ଶୁଣ ସରକାର !
କ’ଣ ବା କହିବି ସରକାର ତୁମ
ଓଡ଼ିଶା ଶାସନ ନୀତି !
ଅସହ୍ୟ ହେଉଛି ଦେଖି ଶୁଣି ତୁମ
ପୂର୍ବାଞ୍ଚଳ ପ୍ରିୟା-ପ୍ରୀତି l *(୧)*
ଉଚ୍ଚ ନ୍ୟାୟାଳୟ କଟକେ ରଖିଲ
ସବୁ ଓଡ଼ିଆଙ୍କ ପାଇଁ,
ଅଭାବେ ଥାଇ ବି ନ୍ୟାୟ ପାଇଁ ଲୋକେ
ଆସନ୍ତି ଏଠାକୁ ଧାଇଁ l *(୨)*
କୋରାପୁଟ କଳାହାଣ୍ଡି ବଲାଙ୍ଗୀର
ବଉଦ ସମ୍ବଲପୁର,
କଟକ ନଗରୁ ଏ ସବୁ ସହର
ଶହ ଶହ କୋଶ ଦୂର l *(୩)*
ପଶ୍ଚିମ ଓଡ଼ିଶା ଲୋକଙ୍କ ଦୁର୍ଦ୍ଦଶା
ନ କହିବା ଏଠି ଭଲ,
ନ୍ୟାୟ ପାଇଁ କଟକକୁ ଧାଇଁ-ଧାଇଁ
ହେଉଛନ୍ତି କଲବଲ l *(୪)*
କେବିକେର ଉନ୍ନୟନ ପରିଷଦ
ଗଢ଼ି ଦେଲ ଓଡ଼ିଶାରେ,
କିନ୍ତୁ ମୁଖ୍ୟାଳୟ ରଖିଲ ଆଣିକି
ରାଜଧାନୀ ଇଲାକାରେ l *(୫)*
ଚାକିରିଆ ଅବା ଦିନ ମଜୁରିଆ
ହେଉ ବା ଶ୍ରମିକ ଚାଷୀ,
ନ୍ୟାୟ ପାଇଁ ଲଢ଼େ ପଶ୍ଚିମାଞ୍ଚଳରୁ
କଟକ ନଗରେ ଆସି l *(୬)*
ପଶ୍ଚିମାଞ୍ଚଳରେ ହାଇକୋର୍ଟ ବେଞ୍ଚ୍
ସ୍ଥାପନ କରିବା ପାଇଁ,
କହି କହି ଲୋକେ ଥକି ସାରିଲେଣି
ଧୈର୍ଯ୍ୟ ଆଉ ତାଙ୍କ ନାହିଁ l *(୭)*
ଦୀର୍ଘଦିନ ଧରି ସ୍ଥାୟୀ ବେଞ୍ଚ୍ ପାଇଁ
ଲୋକେ କରୁଛନ୍ତି ଦାବି,
କିନ୍ତୁ ଦୁଃଖ ଲାଗେ ତୁମ ତାଙ୍କ ପ୍ରତି
ଅଣଦେଖା କଥା ଭାବି l *(୮)*
ଆମ ଦେଶେ ହାଇକୋର୍ଟ ବେଞ୍ଚ୍ ହେବା
କିଛି ନୂଆ କଥା ନୁହଁ,
ଏ ବିଷୟେ ସବୁ ଜାଣି ବି ଛାମୁ ହେ
ଚୁପ୍ ଆଜି ତୁମ ମୁହଁ ! *(୯)*
ଓଡ଼ିଶା ବାହାରେ ବିଭିନ୍ନ ପ୍ରଦେଶେ
ବିଭିନ୍ନ ସହରେ ଜାଣ,
ସ୍ଥାପନ ହୋଇଛି ହାଇକୋର୍ଟ ର ସେ
କେତେ ସ୍ଥାୟୀ ବେଞ୍ଚ୍ ମାନ l *(୧୦)*
ଜବଲ୍ପୁର ଏବଂ ଲକ୍ଷ୍ନୌ ସହରେ
ମଦୁରାଇ ନାଗପୁରେ,
ସହଜେ ସୁଲଭେ ନ୍ୟାୟ ପାଉଛନ୍ତି
ଥାଇ ଲୋକେ ବହୁ ଦୂରେ l *(୧୧)*
ଆଜି ବି କୋର୍ଟରେ ଲକ୍ଷ-ଲକ୍ଷ କେସ୍
ରହିଛି ବିଚାରାଧୀନ,
ବାକି କେସ୍ ପାଇଁ ଗଡ଼ୁଛି ସମୟ
ଗଡ଼ୁଛି ତାରିଖ ଦିନ l *(୧୨)*
କ’ଣ ପାଇଁ ଗୋଟେ ଲୋକ ଏତେ ବାଟ
ଆସିବ ବା ନ୍ୟାୟ ପାଇଁ !
