ଉତ୍କଳ ଦିବସ 

 

ଅପ୍ରେଲ ଏକ ତ ଉତ୍କଳ ଦିବସ

କିଏ ବା ଦେବ ତା’ ମୂଲ,

ଗର୍ବିତ ମୁଁ ଓଡ଼ିଶା ମୋ ଜନ୍ମ ମାଟି

ତା’ ଆଗେ ସବୁ ଅମୂଲ l

 

ସ୍ମରଣ ଆସିଲେ ଉତ୍କଳ ଐତିହ୍ୟ

କୋହ ଭରା ହୁଏ ବକ୍ଷ,

ସବୁ ଲହୁ ପୁଣି ଲୁହ ହେଇ ଝରେ

ମାନେନି ଆଖିର ବନ୍ଧ l

 

ନାହିଁ ସିନା ଆଜି ଫିରିଙ୍ଗି ଶାସନ

ନାହିଁ ଜମିଦାରୀ କର,

କିନ୍ତୁ ଆଜି ଆମେ ସ୍ୱାଧୀନ ହୋଇ ବି ସ୍ୱାଭିମାନ ପରାଧୀନ l

 

ନାହାଁନ୍ତି ଆଜି ତ ଉତ୍କଳ ଗୌରବ

ନାହାଁନ୍ତି ଉତ୍କଳମଣି,

ଦୂଆତ ମୂନରେ ନୀତି ଶିକ୍ଷା ଦେବେ ଆତ୍ମ ଗର୍ବେ ବୁଡ଼ିଲେଣି l

 

ଜାଣନ୍ତିନି ଆମେ କେତେ କେତେ ବଡ଼

ଅଜ୍ଞାନୀ ପାଲଟିଛନ୍ତି,

ବାପା, ମାଆ ପରି ପବିତ୍ର ଶବ୍ଦକୁ

ମମି, ଡାଡି କରିଛନ୍ତି l

 

ଭୁଲିଛନ୍ତି ଆମେ ଭଞ୍ଜ କବି ଆଉ

ରାଧାନାଥଙ୍କର ବାଣୀ,

ଭୁଲିଛନ୍ତି ପୁଣି କଳା ସଂସ୍କୃତିକୁ

ଓଡ଼ିଶୀ, ଛାନ୍ଦ ଯେ ପୁଣି l

 

ନାହିଁ ସେ ଭାବନା ନାହିଁ ସେ ଚେତନା

ଉତ୍କଳୀୟ ଆମ୍ଭେ ବୋଲି,

ଯାହା ସଂସ୍କୃତିର ପ୍ରତୀକ ଅଟଇ

ନିଜେ ଜଗନ୍ନାଥ ହରି l

 

ଭରିଦିଅ ସେହି ପ୍ରାଚୀନ ସଂସ୍କାର

ସଭିଙ୍କ ମନ ଅନ୍ତରେ,

ନିଜ ଜୀବନକୁ ଆହୁତି କରିବା

ସମାଜର ଉପକାରେ l

 

ଜନମ ଭୂଇଁ ଯେ ଉତ୍କଳ ଆମର

ଏଇଠି ସବୁ ତ ଭରା,

କାହିଁକି ଖୋଜିବା କୋଉଠି ଖୋଜିବା

ଇଏ ଆମ ସ୍ୱର୍ଗ ପରା l

 

ଭୁଲିବାକୁ ଦେଵାନାହିଁ କାହା ମନୁ

କେବେ ତ ପଖାଳ କଂସା,

ହଜିବାକୁ ଦେଵାନାହିଁ ତ କେବେରେ

ଆମର ଓଡ଼ିଆ ଭାଷା l

 

ଗର୍ବରେ କହିବା ଥରୁଟେ ସମସ୍ତେ

ଆମେରେ ଓଡ଼ିଆ ପରା,

ଓଡ଼ିଆ ପୁଅର ବୀର ଗାଥା ଗାଇ

ପୂରାଇବା ମନ ଆଶା l

 

ତୁମେ ବି ଓଡ଼ିଆ ଆମେ ବି ଓଡ଼ିଆ

ଉତ୍କଳ ଆମରି ବାସ,

ପାଳିବାରେ ଆସ ସଭିଏଁ ତ ମିଶି

ଏଇ ଉତ୍କଳ ଦିବସ l

 

ଉତ୍କଳ ଦିବସ ଆସିଛି ଆଜିରେ

ଦେଉଛି ସ୍ମୃତିର ଭେଟି,

ଓଡ଼ିଆ ପୁଅ ତ ଆଜି ମୁଁ ଗର୍ବିତ

ଉତ୍କଳ ମୋ ଜନ୍ମମାଟି l

  – ଶ୍ରୀ ଅଶୋକ କୁମାର ନାୟକ

  ଗ୍ରାମ/ପୋଷ୍ଟ – କେନ୍ଦୁଢ଼ିପି

           ଜିଲ୍ଲା – ନୟାଗଡ଼