ସ୍ମୃତି

ନଳିନୀ ପ୍ରଭା ମିଶ୍ର

ସ୍ମୃତି ତୁମେ କେବେ ପାହାନ୍ତି ସପନ

   କେବେ ବସନ୍ତର ମଧୁ ଗୀତି

କେବେ ପୁଣି ତୁମେ ଉଦାସୀ ଜହ୍ନ ଟେ

  ଶୀତ ସକାଳ ର ହୁଅ ସାଥୀ।

ସ୍ମୃତି ତୁମେ କେବେ ନ ଈ ପଠା

   ଧାରେ ଶରତ ସଂଜ ର କାଶ ଫୁଲ

କେବେ ହୋଇଯାଅ ମନ ଅଗଣାରେ

  ପୂର୍ଣ୍ଣିମା ର ରାତି ଝଲମଲ।

କେବେ ବିଜନର ସାଥୀ ହୋଇ ଆସ

  ବିଗତ ଦିନର ରୂପ ନେଇ

ମନ ଆଇନାରେ ପ୍ରତିବିମ୍ବ ହୁଅ

  ହୃଦୟ ନିଭୃତ ଚହଲାଇ।

ସ୍ମୃତି ତୁମେ କେବେ ସହକାର ତଳ

   ପ୍ରଥମ ପ୍ରଣୟ ମିଳନର

କେବେ ହୋଇଯାଅ ସାଇତା ଚିଠିର

  ଭାବ ପୀରତି ର ଲେଖାକ୍ଷର।

ସ୍ମୃତି ତୁମେ କେବେ ଜୀବନ ଧାରାର

  ଅଙ୍ଗେ ନିଭା ଅନୁଭୂତି ନାନା

କେତେ ମିଠା,ତିକ୍ତ,ସ୍ଵାଦ ମୂହୁର୍ତ୍ତ ର

  ମନେ ଭରା ଗୀତ ସାରେଗାମା।

ତୁମେ ବହୁବିଧ ବିକଳ୍ପ ଚିନ୍ତାର

  ସାଉଁଟା ଅତୀତ ସମ୍ମୋହନ

ବଞ୍ଚିବା ର ରାହା ବର୍ତ୍ତମାନ ପାଇଁ

  ମଧୁର ମୂହୁର୍ତ୍ତ ବିଦ୍ୟମାନ।

ମୁକୁନ୍ଦ ପୁର, ଆସ୍କା, ଗଞ୍ଜାମ