ଆମ ମାତୃଭାଷା
ବେଣୁଧର ସୂତାର
ଜାତି ଆଶା ଜାତି ଭାଷା ବଇଭବ
ମାତୃଭାଷା ପ୍ରୀତି ହୃଦେ ଜଗାଅ
ଜାତି ଜନତାର ସୁପ୍ତ ମାନସେ
ଲୁପ୍ତ ଅତୀତ କାହାଣୀ କୁହ ।
ବର୍ଣ୍ଣିଳ ବିଭାଷା ବଭତ୍ସ ଆଦର୍ଶେ
ଏ ଜାତି ହୋଇଛି ପଶ୍ଚାତ୍ୟ ମନା
ଜାଗ୍ରତ କରାଅ ଜନ ମନ ପ୍ରାଣେ
ମାତୃଭାଷା ପ୍ରୀତି ଉନ୍ମାଦନା ।
ସ୍ବଭାଷା ଜାତିର ଚାରୁ ହସ୍ତାକ୍ଷର
ଜାତି ଗୌରବର ପରିଭାଷା
ବିଶ୍ବ ଭ୍ରାତୃତ୍ବର ମୁଗ୍ଧ କଣ୍ଠସ୍ବର
ଦେଶ ପ୍ରଗତିର ଦୀପ୍ତ ଆଶା ।
ଭାଷାସଭ୍ୟତାର ଦିବ୍ୟ ଦିଗଦର୍ଶନ
ପ୍ରଜ୍ଞା ବିଭୂତିର ପୂର୍ଣ୍ଣ ଆଧାର
ଜାତି ଐଶ୍ବର୍ଯ୍ୟର ଲଳିତ ସ୍ତବକ
ଚାରୁ ଐତିହ୍ୟ ର ଫଲ୍ଗୁଧାର ।
ଜାତି ପ୍ରାଣବିନ୍ଦୁ ଭାଷାପ୍ରେମ ସିନ୍ଧୁ
ଉତ୍ତାଳ ଆହ୍ଲାଦ ଲହରି ମାଳେ
ଭଷାର ମମତା ଭାବ ବିମୁଗ୍ଧତା
ମୃଦୁଛନ୍ଦ ତୋଳେ ଏହୃଦ ତଳେ ।
ଭାଷା ସଂପ୍ରୀତିର ଲାବଣ୍ୟମଞ୍ଜରୀ
ଭଷା ସମ୍ପର୍କର ସେତୁବନ୍ଧ
ଭାଷାବିନା କହ କେ ଜାତି ଉନ୍ନତ
ଶିକ୍ଷାଦୀକ୍ଷା ବିନା ସେଜାତି ଅନ୍ଧ ।
ଭାଷା ଚାରୁଧାରା ପ୍ରଗତି ପସରା
ଭାଷା ଜାତିପ୍ରାଣ ସଞ୍ଜିବନୀ
ଭାଷାଜ୍ଞାନଜ୍ୟୋତି ସାମାଜିକପ୍ରୀତି
ପ୍ରଜ୍ଞା ଚେତନାର ପ୍ରତିଧ୍ବନି ।
ମାତୃଭୂମି ମାତୃ ଭାଷାର ପ୍ରଗତି
ହେଉ ଜୀବନର ଶ୍ରେଷ୍ଠ ସାଧନା
ଆସ ସର୍ବେମିଳି ମୁକ୍ତ କଣ୍ଠରେ
ଗାଇବା ଭାଷାର ପୂତ ବନ୍ଦନା ।
ମାଆ ମାଟି ଆଉ ମାତୃଭାଷା ପାଇଁ
ତ୍ୟାଗ ମନ୍ତ୍ରେ ସାଜି ପୁଣ୍ୟ ଦଧିଚି
ଜାଗ କ୍ରାନ୍ତିବୀର ଭଷାରସଂଗ୍ରାମେ
ମନରେ ନରଖି ପ୍ରଶ୍ନବାଚୀ ।
କେଶଦୁରାପାଳ
କେନ୍ଦୁଝର
