କବିତା ମାଧୁରୀ
ବେଣୁଧର ସୂତାର
ତୁମେ ନିଃଶବ୍ଦର ଶବ୍ଦମୟ ସୁର
କବି ହୃଦ ଅନ୍ତଃସ୍ବର
ଭାବ ମୂର୍ଛନାର ମହକ ମଧୁର
ପ୍ରାଣସ୍ପର୍ଶୀ ଇସ୍ତାହାର
କେତେ କଳ୍ପ କଳ୍ପାନ୍ତର
ସାରସ୍ବତ ଧନ ଦିବ୍ୟ ଜ୍ଞାନାଞ୍ଜନ
ରସମୟ ସୁଧାଧାର । ୦।
ପ୍ରଣବ ସ୍ବରୂପା ତୁମେ ବିଶ୍ବରୂପା
ଶବ୍ଦବ୍ରହ୍ମ ସମାହାର
ଭଷା ପୀୟୂଷର ଭାବ ପ୍ରାଚୁର୍ଯ୍ୟର
ପ୍ରଜ୍ଞାମୟ ଉପହାର
ଚିରନ୍ତନୀ ଚାରୁସୁର
ମୁଗ୍ଧ ଆବେଗର ତନ୍ମୟ ଝଙ୍କାର
ଭାବମୟ ପାରାବାର
ରସମୟ ସୁଧାଧାର ।୧।
ତୁମେ ଚେତନାର ଐଶ୍ୱର୍ଯ୍ୟସମ୍ଭାର
ଭାବର ଅମୃତ ଝର
କବି ସୃଜନର ମନୋଜ୍ଞ ଅର୍ଘ୍ୟର
ରମଣୀୟ ରୂପସାର
ସାରସ୍ବତ ରତ୍ନହାର
ଚାରୁ ଅଳଙ୍କାର ବାଣୀ ବିପଣିର
ତୁମେ ଚିର ମନୋହର
ରସମୟ ସୁଧାଧାର ।୨।
ତୁମେତ ଜ୍ଞାନର ବିପୁଳ ସାଗର
ସପ୍ତରଙ୍ଗ ସପ୍ତ ସୁର
କୋଟି ହୃଦୟର ଭାବ ତରଙ୍ଗର
ଅଳକାନନ୍ଦାର ଧାର
ସୁଧାସ୍ନାତ କଳେବର
କବି ତ ତୁମର ରୂପ ସୁଷମାର
ନୈସର୍ଗିକ ରୂପକାର
ରସମୟ ସୁଧାଧାର ।୩।
କେଣଦୁରାପାଳ କେନ୍ଦୁଝର