ମୋଟରସାଇକେଲ ଦୁର୍ଘଟଣାରେ ବୃଦ୍ଧା ମୃତ
ଡାବୁଗାଁ, ୨/୭ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ହଳଦିଗୁଡା ଛକରେ ମୋଟରସାଇକେଲ ଦୁର୍ଘଟଣା ଘଟି ଜଣେ ବୃଦ୍ଧାଙ୍କ ମୃତ୍ୟୁ ଘଟିଥିବା ନେଇ ମଙ୍ଗଳବାର ଡାବୁଗାଁ ଥାନାରେ ଅଭିଯୋଗ ହୋଇଛି | ସୂଚନାଯୋଗ୍ୟ :- ଉମରକୋଟ ବ୍ଲକ ଅଧୀନ ଦୁରୁଆଗୁଡା ଗ୍ରାମର ଦୃପୁତା ଭତ୍ରା (୬୦) ଡାବୁଗାଁ ଥାନା ଅଧୀନ ହଳଦୀଗୁଡା ଗ୍ରାମରେ ଥିବା ଝିଅ ଘରକୁ ବୁଲିବାକୁ ଆସିଥିଲେ | ସୋମବାର ଅପରାହ୍ନ ପ୍ରାୟ ୩ ଘ. ସମୟରେ ନିଜ ଘରକୁ ଯିବା ପାଇଁ ହଳଦିଗୁଡା ଛକରେ ଲକ୍ଷ୍ମୀ ବସଷ୍ଟାଣ୍ଡ ପାଖରେ ବସକୁ ଅପେକ୍ଷା କରିଥିଲେ | ସେହି ସମୟରେ ଲିରାଗୁଡା ଗ୍ରାମର ମଙ୍ଗନାଥ ଭତ୍ରା ନିଜ ମୋଟରସାଇକେଲ ନଂ ଓଆର ୨୪ ଏ ୦୮୬୪ ଯୋଗେ ଦୃତ ଗତିରେ ଆସି ଦୃପୁତା ଭତ୍ରା ଙ୍କୁ ଧକ୍କା ଦେଇଥିଲେ | ଫଳରେ ଦୃପୁତା ତଳେ ପଡି ଆହତ ହୋଇଥିଲେ | ତାଙ୍କୁ ସ୍ଥାନୀୟ ଲୋକେ ସଙ୍ଗେ ସଙ୍ଗେ ଉମରକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ | ସେଠାରେ ଚିକିତ୍ସାଧୀନ ଅବସ୍ଥାରେ ଦୃପୁତା ଭତ୍ରା ମୃତ୍ୟୁ ଘଟିଥିଲା | ଏନେଇ ମୃତକ ଙ୍କ ପୁଅଧନ ଭତ୍ରା ମଙ୍ଗଳବାର ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲାକୁ ଭିତ୍ତି କରି ଥାନା ଏଏସଆଇ ଚନ୍ଦ୍ର ଶେଖର ହଜାରୀ ଡାକ୍ତରଖାନା ରେ ପହଞ୍ଚି ଶବ ଜବତ କରି ପଞ୍ଚନାମା କରିବା ପରେ ବ୍ୟବଚ୍ଛେଦ ପାଇଁ ପଠାଇଥିଲେ | ଶବ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି | ଏନେଇ ଥାନା କେସ ନଂ ୧୩୬/ ୨.୭.୨୪ ଦଫା ୨୮୧/୧୦୬ (୧) ବିଏନଏସ ରେ ଏକ ମାମଲା ରୁଜୁ କରାଯାଇଛି |
ଡାବୁଗାଁ ରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
