ଟ୍ରାକ୍ଟର ଓ ମୋଟରସାଇକେଲ ଦୁର୍ଘଟଣା ଝିଅ ମୃତ, ବାପା ଗୁରୁତ୍ତର ଓ ପୁଅ ଆହତ
ଡାବୁଗାଁ, ୩୧/୭ (ମ.ନି.ସ.)- ବୁଧବାର ରାତ୍ର ୭.୩୦ ଘ. ସମୟରେ ନବରଙ୍ଗପୁର ଜିଲା ଡାବୁଗାଁ ବ୍ଲକ ସଦର ମହକୁମାସ୍ଥିତ ଅଙ୍ଗୀ ନଦୀ ପୋଲ ପାଖରେ ଟ୍ରାକ୍ଟର ଓ ମୋଟରସାଇକେଲ ଦୁର୍ଘଟଣା ଘଟି ଝିଅ ମୃତ, ବାପା ଗୁରୁତ୍ତର ଓ ପୁଅ ଆହତ | ସୂଚନାଯୋଗ୍ୟ:- ଡାବୁଗାଁ ଥାନା ଅଧୀନ କନ୍ୟାଶ୍ରମଗୁଡା ଗ୍ରାମର ତୁଳସୀ ଗୌଡ (୨୫) ଆଜି 
ସକାଳେ ପୁଅ ସାଇ ଗୌଡ (୪) ଓ ଝିଅ ଶିବାନୀ ଗୌଡ (୨) ନିଜ ଘର ଘୁଷୁରାଦେଢା ଗ୍ରାମକୁ ଯାଇଥିଲେ | ଘୁଷୁରାବେଢା ଗ୍ରାମରୁ ସନ୍ଧ୍ୟାରେ ମୋଟରସାଇକେଲ ନଂ ଓଡି ୨୪ -୦୭୭୩ ଯୋଗେ ତୁଲସୀ ପୁଅ ଓ ଝିଅକୁ ବସାଇ କନ୍ୟାଶ୍ରମଗୁଡା ଗ୍ରାମରେ ରହୁଥିବା ଘରକୁ ଫେରୁଥିଲେ ଏବଂ ଫେରୁଥିବା ସମୟରେ ବିପରୀତ ଦିଗରୁ ଜମିରେ ହଳ କରି ଆସୁଥିବା ଏକ ଟ୍ରାକ୍ଟରନଂ ଓଡି ୨୪ କେ ୩୧୫୪ ସହ ଧକ୍କା ହୋଇଥିଲା | ଫଳରେ ମୋଟର ସାଇକେଲରେ ଥିବା ୩ ଜଣ ରାସ୍ତା କଡକୁ ଛିଟିକି ପଡିଥିଲେ | ଖବରପାଇ ଡାବୁଗାଁ ଥାନା ସବଇନିସ୍ପେକ୍ଟର ଚନ୍ଦନ ସାହୁ ଓ ଏଏସଆଇ ଗୋପାଳକୃଷ୍ଣ ହାଲୱା ପ୍ରମୁଖ ଘଟଣାସ୍ଥଳରେ ପହଞ୍ଚି ଆହତ ମାନଙ୍କୁ ଉଦ୍ଧାର କରି ପୋଲିସ ଗାଡିରେ ନେଇ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ | ସେଠାରେ ଡାକ୍ତର ପରୀକ୍ଷା କରି ୨ ବର୍ଷର ଝିଅ ଶିବାନୀ ଗୌଡ ଙ୍କୁ ମୃତ ଘୋଷଣା କରିଥିଲେ | ବାପା ତୁଳସୀ ଗୌଡଙ୍କ ଅବସ୍ଥା ଗୁରୁତ୍ତର ଥିବାରୁ ପ୍ରାଥମିକ ଚିକିତ୍ସା ପରେ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି | ପୁଅ ସାଇ ଗୌଡ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛି | ପୋଲିସ ଦୁର୍ଘଟଣାଗ୍ରସ୍ତ ମୋଟରସାଇକେଲ ଓ ଟ୍ରାକ୍ଟର ପୋଲିସ ଜବତ କରି ତଦନ୍ତ ଜାରି ରଖିଛି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
