ହୋ ଗାଲାଙ୍ଗ ଜୁମୁରରେ ମା’ ଝିଅ ସମ୍ବର୍ଦ୍ଧିତ
ମୟୂରଭଞ୍ଜ ୩/୪: // ରାଇରଙ୍ଗପୁର ସହର ଅଁଳାଡୁବାର ହୋ ଜାତିର ଜଣେ ଆଦିବାସୀ ମହିଳା ସୁରଧି ହେମ୍ବ୍ରମ l ଦିନ ମଜୁରୀ କରି ନିଜର ପରିବାର ପ୍ରତିପୋଷଣ କରି ଆସୁଛନ୍ତି l ନିଜେ ଆଦୌ ସ୍କୁଲ ଦ୍ଵାର ମାଡ଼ି ନାହାନ୍ତି ସତ, କିନ୍ତୁ ନିଜର ଦୁଇ ଝିଅ ମଞ୍ଜୁ ଏବଂ ରାକ୍ଷୀଙ୍କୁ ଉଚ୍ଚ ଶିକ୍ଷିତ କରିବାକୁ କଠିନ ପରିଶ୍ରମ କରୁଛନ୍ତି l ସେମାନଙ୍କ ଭବିଷ୍ୟତ ପାଇଁ ଦେଖୁଛନ୍ତି ଅନେକ ସ୍ବପ୍ନ l ଆଦିବାସୀ ହୋଇଥିଲେ ମଧ୍ଯ ପରିବାର ସଦସ୍ୟଙ୍କ ନାମରେ ଜମିପଟ୍ଟା ନଥିବା ଯୋଗୁଁ ଦୁଇ ଝିଅଙ୍କ ତହସିଲ ତରଫରୁ ଜାତି ପ୍ରମାଣପତ୍ର ହାସଲ କରି ପାରୁ ନଥିଲେ l ଦୁଇ ଝିଅଙ୍କୁ ବିନା ଜାତି ପ୍ରମାଣପତ୍ରରେ ସ୍କୁଲ, କଲେଜରେ ପାଠ ପଢ଼ାଇବାକୁ ବାଧ୍ୟ ହୋଇଥିଲେ l ଝିଅଙ୍କ ଭବିଷ୍ୟତକୁ ନେଇ ମା ସୁରଧି ବେଶ୍ ଚିନ୍ତିତ l ଜଣେ ମା ହିସାବରେ ପରିବାରର ଆର୍ଥିକ ସମସ୍ୟା ଏବଂ ପ୍ରତିକୂଳ ପରିସ୍ଥିତିକୁ ସାମ୍ନା କରିବାକୁ କଠିନ ପରିଶ୍ରମ କରୁଛନ୍ତି l ନିଜର ଦୁଇ ଝିଅଙ୍କୁ ଉଚ୍ଚ ଶିକ୍ଷିତ କରାଇ ସେମାନଙ୍କୁ ରୋଜଗାରକ୍ଷମ କରାଇବା ତାଙ୍କରି ଲକ୍ଷ୍ୟ l ବର୍ଷକ ତଳେ ଏମାନଙ୍କର ଜାତିଗତ ପ୍ରମାଣପତ୍ର ପାଇବାରେ ଅସୁବିଧା ସଂପର୍କରେ ଅବଗତ ହୋଇଥିଲେ ହୋ ସମାଜର ଆଗ ଧାଡ଼ିର ସାମାଜିକ କର୍ମୀ ମନୋରଂଜନ ତିରିଆ l ଏହାପରେ ମଞ୍ଜୁ ଏବଂ ରାକ୍ଷୀଙ୍କ ପାଇଁ ଜାତି ପ୍ରମାଣପତ୍ର ପାଇଁ ସହଯୋଗର ହାତ ବଢ଼ାଇଥିଲେ ମନୋରଂଜନ l ଜାତି ପ୍ରମାଣପତ୍ର ବାହାରିଲା ବେଳକୁ ମଞ୍ଜୁ ଝାରପୋଖରିଆସ୍ଥିତ ସୀମାନ୍ତ ଡ଼ିଗ୍ରୀ ମହାବିଦ୍ୟାଳୟରୁ ବିଜ୍ଞାନରେ ସ୍ନାତକ ପାସ କରି ସାରିଥିଲେ l ଚଳିତ ବର୍ଷ ତାଙ୍କରି ସାନଝିଅ ରାକ୍ଷୀ ଯୁକ୍ତ ଦୁଇ ବିଜ୍ଞାନ ପରୀ୍ଷା ଦେଇଛନ୍ତି l ରାଇରଙ୍ଗପୁରଠାରେ ଅନୁଷ୍ଠିତ ଜାତୀୟ ହୋ ଗାଲାଙ୍ଗ ଜୁମୁର୍ ଉତ୍ସବରେ ମା’ ସୁରଧି ଏବଂ ଝିଅ ମଞ୍ଜୁ ରାଇରଙ୍ଗପୁର ବିଧାୟକ ଜଲେନ୍ ନାଏକଙ୍କ ଦ୍ଵାରା ସମ୍ବର୍ଦ୍ଧିତ ହୋଇଛନ୍ତି l ଜାତୀୟ ହୋ ଗାଲାଙ୍ଗ ଜୁମୁର ପରି କାର୍ଯ୍ୟକ୍ରମରେ ସମ୍ବର୍ଦ୍ଧନା ପାଇ ମଞ୍ଜୁ ଅତ୍ୟନ୍ତ ଭାବବିହଳ ହୋଇ ପଡ଼ିଥିଲେ l
ମୟୂରଭଞ୍ଜ ରୁ ଅକ୍ଷୟ ବିଶ୍ବାଳ ମସିହା ନିଉଜ
