ବାତ୍ୟା ପ୍ରଭାବରେ ନକଟିକାନୀ ପଞ୍ଚାୟତରେ ବ୍ୟାପକ ଧାନ ଫସଲ କ୍ଷୟକ୍ଷତି
ଗୋଲାମୁଣ୍ଡା ୦୬/୧୧(ମ ନି ସ): କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକ୍ ଅନ୍ତର୍ଗତ ନକଟିକାନୀ ଗ୍ରାମପଞ୍ଚାୟତ ଅଞ୍ଚଳରେ ବାତ୍ୟାଜନିତ ପ୍ରବଳ ପବନ ଓ ବର୍ଷା ଯୋଗୁଁ ଧାନ ଫସଲ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଥିବା ଅଭିଯୋଗ ହୋଇଛି। ଅମଳ ସମୟରେ ପାଚିଲା ଧାନ ଗଛ ଜମିରେ ଶୋଇ ପଡ଼ିଥିବା ବେଳେ କେତେକ ସ୍ଥାନରେ ଧାନ ପାଣିରେ ଭିଜି ଗଜା ହେବା ସହ ପଚିବାକୁ ଲାଗିଛି। ଏହାକୁ ନେଇ ଚାଷୀମାନେ ଆର୍ଥିକ କ୍ଷତିର ଆଶଙ୍କାରେ ଚିନ୍ତିତ ହୋଇପଡ଼ିଛନ୍ତି। ଚାଷୀଙ୍କ କହିବା ଅନୁଯାୟୀ, ବର୍ଷସାରା ପରିଶ୍ରମ ଓ ଅର୍ଥ ବ୍ୟୟ କରି ଫସଲ ଅମଳ ପାଇଁ ପ୍ରସ୍ତୁତ ହୋଇଥିବା ବେଳେ ବାତ୍ୟାର ପ୍ରଭାବ ସେମାନଙ୍କ ଆଶା ଉପରେ ପାଣି ଢାଳିଛି। ଏନେଇ ଚାଷୀମାନେ ପୂର୍ବରୁ ଗୋଲାମୁଣ୍ଡା ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ତଥାପି ଫସଲ କ୍ଷୟକ୍ଷତି ଆକଳନ ଓ ସହାୟତା ପ୍ରଦାନ ପ୍ରକ୍ରିୟାକୁ ନେଇ ଆଶାନୁରୂପ ପଦକ୍ଷେପ ଅପେକ୍ଷାରେ ଥିବା ଚାଷୀମାନେ ଆଜି ପୁନର୍ବାର ରାଜସ୍ୱ ନିରୀକ୍ଷକ (ଆର୍.ଆଇ.)ଙ୍କୁ ଲିଖିତ ଦାବିପତ୍ର ପ୍ରଦାନ କରିଛନ୍ତି।
ନକଟିକାନୀ ଗ୍ରାମର ଜିତେନ୍ଦ୍ର ସେନାପତି, ଦେବେନ୍ଦ୍ର ମାଝୀ, ଭଜନ ମାଝୀ, ଚନ୍ଦ୍ର ମାଝୀ ଓ ହେତୁରା ମାଝୀଙ୍କ ସମେତ ପ୍ରାୟ ୪୦ରୁ ୫୦ ଜଣ ଚାଷୀ ଏକତ୍ରିତ ହୋଇ ନିଜ ନିଜ ଚାଷ ଜମିର କ୍ଷୟକ୍ଷତି ସମ୍ପର୍କରେ ରାଜସ୍ୱ ବିଭାଗକୁ ଅବଗତ କରାଇଥିଲେ। ଚାଷୀମାନଙ୍କ ମୁଖ୍ୟ ଦାବି ହେଉଛି, ପ୍ରଶାସନ ପକ୍ଷରୁ ତୁରନ୍ତ କ୍ଷତିଗ୍ରସ୍ତ ଚାଷ ଜମିର କ୍ଷେତ୍ରସ୍ତରୀୟ ତଦନ୍ତ କରାଯାଉ। ଏଥିସହ କ୍ଷୟକ୍ଷତିର ପରିମାଣ ନିରପେକ୍ଷ ଭାବେ ଆକଳନ କରି ସରକାରୀ ନିୟମ ଓ ନିର୍ଦ୍ଧାରିତ ମାନଦଣ୍ଡ ଅନୁଯାୟୀ ଯୋଗ୍ୟ କ୍ଷତିଗ୍ରସ୍ତ ଚାଷୀଙ୍କୁ ଆର୍ଥିକ ସହାୟତା ଯୋଗାଇ ଦିଆଯାଉ । ଅମଳ ସମୟରେ ଫସଲ ନଷ୍ଟ ହେବା ଚାଷୀଙ୍କ ପାଇଁ ଗୁରୁତର ଆର୍ଥିକ ସମସ୍ୟା ସୃଷ୍ଟି କରିଛି। ତେଣୁ କେବଳ ଅଭିଯୋଗ ଗ୍ରହଣରେ ସୀମିତ ନରହି ପ୍ରଶାସନ ତ୍ୱରିତ ତଦନ୍ତ, କ୍ଷୟକ୍ଷତି ଆକଳନ ଓ ସହାୟତା ପ୍ରଦାନ ପ୍ରକ୍ରିୟାକୁ ଆଗେଇ ନେବା ଆବଶ୍ୟକ। ଏ ଦିଗରେ ପ୍ରଶାସନ କେବେ ପଦକ୍ଷେପ ନେଉଛି ଏବଂ କ୍ଷତିଗ୍ରସ୍ତ ଚାଷୀ କେବେ ସହାୟତା ପାଉଛନ୍ତି, ତାହା ଏବେ ଅଞ୍ଚଳର ଚାଷୀ ମହଲରେ ମୁଖ୍ୟ ପ୍ରଶ୍ନ ହୋଇଛି।
