ଆଜିର ଦିବସର ଅନୁଚିନ୍ତା:ଅଗଷ୍ଟ ୨୩ ତାରିଖ : ମାନବିକ ମୁକ୍ତିସଂଗ୍ରାମରର ସ୍ୱର,ଦାସତ୍ୱ ପ୍ରଥାର ବିଲୋପ ଓ ମହାକାଶରେ ଭାରତର ବିଜୟଯାତ୍ରା
ଡା.ଦେବୀ ପ୍ରସାଦ ମିଶ୍ର,
କାଳର ଅନନ୍ତ ପ୍ରବାହରେ କିଛି ନିର୍ଦ୍ଦିଷ୍ଟ ତାରିଖ ମାନବ ସଭ୍ୟତାକୁ ଦିଗଦର୍ଶନ ଦେବାରେ ସମର୍ଥ ହୋଇଥାନ୍ତି।ସେହିଭଳି ଏକ ଅନନ୍ୟ ଦିନ ହେଉଛି ଅଗଷ୍ଟ ୨୩।ଏହି ଦିନଟି ଏକାଧାରରେ ମାନବ ସମାଜର ଦୁଇଟି ଚରମ ବିନ୍ଦୁକୁ ସ୍ପର୍ଶ କରେ—ଗୋଟିଏ ପଟେ ମଣିଷକୁ ପଶୁ ଭଳି ଶୃଙ୍ଖଳିତ କରି ରଖିବାର ଅମାନୁଷିକ ପ୍ରଥା ବିରୁଦ୍ଧରେ ସଂଗ୍ରାମର ସ୍ମୃତି,ଆଉ ଗୋଟିଏ ପଟେ ମଣିଷର ବୈଜ୍ଞାନିକ ପ୍ରଜ୍ଞା ବଳରେ ମହାଶୂନ୍ୟକୁ ଜୟ କରିବାର ଅପୂର୍ବ ଗୌରବ।ବିଶ୍ୱ କ୍ଷେତ୍ରରେ ମାନବିକ ଅଧିକାରର ପୁନରୁଦ୍ଧାର ସାରା ବିଶ୍ୱ ପାଇଁ ଆତ୍ମସମୀକ୍ଷାର ମାଧ୍ୟମ ସାଜିଛି।ଦାସତ୍ୱର ଶୃଙ୍ଖଳରୁ ମୁକ୍ତିର ଆହ୍ୱାନ କ୍ରମେ ୟୁନେସ୍କୋ ଦ୍ୱାରା ପ୍ରତିବର୍ଷ ପାଳିତ ହେଉଥିବା ‘ଆନ୍ତର୍ଜାତୀୟ ଦାସ ବ୍ୟାପାର ସ୍ମରଣ ଓ ଏହାର ଉଚ୍ଛେଦ ଦିବସ’ କେବଳ ଇତିହାସର ଏକ ଶୁଷ୍କ ପୃଷ୍ଠା ନୁହେଁ,ବରଂ ମାନବିକ ସ୍ୱାଧୀନତାର ସବୁଠାରୁ ବଡ଼ ଇସ୍ତାହାର।୧୭୯୧ ମସିହାରେ ଆଜିର ଦିନରେ ସାଣ୍ଟୋ ଡୋମିଙ୍ଗୋଠାରେ ଯେଉଁ ବିଦ୍ରୋହର ସୂତ୍ରପାତ ହୋଇଥିଲା,ତାହା ବିଶ୍ୱରୁ ସାମ୍ରାଜ୍ୟବାଦୀ ଓ କ୍ରୂର ଆଟଲାଣ୍ଟିକ୍ ଦାସ ପ୍ରଥାର ମୂଳୋତ୍ପାଟନ କରିଥିଲା।ମଣିଷକୁ କିଣାବିକା କରିବା,ତା’ର ଶ୍ରମ ଓ ସ୍ୱାଧୀନତାକୁ ଲୁଣ୍ଠନ କରିବା ଯେଉଁ ସଭ୍ୟତାର ପରିଚୟ ଥିଲା,ତାହା ବିରୁଦ୍ଧରେ ଏହା ଥିଲା ଏକ ଗଣକ୍ରାନ୍ତି।ଆଜିର ପ୍ରେକ୍ଷାପଟରେ ଏହି ଦିବସର ପ୍ରାସଙ୍ଗିକତା ଆହୁରି ବଢ଼ିଯାଇଛି।ସ୍ୱରୂପ ବଦଳିଛି ସତ,କିନ୍ତୁ ଆଜି ବି ସମାଜରେ ଆଧୁନିକ ଦାସତ୍ୱ, ବାଧ୍ୟତାମୂଳକ ଶ୍ରମ,ମାନବ ଚାଲାଣ ଏବଂ ଶୋଷଣ ଭିନ୍ନ ରୂପରେ ଜୀବିତ ରହିଛି।ଓଡ଼ିଶା ଭଳି ରାଜ୍ୟରେ ଦାଦନ ସମସ୍ୟା ଓ ଶ୍ରମିକ ଶୋଷଣ ଏହାର ଜ୍ୱଳନ୍ତ ଉଦାହରଣ।ଯେ ପର୍ଯ୍ୟନ୍ତ ପୃଥିବୀର ଶେଷ ମଣିଷଟି ଶୋଷଣମୁକ୍ତ ଏବଂ ସମ୍ମାନର ସହ ବଞ୍ଚିବାର ଅଧିକାର ପାଇନାହିଁ,ସେ ପର୍ଯ୍ୟନ୍ତ ସ୍ୱାଧୀନତାର ସ୍ଲୋଗାନ୍ କେବଳ ଏକ ପ୍ରହସନ।ଆଜିର ଦିନରେ ଆମକୁ ପ୍ରତ୍ୟେକ ବ୍ୟକ୍ତିର ମାନବିକ ଅଧିକାରକୁ ସୁରକ୍ଷା ଦେବା ପାଇଁ ଶପଥ ନେବାକୁ ହେବ।
