ଜଗତପୁର,୦୭/୦୭: ଜଗତପୁର ସ୍ଥିତ କେନ୍ଦ୍ରାପଡା କେନାଲ ବନ୍ଧ ପାର୍ଶ୍ୱ ଏକ ହୋଟେଲ ମଧ୍ୟରୁ ଜଣେ ବ୍ୟକ୍ତିଙ୍କ ମୃତଦେହ ଜଗତପୁର ପୁଲିସ ଉଦ୍ଧାର କରିଛି | ମୃତକ ଜଣକ ହେଉଛନ୍ତି ମଙ୍ଗଳାବାଗରେ ରହୁଥିବା ପୁରୀ ଜିଲ୍ଲା ନୂଆହାଟ ଥାନା ଅନ୍ତର୍ଗତ ଗୋପୀନାଥପୁରର ସମ୍ପଦ କୁମାର ସାହୁ(୪୨)| ସୂଚନାମୁତାବକ ସମ୍ପଦ ମଙ୍ଗଳାବାଗରେ ପରିବାରଙ୍କ ସହିତ ରହି ଔଷଧ ବ୍ୟବସାୟ କରୁଥିଲେ | ବ୍ୟବସାୟ କରିବା ନିମନ୍ତେ ସେ ବିଭିନ୍ନ ସ୍ଥାନରୁ କରଜ ଆଣିଥିଲେ | ବ୍ୟବସାୟ ଭଲ ନଚାଲିବା ଫଳରେ ସେ କରଜ ସୁଝିବା ନେଇ ମାନସିକ ଦୁଶ୍ଚିନ୍ତାରେ ରହୁଥିଲେ | ଗତ କାଲି ଗୁରୁବାର ରାତ୍ରୀରେ ସମ୍ପଦ ଜଗତପୁର ସ୍ଥିତ ଆର୍ଡିଶ ହୋଟେଲରେ ରୁମ୍ ଭଡା ନେଇ ରହିଥିଲେ | ବିଳମ୍ବିତ ରାତ୍ରିରେ ସମ୍ପଦ ରହିଥିବା ହୋଟେଲ ରୁମ୍ ଭିତରେ ଥିବା ଫ୍ୟାନରେ ପ୍ଲାଷ୍ଟିକ ରାଶି ଲଗାଇ ଆତ୍ମହତ୍ୟା କରିଥିବା ନେଇ ହୋଟେଲ ପକ୍ଷରୁ ଜଗତପୁର ପୁଲିସକୁ ସୂଚନା ଦିଆଯାଇଥିଲା | ଖବର ପାଇ ଜଗତପୁର ପୁଲିସ ମୃତଦେହ ଜବତ କରି ସାବିତ୍ରୀ ସ୍ୱେଛାସେବୀ ଅନୁଷ୍ଠାନ ସହାୟତାରେ ଶବ ବ୍ୟବଛେଦ ନିମନ୍ତେ କଟକ ବଡ ମେଡିକାଲକୁ ପଠାଇବା ସହିତ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଥିବା ଜଣାପଡିଛି | ପୁଲିସ ମୃତ ଦେହ ନିକଟରୁ ଏକ ସୁଇସାଇଡ ନୋଟ ଜବତ କରିଛି |
କଟକ ରୁ ସୁକାନ୍ତ ମହାପାତ୍ର ଙ୍କ ରିପୋର୍ଟ
