୱାସ୍ଥ୍ୟ ଉପରେ ଅନେକ ପ୍ରକାରର କୁପ୍ରଭାବ ପଡ଼ିପାରେ। ତେଣୁ ପର୍ବ ଋତୁରେ ଲୋକଙ୍କ ସ୍ୱାସ୍ଥ୍ୟ ସୁରକ୍ଷାକୁ ଦୃଷ୍ଟିରେ ରଖି ମିଠା ଦୋକାନ, ଦୁଗ୍ଧଜାତ ଖାଦ୍ୟ ପ୍ରସ୍ତୁତି କେନ୍ଦ୍ର ଓ ବଜାରରେ ବିକ୍ରି ହେଉଥିବା ଖାଦ୍ୟର ମାନ ଯାଞ୍ଚ କରିବାକୁ ଦାବି ହୋଇଛି।
ବିଭିନ୍ନ ସଂଗଠନ, ସଚେତନ ନାଗରିକ ଓ ବୁଦ୍ଧିଜୀବୀମାନେ ଜିଲ୍ଲା ପ୍ରଶାସନ ଏବଂ ଖାଦ୍ୟ ସୁରକ୍ଷା ବିଭାଗକୁ ଏ ଦିଗରେ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି। ସହର ଓ ଗ୍ରାମାଞ୍ଚଳର ବିଭିନ୍ନ ମିଠା ଦୋକାନରେ ଅଚାନକ ଚଢ଼ାଉ କରି ମିଠା, ଖୋଆ, ପନିର ଓ ଅନ୍ୟାନ୍ୟ ଖାଦ୍ୟ ସାମଗ୍ରୀର ନମୁନା ସଂଗ୍ରହ କରି ପରୀକ୍ଷାଗାରରେ ଯାଞ୍ଚ କରିବାକୁ ମଧ୍ୟ ଦାବି ହୋଇଛି।
ଏଥିସହିତ ଖାଦ୍ୟ ପ୍ରସ୍ତୁତି ସ୍ଥାନରେ ପରିଷ୍କାର-ପରିଚ୍ଛନ୍ନତା, ଖାଦ୍ୟ ସଂରକ୍ଷଣ ବ୍ୟବସ୍ଥା, କଞ୍ଚାମାଲର ଗୁଣବତ୍ତା ଓ ଖାଦ୍ୟ ସୁରକ୍ଷା ନିୟମ ପାଳନ ହେଉଛି କି ନାହିଁ, ତାହା ମଧ୍ୟ ଯାଞ୍ଚ କରିବାକୁ ଦାବି ହୋଇଛି। ନିୟମ ଉଲ୍ଲଂଘନ କରୁଥିବା କିମ୍ବା ଅପମିଶ୍ରିତ ଖାଦ୍ୟ ବିକ୍ରି କରୁଥିବା ବ୍ୟବସାୟୀଙ୍କ ବିରୋଧରେ ଆଇନାନୁଯାୟୀ କଠୋର କାର୍ଯ୍ୟାନୁଷ୍ଠାନ ନେଲେ ଗ୍ରାହକଙ୍କ ମଧ୍ୟରେ ଆସ୍ଥା ବଢ଼ିବ ବୋଲି ମତ ପ୍ରକାଶ ପାଇଛି।
ପର୍ବପର୍ବାଣି ସମୟରେ ଲୋକମାନେ ଯେପରି ନିରାପଦ ଓ ଗୁଣବତ୍ତାସମ୍ପନ୍ନ ଖାଦ୍ୟ ପାଇପାରିବେ, ସେଥିପାଇଁ ପ୍ରଶାସନ ପକ୍ଷରୁ ନିୟମିତ ଯାଞ୍ଚ ସହ ଅଚାନକ ଚଢ଼ାଉ ଅଭିଯାନ ଚଳାଇବା ଜରୁରୀ ବୋଲି ସାଧାରଣରେ ଦାବି ଜୋର ଧରିଛି।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
