ଦ୍ଵିତୀୟ ଇଶ୍ଵର
ଉପେନ୍ଦ୍ର କୁମାର ବସ୍ତିଆ
କବିର କଲମ କମାଣ ସମାନ
ଭାବର ପରଶ ମଣି
ଆକାଶ କଇଁଆ ଚିଲିକା ମାଛକୁ
ଯୋଡିଦିଏ କାବ୍ୟେ ଆଣି ।।
ସ୍ୱର୍ଗୀୟ ସୁଷମା ବିଛାଇ ଦିଅଇ
ଘାସ ଶେଯ ଗାଲିଚାରେ
କବି ତୁମେ ସ୍ରଷ୍ଟା ଚିର ବନ୍ଦନୀୟ
ତବ ସୃଷ୍ଟି ଦ୍ୱାରେ ଦ୍ୱାରେ ।।
ବିପ୍ଳବର ଅଗ୍ନି ଜଳାଇ ଦେଇଛ
ତୁମରି କଲମ ମୁନେ
ଶୁଣାଇଛ ତୁମେ ସମର ସଙ୍ଗୀତ
ଏ ଜାତିର କାନେକାନେ ।।
କବିର କଲମେ ଫିରିଙ୍ଗ ଫେରିଛି
ଚାବୁକ ପ୍ରହାର ଖାଇ
ଫୁଟିଛି ବନ୍ଧୁକ ଗୁଳି କଲମର
କବିତା ବାରୁଦ ହୋଇ ।।
କବି କାବ୍ୟ ବାଣୀ ଫୁଟାଏ ମେଦିନୀ
ଶ୍ରାବଣ ଆକାଶେ ଜ୍ୟୋସ୍ନା
ରୁଦ୍ର ବଇଶାଖେ ପଥିକର ଡାକେ
ଶୁଖିଲା ନଈରେ ବନ୍ୟା ।।
ମମତା କଲମେ ଆଙ୍କିଦିଏ କବି
ସମତାର ନବ ଛବି
ଖୋଲି ଦେଇପାରେ ତୃତୀୟ ନୟନ
ହେ ବିଶ୍ଵ ବିଜୟୀ କବି ।।
କବି ହିଁ ଅମର କବିତା ଅମର
ଶାନ୍ତିର କପୋତ ଟିଏ
ସାହିତ୍ୟ ସାଧନେ କାଳଜୟୀ ରୂପି
ଦ୍ଵିତୀୟ ଇଶ୍ଵର ସିଏ ।।
ରାଉରକେଲା
