କୌଶିକ ବାବା +୩ ମହାବିଦ୍ୟାଳୟରେ ଅ’ ଅଭିଯାନ କାର୍ଯ୍ୟକ୍ରମ
କର୍ଲାମୁଣ୍ଡା: ଅ’ ସାହିତ୍ୟ ଓ ସାଂସ୍କୃତିକ ଅନୁଷ୍ଠାନ ତରଫରୁ ନୂଆ ଶବ୍ଦ, ନୂଆ କଲମର ଅନ୍ୱେଷଣରେ ସାହିତ୍ୟ ଭିତ୍ତିକ କାର୍ଯ୍ୟକ୍ରମ ଅ’ ଅଭିଯାନ ଓ ପେଞ୍ଜୋରାଣୀ ପତ୍ରିକା ଉନ୍ମୋଚନ ତେରେସିଂହା ସ୍ଥିତ କୌଶିକ ବାବା ଡିଗ୍ରୀ ମହାବିଦ୍ୟାଳୟରେ ଆୟୋଜିତ ହୋଇ ଯାଇଛି । ଉକ୍ତ ସାରସ୍ୱତ ପ୍ରତିଭା ଅନ୍ୱେଷଣ ସଭାଟିକୁ ଅଧ୍ୟାପକ ମାନସ ରଞ୍ଜନ ବାଗ ପରିଚାଳନା କରିଥିଲା ବେଳେ ଅତିଥି ଭାବରେ ମହାବିଦ୍ୟାଳୟର ଅଧ୍ୟକ୍ଷା ଲିପ୍ସାମୟୀ ଦୁବେ ସାହିତ୍ୟ ବିଷୟରେ ବ୍ୟକ୍ତବ୍ୟ ରଖିଥିଲେ । ଅ’ପତ୍ରିକାର ପ୍ରତିଷ୍ଠାତା ନରେଶ କୁମାର ସାହୁ ଅ’ ପତ୍ରିକାର ଆଭିମୁଖ୍ୟ ପ୍ରଦାନ କରିଥିଲେ, ଯୁଗ୍ମ ସମ୍ପାଦକ କାହ୍ନୁ ଚରଣ ସାହୁ କବିତାର ଭାବାବେଗ ବିଷୟରେ ସୂଚନା ଦେଇଥିଲେ ଓ ମୁଖ୍ୟ ସମ୍ପାଦକ ତପନ କୁମାର ସାହୁ ଶବ୍ଦଶିଳ୍ପୀଙ୍କୁ ଲେଖିବାକୁ ଉତ୍ସାହିତ କରିଥିଲେ ଏବଂ ଅନୁଷ୍ଠାନର ରାଜନୀତି ଅଧ୍ୟାପକ ରବି ମାଝୀ ଉପସ୍ଥିତିରେ ସାହିତ୍ୟ ସଭା ତଥା କବିତା ଲିଖନ ପ୍ରତିଯୋଗିତା କାର୍ଯ୍ୟକ୍ରମ ଟିକୁ ସୁଚାରୁ ରୂପେ ତୁଲାଇ ଥିଲେ l ଉକ୍ତ ପ୍ରତିଯୋଗିତାରେ କୌଶିକ ବାବା +୩ ମହାବିଦ୍ୟାଳୟ ଓ ପୀରବତି ମହିଳା +୨ ମହାବିଦ୍ୟାଳୟର ଅନେକ ଛାତ୍ରଛାତ୍ରୀ ଭାଗ ନେଇ ନିଜ ସୃଜନୀ ପ୍ରତିଭାର ପରିଚୟ ପ୍ରଦାନ ପୂର୍ବକ କବିତା ଲେଖିଥିଲେ l କବିତା ପ୍ରତିଯୋଗିତାରେ ତୃତୀୟ ସ୍ଥାନ ସୃତି ସୁଧା ଭୋଇ, ଦ୍ଵିତୀୟ ସ୍ଥାନ ଟଙ୍କଧର ରଣା, ଓ ପ୍ରଥମ ସ୍ଥାନ ସୌଦାମିନୀ ବାଗ ଅଧିକାର କରିଥିଲେ l ଏହି ପ୍ରତିଯୋଗିତାରେ ଅଂଶ ଗ୍ରହଣ କରିଥିବା ସମସ୍ତ ଛାତ୍ରଛାତ୍ରୀଙ୍କୁ ଅନୁଷ୍ଠାନ ତରଫରୁ ଉତ୍ସାହ ମୂଳକ ଅଂଶ ଗ୍ରହଣ ପ୍ରମାଣ ପତ୍ର ପ୍ରଦାନ କରା ଯାଇଥିଲା l ପତ୍ରିକାର ସମ୍ପାଦକ ବିଶ୍ୱନାଥ ସାହୁଙ୍କ ସହଯୋଗରେ ପ୍ରତିଭା ଅନ୍ବେଷଣ କାର୍ଯ୍ୟକ୍ରମ ସଫଲତା ପାଇ ପାରିଛି l ଅ’ ପତ୍ରିକାର ସମ୍ପାଦକ ତପନ କୁମାର ସାହୁ ସହଯୋଗ କରିଥିବା କୌଶିକ ବାବା ଅନୁଷ୍ଠାନ ତଥା ସଭାରେ ଉପସ୍ଥିତ ସମସ୍ତଙ୍କୁ ଧନ୍ୟବାଦ ଦେବା ସହ ଅ’ପତ୍ରିକା ଓ ପେଞ୍ଜୋରାଣୀ ପତ୍ରିକାରେ ପ୍ରତିଯୋଗୀଙ୍କ ଲେଖା ପ୍ରକାଶିତ କରିବାକୁ ପ୍ରତିଶୃତି ଦେଇଥିଲେ l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
