ବିଦ୍ୟୁତ ଆଘାତରେ ଏକ ମାଈ ହାତୀ ମୃତ
ରାୟଗଡା /ଗୁଣପୁର,: ଆଖି ବୁଜିଲା ଆଉ ଏକ ହାତୀ । ବୁଧବାର ଭୋର ସମୟରେ ବିଦ୍ୟୁତ ଆଘାତରେ ଏକ ମାଈ ହାତୀ ପ୍ରାଣ ହରାଇଛି । ରାୟଗଡ଼ା ଜିଲ୍ଲା ଗୁଣପୁର ବ୍ଲକ୍ ଅନ୍ତର୍ଗତ ଝୁମ୍ପାପୁର ଫୁଲପୁଟି ରାସ୍ତାର ପୋଲ ନିକଟସ୍ଥ କପାବାଡ଼ରେ ଏଭଳି ଘଟଣା ଘଟିଛି ।
ସୂଚନା ଅନୁଯାୟୀ, ଗତବର୍ଷ ୬ଟି ହାତୀ ଜଙ୍ଗଲରୁ ଆସି ସ୍ଥାନୀୟ ଅଞ୍ଚଳରେ ଘୁରି ବୁଲି ଆନ୍ଧ୍ରକୁ ଚାଲି ଯାଇଥିଲେ । ସେଠାରେ ଏହି ୬ଟି ହାତୀ ପଲ ଦୁଇ ଭାଗରେ ବିଭକ୍ତ ହୋଇ ଯାଇଥିଲେ । ଦୁଇଟି ହାତୀ ଗୁଣପୁର ଅଞ୍ଚଳକୁ ଫେରିଥିବା ବେଳେ ଚାରୋଟି ହାତୀ ଆନ୍ଧ୍ରରେ ରହିଥିଲେ । ପରେ ଆନ୍ଧ୍ରର କାଟରଗାଡାରେ ବିଦ୍ୟୁତ ଆଘାତରେ ଆସି ଚାରୋଟି ହାତୀଙ୍କ ମୃତ୍ୟୁ ହୋଇଥିଲା । ଗୁଣପୁର ଫେରିଥିବା ଦୁଇଟି ହାତୀ ମଧ୍ୟ ଅନେକ ଥର ବାଟବଣା ହୋଇଥିଲେ । ଏହି ଦୁଇ ହାତୀ ଦୁଇଆଡ଼େ ଚାଲିଯାଇ ପୁଣି ଏକାଠି ହେଉଥିଲେ । ଏହି ଦୁଇଟି ହାତୀ ତାଙ୍କ ସାଥି ମାନଙ୍କୁ ହରାଇ ଫୁଲପୁଟି ତାରମାଳ ଅଞ୍ଚଳରେ ଦୀର୍ଘ ଦିନ ଧରି ଘୁରି ବୁଲୁଥିଲେ । ଶେଷରେ ବୁଧବାର ସକାଳୁ ମାଈ ହାତୀର ମୃତ୍ୟୁ ହେବାପରେ ଆଉ ଗୋଟିଏ ଅଣ୍ଡିରା ହାତୀ ହିଁ ବଳକା ରହିଛି । ହାତୀଟିର ମୃତଦେହ ଫୁଲପୁଟି ରାସ୍ତାର ପୋଲ ନିକଟସ୍ଥ କପାବାଡ଼ରେ ପଡ଼ିଥିବାର ଦେଖିବାକୁ ମିଳିଥିଲା । ଏହା ଦେଖି ସ୍ଥାନୀୟଲୋକେ ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚି ହାତୀର ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ତେବେ ମୃତ ମାଇହାତୀଟି ଗର୍ଭବତୀ ଥିବା ସ୍ଥାନିୟ ଅଞ୍ଚଳରେ ଚର୍ଚ୍ଚା ଚାଲିଛି । ଏଭଳି ସ୍ଥିତିରେ ଶବ ବ୍ୟବଚ୍ଛେଦ ପରେ ହିଁ ସଠିକ କଥା ଜଣାପଡ଼ିବ ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