ପକ୍ଷପାତଭରା ତୁମରି ନୀତିରେ
ତା’ ଭାଗ୍ୟେ ବା ନ୍ୟାୟ କାହିଁ ! *(୧୩)*
ଖାଇବା-ରହିବା ଖର୍ଚ୍ଚ ସାଥେ ପୁଣି
ଅର୍ଥହାନୀ-ପ୍ରାଣପୀଡ଼ା,
ଗରୀବ ଭୋଗେ ତା’ ମୁଣ୍ଡ ପରେ ବୋଝ
ଉପରେ ନଳିତା ବିଡ଼ା l *(୧୪)*
ଯାଇ-ଆସି ସିଏ ସବୁ ହରାଏ ତା’
ଝାଳବୁହା ଧନରାଶି,
ନ୍ୟାୟ ଅପେକ୍ଷାରେ ରହି ରହି ତା’ର
କୁଳ ଯାଏ ମୂଳୁ ଭାସି l *(୧୫)*
ଲୋକଟି ତ ପୁଣି କଟକକୁ ଆଉ
ବୁଲିବାକୁ ଆସୁ ନାହିଁ,
ପାଏ ସେ ଅଯଥା ନାନା ଦୁଃଖକଷ୍ଟ
ତୁମରି ଅନ୍ୟାୟ ପାଇଁ l *(୧୬)*
ଅଳ୍ପ କେତେଜଣ ବ୍ୟବସାୟ ଖୋର
ସ୍ୱାର୍ଥୀ ଓକିଲଙ୍କ ପାଇଁ,
ପଶ୍ଚିମାଞ୍ଚଳର ନିରୀହ ଜନତା
ହନ୍ତସନ୍ତ ହେବେ କାହିଁ ? *(୧୭)*
ଆଉ କେତେ ବର୍ଷ ଏମିତି ଅନ୍ୟାୟ
ତୁମ ରାଜ୍ୟେ ହେଉଥିବ ?
ବିଲୁଆ ନାଟକୁ କେତେ ଦିନ ଯାଏଁ
ଏ ପ୍ରଶ୍ରୟ ଦେଉଥିବ ? *(୧୮)*
ଗୋଟେ ପରେ ଗୋଟେ ଏଭଳି ଅନ୍ୟାୟ
ଚାଲିଲେ ତୁମ ଅଧୀନେ,
ଏ ପଶ୍ଚିମାଞ୍ଚଳ ଓଡ଼ିଶା ମାଟିରୁ
ବିଚ୍ଛିନ୍ନ ହୋଇବ ଦିନେ l *(୧୯)*
ତେଣୁ ସରକାର ପ୍ରିୟା-ପ୍ରୀତି ଛାଡ଼ି
ମନ ବଦଳାଅ ଆଜି,
ସର୍ବାଞ୍ଚଳ ପ୍ରତି ସମଭାବ ରଖ
ନିଜେ ହିଁ ନାୟକ ସାଜି l *(୨୦)*
କବି : ରାଧାମୋହନ ପୂଜାହାରୀ
ବୀରମହାରାଜପୁର (ସୁବର୍ଣ୍ଣପୁର)
