ଫସଲ ନଷ୍ଟ କ୍ଷତି ପୂରଣ ପ୍ରକ୍ରିୟା ଆରମ୍ଭ
ଆସିକା, ୨୦/୧/୨୫ // ଗତ ମାସର ଲଗାଣ ବର୍ଷା ରେ ଧରାକୋଟ ତହସିଲ ର ଚାଷୀ ଭାଇ ମାନଙ୍କ ର ଖରିଫ ଧାନ ଫସଲ ବ୍ୟାପକ ପରିମାଣରେ ନଷ୍ଟ ହୋଇଥିଲା । ନିଅଣ୍ଟିଆ ବର୍ଷା ଯୋଗୁଁ ଚାଷୀମାନେ ଧାର କରଜ କରି ଜେନ ତେନ ପ୍ରକାରେ ରୁଆ ରୁଇ କାର୍ଯ୍ୟ ଆରମ୍ଭ କରିଥିଲେ। ହେଲେ ଲଘୁଚାପ ଜନିତ ଲଗାଣ ବର୍ଷାରେ ପ୍ରାୟ 40 ପ୍ରତିଶତ ଧାନ ଫସଲ ନଷ୍ଟ ହୋଇଯାଇଥିଲା । ଚାଷୀ ମାନଙ୍କ ଅଭିଯୋଗ ପରେ ମନ୍ତ୍ରୀ ଓ ସରକାରୀ ଅଧିକାରୀ ମାନେ କ୍ଷତିଗ୍ରସ୍ତ ଚାଷ ଜମିକୁ ଦେଖିବା ପରେ ରିପୋର୍ଟ ପ୍ରଦାନ କରିଥିଲେ। ସମ୍ପ୍ରତି ସରକାରୀ ସ୍ତରରେ ଏହାର ଆକଳନ କରାଯାଇ ଚାଷୀ ମାନଙ୍କୁ କ୍ଷୟ କ୍ଷତି ପୂରଣ ପ୍ରଦାନ ପାଇଁ ପ୍ରକ୍ରିୟା ଆରମ୍ଭ ହୋଇଛି । ସେହି ଅନୁପାତରେ ଧରାକୋଟ ତହସିଲ କୁ 2 କୋଟି 67 ଲକ୍ଷ 28 ହଜାର 551ଟଙ୍କା ମଞ୍ଜୁର ହୋଇଥିବା ତହସିଲଦାର ଲମ୍ବୋଦର ମାରାଣ୍ଡି ସୂଚନା ପ୍ରଦାନ କରିଛନ୍ତି । ଧରାକୋଟ ତହସିଲ ଅନ୍ତର୍ଗତ ଧରାକୋଟ , ମୁଣ୍ଡମରାଇ, ଢ଼ଉଗାଁ, ଝାଡ଼ବନ୍ଧ, ଜାହାଡା, ବରଡା ବିଲି, ମାଣିକପୁର ରାଜସ୍ବ ସର୍କଲ ର 205 ରାଜସ୍ବ ଓ ଜଙ୍ଗଲ ଅଧିକୃତ ଗ୍ରାମର 8026 ଜଣ ଚାଷୀ ଏହି କ୍ଷତି ପୂରଣ ଅର୍ଥ ପାଇବେ ।
ଆସିକା ରୁ ଶିବ ଶଙ୍କର ମିଶ୍ର ମସିହା ନ୍ୟୁଜ
