ଧର୍ମଗଡ଼ ପଞ୍ଚାୟତ କଲେଜ ଛାତ୍ର ସଂସଦ ନିର୍ବାଚନ , ବାଜି ମାରିଲା ବିଜୁ ଛାତ୍ର ଜନତା ଦଳ
ଧର୍ମଗଡ : ଧର୍ମଗଡ଼ ପଞ୍ଚାୟତ ମହାବିଦ୍ୟାଳୟର ଛାତ୍ର ସଂସଦ ନିର୍ବାଚନ ଶେଷ ହୋଇଛି। ନିର୍ବାଚନରେ ବିଜୁ ଛାତ୍ର ଜନତା ଦଳ ସମର୍ଥିତ ପ୍ରାର୍ଥୀମାନେ ବିଭିନ୍ନ ପଦବୀରେ ବିଜୟୀ ହୋଇଛନ୍ତି। ସଭାପତି ଭାବେ ଯୋଗେନ୍ଦ୍ର ବଣିଆ ଓ ସାଧାରଣ ସମ୍ପାଦକ ଭାବେ କଳ୍ପନା ବିହାରୀ ନିର୍ବାଚିତ ହୋଇଛନ୍ତି। ବିଜୟୀ ପ୍ରାର୍ଥୀଙ୍କୁ ସମ୍ବର୍ଦ୍ଧନା ଦେବା ପାଇଁ ପୂର୍ବତନ ମନ୍ତ୍ରୀ ପୁଷ୍ପେନ୍ଦ୍ର ସିଂଦେଓଙ୍କ ସମେତ ବିଜୁ ଜନତା ଦଳର ବହୁ ନେତା ଓ କର୍ମୀ ଉପସ୍ଥିତ ଥିଲେ। ପରେ ସହରରେ ଏକ ଶୋଭାଯାତ୍ରା କରାଯାଇଥିଲା।
ନିର୍ବାଚନରେ ମୋଟ ୮୫୨ ଜଣ ଭୋଟରଙ୍କ ମଧ୍ୟରୁ ୬୭୨ ଜଣ ମତଦାନ କରିଥିଲେ। ଏହା ମୋଟ ଭୋଟରଙ୍କ ପ୍ରାୟ ୭୮.୮୭ ପ୍ରତିଶତ। ସଭାପତି ପଦ ପାଇଁ ଯୋଗେନ୍ଦ୍ର ବଣିଆ ୩୭୨ ଖଣ୍ଡ ଭୋଟ ପାଇ ବିଜୟୀ ହୋଇଥିବା ବେଳେ ଏବିଭିପି ସମର୍ଥିତ ପ୍ରାର୍ଥୀ ସାଇ ଦର୍ଶନ ଠାକୁର ୨୯୪ ଖଣ୍ଡ ଭୋଟ ପାଇଥିଲେ। ସେହିପରି ସାଧାରଣ ସମ୍ପାଦକ ପଦରେ କଳ୍ପନା ବିହାରୀ ୩୫୮ ଖଣ୍ଡ ଭୋଟ ପାଇ ବିଜୟୀ ହୋଇଥିବା ବେଳେ ଏବିଭିପି ସମର୍ଥିତ ପ୍ରାର୍ଥୀ ଧରାଶ୍ରୀ ନାଏକ ୩୦୫ ଖଣ୍ଡ ଭୋଟ ପାଇଥିଲେ।
ଅନ୍ୟ ପଦବୀଗୁଡ଼ିକ ମଧ୍ୟରେ ଉପସଭାପତି ଭାବେ ମନୀଷ କୁମାର କର ୪୧୧ ଖଣ୍ଡ ଭୋଟ, ଯୁଗ୍ମ ସମ୍ପାଦକ ଭାବେ ରୁପେଶ କୁମାର ନାଏକ ୩୩୨ ଖଣ୍ଡ ଭୋଟ, ସାଂସ୍କୃତିକ ସମ୍ପାଦକ ଭାବେ କ୍ରିଷ ମହାରଣା ୩୯୮ ଖଣ୍ଡ ଭୋଟ ଏବଂ କ୍ରୀଡ଼ା ସମ୍ପାଦକ ଭାବେ ବିବେକ ନାଏକ ୩୮୧ ଖଣ୍ଡ ଭୋଟ ପାଇ ବିଜୟୀ ହୋଇଛନ୍ତି। ଏହି ପଦବୀଗୁଡ଼ିକରେ ମଧ୍ୟ ବିଜୁ ଛାତ୍ର ଜନତା ଦଳ ସମର୍ଥିତ ପ୍ରାର୍ଥୀମାନେ ବିଜୟୀ ହୋଇଛନ୍ତି।
ନିର୍ବାଚନ ଫଳାଫଳ ପରେ ବିଜୟୀ ପ୍ରାର୍ଥୀ ଓ ସେମାନଙ୍କ ସମର୍ଥକଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା। ନିର୍ବାଚିତ ଛାତ୍ର ପ୍ରତିନିଧିମାନେ କଲେଜର ଶିକ୍ଷା ପରିବେଶର ଉନ୍ନତି, ଛାତ୍ରଛାତ୍ରୀଙ୍କ ସମସ୍ୟାର ସମାଧାନ, ସାଂସ୍କୃତିକ କାର୍ଯ୍ୟକ୍ରମ ଓ କ୍ରୀଡ଼ାର ବିକାଶ ଦିଗରେ କିପରି କାର୍ଯ୍ୟ କରିବେ, ତାହାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଆଶା ପ୍ରକାଶ ପାଇଛି।
ବିଦ୍ୟାଧର ସାହୁଙ୍କ ରିପୋର୍ଟ….
