ଚଳନା ସବସେଣ୍ଟର ସ୍ୱାସ୍ଥ୍ୟ କର୍ମୀ ମଳୟ ଖମାରୀଙ୍କୁ ବିଦାୟ ସମ୍ବର୍ଦ୍ଧନା
ସିନାପାଲି, ୧/୧୦: ନୂଆପଡା ଜିଲ୍ଲା ସିନାପାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧୀନସ୍ଥ ଚଳନା ସବସେଣ୍ଟରରେ ପ୍ରାୟ ୧୫ ବର୍ଷ ଧରି କାର୍ଯ୍ୟରତ ଥିବା ସ୍ୱାସ୍ଥ୍ୟକର୍ମୀ ମଳୟ ଖମାରୀଙ୍କ ବଦଳି ହୋଇଥିବାରୁ ତାଙ୍କୁ ଭାବବିହ୍ୱଳ ପରିବେଶରେ ବିଦାୟ ସମ୍ବର୍ଦ୍ଧନା ଦିଆଯାଇଛି।
ଦୀର୍ଘ ୧୫ ବର୍ଷ ଧରି ଚଳନା ସବସେଣ୍ଟର ଅଞ୍ଚଳରେ କାର୍ଯ୍ୟ କରି ଶ୍ରୀ ଖମାରୀ ସ୍ଥାନୀୟ ଲୋକଙ୍କ ସ୍ୱାସ୍ଥ୍ୟସେବାରେ ନିଜର ଦାୟିତ୍ୱ ତୁଲାଇ ଆସୁଥିଲେ। ଗ୍ରାମାଞ୍ଚଳରେ ସ୍ୱାସ୍ଥ୍ୟ ସଚେତନତା, ରୋଗୀଙ୍କୁ ସହଯୋଗ ଓ ବିଭିନ୍ନ ସ୍ୱାସ୍ଥ୍ୟସେବା କାର୍ଯ୍ୟକ୍ରମରେ ତାଙ୍କର ଭୂମିକା ରହିଥିଲା।
ତାଙ୍କ ବଦଳି ଖବର ପରେ ଚଳନା ସବସେଣ୍ଟରର ଆଶାକର୍ମୀ, ସିଏଚ୍ଓ (CHO) ଓ ଅନ୍ୟାନ୍ୟ ସ୍ୱାସ୍ଥ୍ୟକର୍ମୀଙ୍କ ମଧ୍ୟରେ ଭାବବିହ୍ୱଳ ପରିବେଶ ସୃଷ୍ଟି ହୋଇଥିଲା। ସହକର୍ମୀମାନେ ତାଙ୍କର ଦୀର୍ଘଦିନର ସେବା ଓ ସହଯୋଗକୁ ସ୍ମରଣ କରି ତାଙ୍କୁ ଉତ୍ତରୀୟ ଓ ପୁଷ୍ପଗୁଚ୍ଛ ପ୍ରଦାନ କରି ସମ୍ବର୍ଦ୍ଧିତ କରିଥିଲେ।
ଏହି ଅବସରରେ ଉପସ୍ଥିତ ଆଶାକର୍ମୀ, ସିଏଚ୍ଓ ଓ ସ୍ୱାସ୍ଥ୍ୟକର୍ମୀମାନେ ଶ୍ରୀ ଖମାରୀଙ୍କ ଆଗାମୀ କର୍ମଜୀବନ ସୁଖମୟ ଓ ସଫଳ ହେଉ ବୋଲି କାମନା କରିଥିଲେ। ଦୀର୍ଘ ବର୍ଷର ସହକର୍ମୀଙ୍କୁ ବିଦାୟ ଦେବା ବେଳେ ସମସ୍ତଙ୍କ ମଧ୍ୟରେ ଭାବପ୍ରବଣ ପରିବେଶ ଦେଖାଦେଇଥିଲା।
