ଲୀଳାମୟ କୃଷ୍ଣ

ଶ୍ରୀମତୀ ସ୍ନେହ ମିଶ୍ର 

ଅଷ୍ଟମୀ ତିଥିରେ ଅଷ୍ଟମ ଗର୍ଭରେ

ଧରାପୂଷ୍ଠେ ଅବତାର |

ଅଷ୍ଟାଙ୍ଗ ଯୋଗର ଅଷ୍ଟମ ଅବସ୍ଥା 

ତୁମେ ପ୍ରଭୁ ଯୋଗେଶ୍ଵର ||1||

ଭିନ୍ନ ଭକ୍ତି ଭାବେ ଅବତାର ବାଦେ

ଅଷ୍ଟମ ଟି ତୁମ ସ୍ଥାନ

ଅଷ୍ଟଧା ପ୍ରକୃତି ଅଷ୍ଟ ପାଟରାଣୀ

କରୁଛନ୍ତି ତୁମ ଧ୍ୟାନ ||2||

ଦୈବୀ ଗୁଣକୁ ଆଶ୍ରୟ କରି

ବ୍ରହ୍ମଜ୍ଞାନ ପ୍ରକଟିତ |

ସଂସାର ସିଙ୍କୁଳି ଫିଟିଯାଏ ସବୁ

ଯମୁନାରେ ଭକ୍ତି ସ୍ରୋତ ||3||

ସୃଷ୍ଟି ସ୍ଥିତି ଲୟ ତୁମରି ତ ଖେଳ

ସବୁରି ଭିତରେ ତୁମେ |

ଅଭେଦ ଦର୍ଶନେ ଭେଦଭାବ ନାହିଁ

କେବଳ ତୁମେ ହିଁ ତୁମେ ||4||

ସଂସାର ରୂପକ ଅଶ୍ଵତ୍ଥ ବୃକ୍ଷର

ତୁମେ ମୂଳ ଅଗୋଚର |

ତୁମରି ସତ୍ତାରେ ମିଥ୍ୟା ସଂସାରଟି

ସତ୍ୟସଦୃଶ ଗୋଚର |5||

ସମ ଭାବାପନ୍ନ ସର୍ବପ୍ରାଣୀମଧ୍ୟେ

କୃପାଦୃଷ୍ଟି ପ୍ରଦାୟକ |

ସାଧୁସନ୍ଥ ପାଇଁ ଆନନ୍ଦର ଜ୍ୟୋତି

ଖଳ ଦୁଷ୍ଟ ସଂହାରକ ||6||

ଆହେ ମାୟାପତି ଦେବତା ଦାନବ

ତୁମରି ମାୟାର ସୃଷ୍ଟି |

କର୍ତ୍ତାପଣର ଅହଙ୍କାର ହେତୁ 

କର୍ମଫଳ ଭୋଗୁଥାନ୍ତି ||7||

ଯୁଗେ ଯୁଗେ ତୁମେ ଅବତାର ଧରି

ଲୀଳା କରୁଅଛ ପ୍ରଭୁ |

ତୁମ୍ଭ ଗୁଣଗାନ ଭକ୍ତିଭାବେ ଗାଇ

ତରୁଚନ୍ତି ଭବର୍ଣବୁ ||8||