ଭାରତ କ୍ଷେତ୍ରରେ ମହାକାଶ ବିଜ୍ଞାନରେ ଭାରତର ସ୍ୱର୍ଣ୍ଣିମ ସଫଳତା ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଜାତୀୟ ମହାକାଶ ଦିବସ ଅନ୍ୟପଟେ,ଅଗଷ୍ଟ ୨୩ ଏବେ ଭାରତୀୟ ବୈଜ୍ଞାନିକ ପ୍ରତିଭାର ବିଶ୍ଵବ୍ୟାପୀ ଜୟଯାତ୍ରାର ପ୍ରତୀକ ସାଜିଛି। ୨୦୨୩ ମସିହା ଆଜିର ଦିନରେ ଭାରତର ‘ଚନ୍ଦ୍ରଯାନ-୩’ ଚନ୍ଦ୍ରର ଦୁର୍ଗମ ତଥା ରହସ୍ୟମୟ ଦକ୍ଷିଣ ମେରୁରେ ସଫଳତାର ସହ ପାଦ ଥାପିଥିଲା। ଏହି ଅପୂର୍ବ କୃତିତ୍ୱ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଦିନକୁ ‘ଜାତୀୟ ମହାକାଶ ଦିବସ’ ଭାବେ ଘୋଷଣା କରିଥିଲେ ଏବଂ ଚନ୍ଦ୍ରଯାନ-୩ ର ଅବତରଣ ସ୍ଥଳକୁ ‘ଶିବ ଶକ୍ତି ବିନ୍ଦୁ’ ନାମରେ ନାମିତ କରାଯାଇଥିଲା।ଏହି ବିଜୟ କେବଳ କିଛି ଯନ୍ତ୍ରପାତିର ଚନ୍ଦ୍ର ପୃଷ୍ଠକୁ ଯାତ୍ରା ନଥିଲା,ବରଂ ଏହା ଥିଲା ୧୪୦ କୋଟି ଭାରତୀୟଙ୍କ ଆତ୍ମବିଶ୍ୱାସର ପ୍ରତିଫଳନ।ଗଣିତ ଏବଂ ଭୌତିକ ବିଜ୍ଞାନର ଜଟିଳ ଗଣନାକୁ ଆଧାର କରି ଇସ୍ରୋର ବୈଜ୍ଞାନିକମାନେ ଯେଉଁ ଚମତ୍କାର କରି ଦେଖାଇଲେ,ତାହା ବିଶ୍ୱର ବିକଶିତ ଦେଶମାନଙ୍କୁ ସ୍ତବ୍ଧ କରିଦେଇଛି।ଚନ୍ଦ୍ରର ଦକ୍ଷିଣ ମେରୁରେ ପହଞ୍ଚିବାରେ ଭାରତ ବିଶ୍ୱର ପ୍ରଥମ ଦେଶ ହୋଇପାରିଲା।ଏହା ଆମ ସ୍କୁଲ ଓ କଲେଜର ଛାତ୍ରଛାତ୍ରୀମାନଙ୍କ ମଧ୍ୟରେ ବିଜ୍ଞାନ ଓ ଗଣିତ ପ୍ରତି ଆଗ୍ରହ ସୃଷ୍ଟି କରିବା ସହ “ଷ୍ଟେମ୍” ଶିକ୍ଷା କ୍ଷେତ୍ରରେ ଏକ ନୂତନ ବିପ୍ଳବ ଆଣିଛି।ମହାକାଶ ଗବେଷଣା କେବଳ ଗୌରବ ପାଇଁ ନୁହେଁ,ବରଂ ପାଣିପାଗ ସୂଚନା,କୃଷିର ବିକାଶ ଏବଂ ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରି ସାଧାରଣ ଜୀବନଯାତ୍ରାକୁ ସହଜ କରିବାରେ ବ୍ୟବହୃତ ହେଉଛି।
ପରିଶେଷରେ ଅଗଷ୍ଟ ୨୩ ଆମକୁ ଶିକ୍ଷା ଦିଏ ଯେ, ଯେତେବେଳେ ମଣିଷ ନିଜର ଆଭ୍ୟନ୍ତରୀଣ ସଂକୁଚିତ ଚିନ୍ତାଧାରା ଓ ଦାସତ୍ୱର ଶୃଙ୍ଖଳକୁ ଭାଙ୍ଗି ମୁକ୍ତ ହୁଏ,ସେତେବେଳେ ସେ ପୃଥିବୀର ସୀମା ଅତିକ୍ରମ କରି ମହାଶୂନ୍ୟକୁ ମଧ୍ୟ ନିଜ ମୁଠାରେ ରଖିବାକୁ ସକ୍ଷମ ହୋଇଥାଏ।ତେବେ ଆସନ୍ତୁ,ଆମେ ସମସ୍ତେ ଆଜିର ଏହି ପବିତ୍ର ଦିବସରେ ବିଜ୍ଞାନର ଆଲୋକରେ ଅନ୍ଧବିଶ୍ୱାସର ଅନ୍ଧକାରକୁ ଦୂର କରିବା ଏବଂ ଏକ ମାନବବାଦୀ ତଥା ବୈଜ୍ଞାନିକ ଚେତନାରେ ଋଦ୍ଧିମନ୍ତ ବିଶ୍ୱ ସମାଜ ଗଠନ ଦିଗରେ ବ୍ରତୀ ହେବା।
ଡା.ଦେବୀ ପ୍ରସାଦ ମିଶ୍ର,
