ପାପଡାହାଣ୍ଡି,18/10, ମ ନି ସ — ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକକୁ ପୁଣି ଫେରିଛି ଝାଡାବାନ୍ତି | ଗତ ଅଗଷ୍ଟ ମାସରେ ତୁଳସି ପଦର ଓ ଗତ ସପ୍ତାହ ରେ ସୋରିଷ ପଦରରେ ଝାଡା ବାନ୍ତି ଦେଖା ଦେଇଥିଲା | ବର୍ତମାନ ବ୍ଲକର ମାଝୀଗୁଡା ପଂଚାୟତ ଖଡ଼କା ପଦର ଗ୍ରାମରେ ଝାଡାବାନ୍ତି ବ୍ୟାପିଛି | ଝାଡା ବାନ୍ତି ବ୍ୟାପିବାର ପ୍ରକୃତ କାରଣ ଜଣା ପଡ଼ିନାହିଁ | ଗତ 4 ଦିନ ମଧ୍ୟରେ ଆକ୍ରାନ୍ତଙ୍କ ସଂଖ୍ୟା 8କୁ ବୃଦ୍ଧି ହୋଇଛି | 
ମଙ୍ଗଳବାର 3 ଜଣ ସାଇବ ଯାନୀ 3, ମସୃ ଯାନୀ 50 ଓ ଶୁକ୍ରୀ ଯାନୀ 60 ଆକ୍ରାନ୍ତ ହୋଇ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତି ହୋଇଛନ୍ତି | ଏ ମାନଙ୍କୁ ବିଳମ୍ବିତ ରାତ୍ରରୁ ଝାଡା ହେଉଥିଲା | ଅବସ୍ଥା ଗୁରୁତର ହେବାରୁ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇ ଚିକିତ୍ସା କରାଯାଉଛି | ରବିବାର ହାରାବତୀ ଯାନୀ ଓ ଦେଶୀ ଯାନୀ ଆକ୍ରାନ୍ତ ହୋଇ ନବରଙ୍ଗପୁର ସ୍ଥାନାନ୍ତର ହୋଇଛନ୍ତି | ସୋମବାର ଜୟରାମ ଯାନୀ ଆକ୍ରାନ୍ତ ହୋଇ ପ୍ରଥମେ ପାପଡାହାଣ୍ଡି ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର ହୋଇଛନ୍ତି | 
ସେହିପରି ବାଲମତି ଯାନୀ ପ୍ରଥମେ ଆକ୍ରାନ୍ତ ହୋଇ ମେଡିକାଲରେ ଚିକିତ୍ସିତ ହୋଇ ଘରକୁ ଫେରିଛନ୍ତି | ସେହିପରି ଜୟସିଂ ଯାନୀ ଗ୍ରାମରେ ଆକ୍ରାନ୍ତ ହୋଇ ରହିଛନ୍ତି | ତେବେ ବିଷାକ୍ତ ଛତୁ ଖାଇ ଝାଡା ବାନ୍ତି ହୋଇଥିବା ସନ୍ଦେହ କରାଯାଉଛି | ଖବର ଲେଖା ଶେଷ ସୁଦ୍ଧା ଝାଡା ବାନ୍ତିକୁ ନେଇ ଲୋକେ ଭୟ ଭିତ ଅଛନ୍ତି | ସଚେତନତା ଅଭାବରୁ ଝାଡା ବାନ୍ତି ବୃଦ୍ଧି ହେଉଥିବା ଜଣାପଡ଼ିଛି |ଖବର ପାଇ ମେଡିକାଲ ଟିମ ଗ୍ରାମରେ ପହଂଚି ନଳକୂପ ପାଣିର ନମୁନା ସଂଗ୍ରହ କରିଛନ୍ତି | ବିଭିନ୍ନ ସ୍ଥାନରେ ବ୍ଲିଚିଙ୍ଗ ଛିଞ୍ଚନ କରିଛନ୍ତି |
ପାପଡାହାଣ୍ଡି ରୁ ସ୍ବପ୍ନଜିତ ପଟନାୟକ ଙ୍କ ରିପୋର୍ଟ
