କୋକସରା,୧୧/୬- (ମ ନି ସ ) କଳାହାଣ୍ଡି ଜିଲ୍ଲା କୋକସରା ଅଞ୍ଚଳରେ ଗତ କିଛି ଦିନ ହେବ ବୁଲା କୁକୁର ପଳ ଆତଙ୍କ ଖେଲାଇଛି । କୁକୁର ପଳ ହାବୁଡରେ ଯିଏ ପଡିଲା ମଣିଷ, ଛେଲି, ମେଣ୍ଢା ସେ ଆକ୍ରମଣର ଶିକାର ହେଉଛି । ଗତ ସୋମବାର ଦିନି ଏହି କୁକୁର ପଳ ଗମ୍ଭାରୀଗୁଡା ଅଞ୍ଚଳର ୨୦ ଟି ମେଣ୍ଢାକୁ ଆକ୍ରମଣ କରି ଝୁଣି ଖାଇଥିବା ବେଳେ ଶୁକ୍ରବାର ଅନୁରୁପ ଭାବରେ ବଙ୍ଗୋମୁଣ୍ଡା ପେଟ୍ରୋଲ ପମ୍ପ କେନାଲହୁଡା ରାସ୍ତାରେ ଚରୁଥିବା ଛେଲି କୁ ଆକ୍ରମଣ କରିଛି । କୁକୁର ପଳ ଆକ୍ରମଣରେ ଗୋଟିଏ ଛେଲି ମୃତ୍ୟୁ ହୋଇଥିବା ବେଳେ ୭ରୁ ଅଧିକ ଛେଲି ଆକ୍ରମଣର ଶିକାର ହୋଇ ଗୁରୁତର ହୋଇଛନ୍ତି । କୁକୁର ପଳ ଆକ୍ରମଣ କୁ ଦେଖି ଭୟରେ ଛେଲି ଜଗୁଆଲି ହେମନ୍ତ ମାଝି ସେଠାରେ ଅଚେତ ହୋଇ ପଡିଥିଲେ । ହେଲେ କୁକୁର ପଳ ତାଙ୍କୁ ଆକ୍ରମଣ କରି ନଥିବା ବେଳେ ରାସ୍ତାରେ ଯାତାୟତ କରୁଥିବା ଲୋକେ ଉଦ୍ଧାର କରି କୋକସରା ଡାକ୍ତରଖାନା କୁ ପଠାଥିଲେ । ସେଠାରେ ଦୀର୍ଘ ୪ ଘଣ୍ଟା ପରେ ଯୁବକ ହେମନ୍ତ ର ଚେତା ଫେରିଥିବା ଜଣାପଡିଛି । ପୂର୍ବରୁ ମଧ୍ୟ ବଙ୍ଗୋମୁଣ୍ଡା ଅଞ୍ଚଳରେ ଅନେକ ଥର ବୁଲା କୁକୁର ପଳ ଆକ୍ରମଣରେ ମଣିଷ, ଛେଲି, ମେଣ୍ଢା ଭଲି ଅନେକ ଜୀବ ଆକ୍ରମଣର ଶିକାର ହୋଇଥିବା ଗ୍ରାମବାସୀ ପ୍ରକାଶ କରିଛନ୍ତି । ଦିନକୁ ଦିନ ଅଞ୍ଚଳରେ ବୁଲା କୁକୁର ପଳ ଆତଙ୍କ ବଢିଥିବା ବେଳେ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି ।
