ବାଲେଶ୍ଵର,୨୬/୯/୨୨- ଆବାସ ଯୋଜନା ଗୃହ କାହାପାଇଁ ? ଗରିବ ନା ଧନୀ, ସବଳ ନା ଦୁର୍ବଳ, ଅସହାୟ, ନିରାଶ୍ରୟ, ଭିନ୍ନକ୍ଷମ, ବିକଳାଙ୍ଗ ନା ବିଧବା ? ସରକାର ଆବାସ ଯୋଜନା ମାଧ୍ୟମରେ ଗରିବ ମାନଙ୍କୁ ଗୃହ ଯୋଗାଇ ଦେଉଛନ୍ତି । ହେଲେ ପ୍ରକୃତ ହିତାଧିକାରୀ ଗୃହ ପାଇବାରୁ ହେଉଛନ୍ତି ବଞ୍ଚିତ । ଏପରି ଏକ ଘଟଣା ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ଖଇରା ବ୍ଲକ ବର୍ତ୍ତନା ପଞ୍ଚାୟତ ଧଳିଗଡିଆ ଗ୍ରାମରେ । ସ୍ବାମୀ ଗୌତମ ରାଉତଙ୍କ ମୃତ୍ୟୁ ପରେ ସ୍ତ୍ରୀ ତିଳୋତ୍ତମା ରାଉତ ଅସହାୟ ହୋଇ ପଡିଲେ । ଇତ୍ଯବସରେ ଶ୍ବଶୁର ଗୟାଧର ରାଉତ ଘରୁ ବାହାର କରିଦେଲେ । ବର୍ତ୍ତମାନ ଗ୍ରାମର ଅନ୍ୟ ଜଣଙ୍କ ଘରେ ୨/୩ ବର୍ଷ ହେବ ଦୁଇ ପୁଅକୁ ନେଇ ଦୁଃଖରେ ଦିନ କାଟୁଛନ୍ତ ତିଳୋତ୍ତମା । ସ୍ଥାନୀୟ ଭଦ୍ର ବ୍ଯକ୍ତିଙ୍କ ଦ୍ବାରା ସମାଧାନ ପରେ ଘର କରିବା ପାଇଁ ଜାଗା ଓ ଜମି ମିଳିଛି ଶ୍ବଶୁରଙ୍କ ଠାରୁ । ସରକାର ବିଧବା ଭତ୍ତା ଦେଉଛନ୍ତି ହେଲେ ଘର ଖଣ୍ଡେ ପାଇଁ ଦୌଡ଼ି ଦୌଡ଼ି ନିରାଶ ହେବା ପରେ ଖଇରା ବ୍ଲକ ପରିସରରେ ଅନୁଷ୍ଠିତ ମିଳିତ ଜନଶୁଣାଣୀ ଶିବିରରେ ଜିଲ୍ଲାପାଳଙ୍କ ନିକଟରେ କରିଛନ୍ତି ଅଭିଯୋଗ । 
ଏଠାରେ ସୂଚନାଯୋଗ୍ୟ ଯେ ଘର ଖଣ୍ଡେ ପାଇଁ ପଞ୍ଚାୟତ ଠାରୁ ପୂର୍ବତନ ମନ୍ତ୍ରୀ ତଥା ବର୍ତ୍ତମାନର ବିଧାୟକ ଜ୍ଯୋତିପ୍ରକାଶ ପାଣିଗ୍ରାହୀ ପର୍ଯ୍ୟନ୍ତ ଗୁହାରୀ କରିଥିଲେ ମଧ୍ୟ ସମସ୍ତଙ୍କ ଠାରୁ ହୋଇଛନ୍ତି ନିରାଶ । ସେଥିପାଇଁ ଏଠାରେ ପ୍ରଶ୍ନ ଉଠେ ! ଆବାସ ଯୋଜନା ଗୃହ କାହାପାଇଁ ? ପ୍ରକୃତ ହିତାଧିକାରୀ ବଞ୍ଚିତ କାହିଁକି ? ଅସହାୟ ବିଧବା ତିଳୋତ୍ତମାକୁ କେବେ ମିଳିବ ଘର ? ଉପଯୁକ୍ତ ତଦନ୍ତ କରି ଘରଖଣ୍ଡେ ଦେବାପାଇଁ ପ୍ରଶାସନ ପାଖରେ ଦାବି ଜଣାଇଛନ୍ତି ଆବେଦନକାରିଣୀ । ଉକ୍ତ ବ୍ଲକରେ ଅନେକ ସବଳ ବ୍ଯକ୍ତି ଆବାସ ଯୋଜନାରେ ଘର ପାଇଥିବାର ନଜିର ଅଛି । କିନ୍ତୁ ଏଭଳି ଜଣେ ଅସହାୟ, ନିରୀହା ଓ ବିଧବା ମହିଳାଙ୍କୁ ଘର ଖଣ୍ଡେ ନ ମିଳିବାର କାରଣ କ’ଣ ? ଉତ୍ତର ଖୋଜୁଛନ୍ତି ତିଳୋତ୍ତମା ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
