ବାଲେଶ୍ଵର,୨୭/୦୧/୨୩- ବାଲେଶ୍ଵର ଜିଲ୍ଲା ଖଇରା ବ୍ଲକ ପଳସା ପଞ୍ଚାୟତ ପଳସା ଉଚ୍ଚ ମାଧ୍ୟମିକ ବିଦ୍ୟାଳୟ ଓ ସରକାରୀ ପ୍ରାଥମିକ ବିଦ୍ୟାଳୟ,ପଳସାର ବାର୍ଷିକ ଉତ୍ସବ ଅନୁଷ୍ଠିତ ହୋଇଯାଇଛି । ସଭାପତି ପ୍ରଫୁଲ୍ଲ କୁମାର ଦାଶଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବେ ଅତିରିକ୍ତ ଜିଲ୍ଲା ଶିକ୍ଷାଧିକାରୀ ଧରଣୀଧର ପାତ୍ର ଯୋଗ ଦେଇଥିବା ବେଳେ ମୁଖ୍ୟବକ୍ତା ଭାବେ ଇ. ସୁରେଶ ଚନ୍ଦ୍ର ବେହେରା ଯୋଗ ଦେଇଥିଲେ ।
ସେହିପରି ସମ୍ମାନିତ ବକ୍ତା ଭାବେ ବିଇଓ ଗୋଲୋକ ବିହାରୀ ପାଢ଼ୀ ଯୋଗ ଦେଇଥିଲେ । ସମ୍ମାନିତ ଅତିଥି ଭାବେ ଏବିଇଓ ଶ୍ରୀଧର ବେହେରା, ଗୌରାଙ୍ଗ ଚରଣ ମହାପାତ୍ର, ହେମନ୍ତ ମିଶ୍ର ଓ ପ୍ରାକ୍ତନ ଏବିଇଓ ସୁଦର୍ଶନ ରାଉତ, ସାହିତ୍ୟିକ ଶତୃଘ୍ନ ଦାସ, ଶିକ୍ଷକ ପରେଶ ଦକ୍ଷିଣରାୟଙ୍କ ସମେତ ଅନ୍ୟ ଅତିଥିମାନେ ମଞ୍ଚାସୀନ ଥିଲେ । ବିଦ୍ୟାଳୟର ଛାତ୍ରୀମାନେ ଜାତୀୟ ସଂଗୀତ ପରିବେଷଣ କରିଥିଲେ । ଏହି ଅବସରରେ ବିଦ୍ୟାଳୟର ପ୍ରଧାନ ଶିକ୍ଷକ ମାନସ କୁମାର ବାରିକଙ୍କ ସ୍ବରଚିତ ପୁସ୍ତକ ” କବିତା କୁସୁମ ” ଓ ” ଶୋଭାମୟୀ ସିଙ୍ଗାପୁର ” ମଞ୍ଚାସୀନ ଅତିଥି ମାନଙ୍କ ଦ୍ବାରା ଉନ୍ମୋଚିତ ହୋଇଥିଲା । 
ପରେ ପରେ ମୁଖ୍ୟ ଅତିଥି ଶ୍ରୀ ପାତ୍ରଙ୍କ କାଳଜୟୀ ସାହିତ୍ୟ ରଚନା ସମ୍ବନ୍ଧୀୟ ବକ୍ତବ୍ୟ ସମସ୍ତଙ୍କୁ ବିମୁଗ୍ଧ କରିଥିଲା । ସମ୍ମାନିତ ବକ୍ତା ବିଇଓ ଶ୍ରୀ ପାଢୀ ସ୍ବଳ୍ପରେ ବହୁ ମାର୍ମିକ ଓ ଶିକ୍ଷଣୀୟ ବକ୍ତବ୍ୟ ପ୍ରଦାନ କରିଥିଲେ । ପରେ ଅନ୍ୟ ଅତିଥିମାନେ ନିଜ ନିଜର ସୁଚିନ୍ତିତ ବକ୍ତବ୍ୟ ପ୍ରଦାନ କରିଥିଲେ । ପ୍ରଧାନ ଶିକ୍ଷକ ଶ୍ରୀ ବାରିକଙ୍କ ଶିକ୍ଷକତା ସହିତ ସାହିତ୍ୟ ପ୍ରତିଭାକୁ ବକ୍ତବ୍ୟ ମାଧ୍ୟମରେ ବହୁ ପ୍ରଶଂସା କରିଥିଲେ ମଞ୍ଚାସୀନ ଅତିଥିମାନେ । ସଭା ଶେଷରେ ଅତିଥି ମାନଙ୍କ ଦ୍ବାରା ବିଭିନ୍ନ ପ୍ରତିଯୋଗିତାରେ କୃତିତ୍ୱ ଅର୍ଜନ କରିଥିବା ଛାତ୍ରଛାତ୍ରୀ ମାନଙ୍କୁ ପୁରସ୍କାର ବିତରଣ କରାଯାଇଥିଲା । 
ଉଭୟ ବିଦ୍ୟାଳୟର ପ୍ରଧାନ ଶିକ୍ଷକ ଦ୍ବୟଙ୍କ ମିଳିତ ସହଯୋଗରେ ଅନୁଷ୍ଠିତ ବାର୍ଷିକ ଉତ୍ସବ କାର୍ଯ୍ୟକ୍ରମକୁ ଅତିଥି ଓ ସମ୍ପୃକ୍ତ ଅଞ୍ଚଳବାସୀ ବହୁ ପ୍ରଶଂସା କରିଛନ୍ତି । ଉଭୟ ବିଦ୍ୟାଳୟର ବାର୍ଷିକ ଉତ୍ସବ କାର୍ଯ୍ୟକ୍ରମକୁ ଆରମ୍ଭରୁ ଶେଷ ପର୍ଯ୍ୟନ୍ତ ପ୍ରଧାନ ଶିକ୍ଷକ ଶ୍ରୀ ଜେନା ପରିଚାଳନା କରିଥିଲେ । ବିଭିନ୍ନ ବିଦ୍ୟାଳୟରୁ ଆସିଥିବା ଶିକ୍ଷକ ବନ୍ଧୁ ମାନଙ୍କର ଉପସ୍ଥିତ ଓ ସହଯୋଗ କାର୍ଯ୍ୟକ୍ରମକୁ ସରସ ସୁନ୍ଦର କରିଥିଲା । ଏଥିରେ ପିଲାମାନଙ୍କ ଅଭିଭାବକ, ବିଦ୍ୟାଳୟ ପରିଚାଳନା କମିଟି ଓ ଗ୍ରାମବାସୀ ମାନେ ଉପସ୍ଥିତ ରହି ଶାନ୍ତି ଶୃଙ୍ଖଳାର ସହିତ କାର୍ଯ୍ୟକ୍ରମ ଶେଷ ହେବାରେ ବିଦ୍ୟାଳୟକୁ ସହଯୋଗ କରିଥିଲେ । ମଞ୍ଚ ଆହ୍ୱାନ କରିଥିଲେ ଶଶିକାନ୍ତ ଦାସ । ଧନ୍ୟବାଦ ପରେ ସଭାପତି ସଭା ସାଙ୍ଗ କରିଥିଲେ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
