ଜୟ ମାଁ ବିଜୟା

ଶରତ ଋତୁରେ ଶାରଦୀୟ ପୀଠେ

     ଆବିର୍ଭୂତ ମାତା ଆର୍ଯ୍ୟା,

ଆହେ!ମହାମାୟୀ କଲ୍ୟାଣ ପ୍ରଦାୟୀ

     ଶାମ୍ଭବୀ ମାତା ବିଜୟା l(୧)

 ଶକ୍ତିସ୍ଵରୂପିଣୀ ମାତା ତ୍ରି-ନୟନୀ

       ଅଷ୍ଟଭୁଜା ରତ୍ନପ୍ରିୟା,

ନବରୂପମୟୀ ଭବାନୀ-ମୃଣ୍ମୟୀ

   ତୁମେ ମାତା ଶିବପ୍ରିୟା l(୨)

ହେ!ମାଁ ନାରାୟଣୀ ସୁଦୟା କାରିଣୀ

        ମହିଷାସୁର ମର୍ଦ୍ଦିନୀ,

  ଶୁମ୍ଭ-ନିଶୁମ୍ଭ ଚଣ୍ଡ-ମୁଣ୍ଡ ତାରିଣୀ

      ନମୋ ଦୁର୍ଗମ ନାଶିନୀ l(୩)

 ମଧୁ-କୈତବର ରକତବୀଜର

     ନାଶି ରଖିଲ ସଂସାର,

ଶକ୍ତିପ୍ରଦାୟିନୀ କଲ୍ୟାଣକାରିଣୀ

     ପ୍ରାଣଦାୟୀ ଏ ବିଶ୍ଵର l(୪)

ମନ୍ଦାରହାରରେ କର୍ପୂର ବାସରେ

      ଅଷ୍ଟ ଜାତି ଫୁଲ-ଫଳ,

ଶୁଦ୍ଧଚିତ୍ତେ ଷୋଳ-ଶୃଙ୍ଗାର ଯାଚିଲେ

    ଦିଅ ହେ ମାତା ସୁଫଳ l(୫)

 ନାନା ରୂପେ ମାତା ହୁଅ ଗୋ ପୂଜିତା

     କର ହେ ! ଏତେ ସୁଦୟା,

 ଶୁଣ ଭକ୍ତିସ୍ଵର ବିଶ୍ଵ ରକ୍ଷାକର

   ଜୟ *ଜୟ ମାଁ ବିଜୟା* l(୬)

    

 

 ପ୍ରିୟଦର୍ଶିନୀ ମିଶ୍ର 

ଜୁନାଗଡ଼ (କଳାହାଣ୍ଡି)

ଜନ୍ମଭୂମି:- ମଣ୍ଡଳ (ବଲାଙ୍ଗୀର)