ମୁଖ୍ୟ ଚିକତ୍ସାଲୟ ରେ ବିରଳ ଚିକିତ୍ସା
ନୂଆପଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରଥମ ଥର ପାଇଁ ବିରଳ ମେରୁଦଣ୍ଡ ଅପରେସନ ହେଲା l ନୂଆପଡା ଜିଲ୍ଲାପାଳଙ୍କ ପ୍ରୋତ୍ସାହନ ଏବଂ ତାଙ୍କ ପ୍ରଚେଷ୍ଟାରେ ଉନ୍ନତ ଓ ଟି ସ୍ଥାପନ ପାଇଁ ଏହା ହୋଇପାରିଲା – ସି ଡି ଏମ୍ ଓ l
ଅସ୍ଥି ବିଶେଷଜ୍ଞ ଡଃ ଭିପୁଲ କୁମାର ଗର୍ଗ ଏବଂ ତାଙ୍କ ସମର୍ପିତ ଟିମ ଦ୍ୱାରା ଏହି ବିରଳ ଅସ୍ତ୍ରୋପଚାର ସମ୍ଭବ ହୋଇ ପାରିଛି l ଡଃ ରଶ୍ମୀଜିତ ବେହେରା ଏନଏସେସ୍ଥିଆ ଦେଇଥିଲେ l ବିଭୀଷଣ ଶବର, ବୟସ ୫୫ ବର୍ଷ, ଗ୍ରାମ ଶୁକୁଲିମୁଣ୍ଡି, ବ୍ଲକ୍ କୋମନା ବାସିନ୍ଦା l ନିକଟରେ ଏକ ବଳଦ ତାଙ୍କୁ ଶିଙ୍ଘରେ ଟେକି ଦେଇଥିବାରୁ ତାଙ୍କ ମେରୁଦଣ୍ଡ ଆଘାତପ୍ରାପ୍ତ ହୋଇ ସେ ପକ୍ଷାଘାତ ଗ୍ରସ୍ତ ହୋଇଯାଇଥିଲେ l ଜିଲ୍ଲା ମୁଖ୍ୟ ଡ଼ାକ୍ତରଖାନାର ଏହି ସମର୍ପିତ ଚିକିତ୍ସକ ଦଳ ତାଙ୍କୁ ସର୍ଜରୀ କରି ସୁସ୍ଥ କରିବାର ଆଶ୍ୱାସନା ଦେଇଥିଲେ l ରୋଗୀର ସର୍ଭିକାଲ ସ୍ପାଇନ ସର୍ଜରୀ ଆବଶ୍ୟକ ଥିଲା l ଏମିତି ସର୍ଜରୀ ପ୍ରାୟତଃ ମେଡିକାଲ କଲେଜରେ କିମ୍ବା ବଡ ବଡ କର୍ପୋରେଟ ହସ୍ପିଟାଲ ରେ ହୋଇଥାଏ l ପ୍ରାଇଭେଟ୍ ହସ୍ପିଟାଲ୍ ରେ ଏଇ ଅପରେଶନ ଖର୍ଚ ପ୍ରାୟ 5 ଲକ୍ଷ ଟଙ୍କା ହୋଇଥାନ୍ତା l ଏ ସର୍ଜରୀ ପ୍ରାୟ ତିନି ଘଣ୍ଟା ଧରି ଚାଲିଥିଲା l ଏହି ସମୟରେ ସି ଡି ଏମ୍ ଓ ଡଃ ଧନେଶ୍ୱର ସେଠୀ, ଡି ଏମ୍ ଓ ଡଃ ଲଲିତ ମୋହନ ବିଶି, ଡି ପି ଏମ୍ ସତ୍ୟନାରାୟଣ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ l ସୂଚନାଯୋଗ୍ୟ ଯେ କିଛି ଦିନ ଆଗରୁ ଏଠାରେ ସର୍ଜରୀ ବିଶେଷଜ୍ଞ ଡଃ ସ୍ବସ୍ତି ରେଖା ନାୟକ ଏବଂ ଟିମ୍ ଏଭଳି ଏକ ବିରଳ ଅପରେସନ କରି ଏକ ଶରାଘାତ ବାଳକର ଜୀବନ ରକ୍ଷା କରିଥିଲେ l ଏଇ ବିଷୟରେ ସି ଡି ଏମ୍ ଓ ଡଃ ସେଠୀ କହନ୍ତି ଏଭଳି ଅସାଧାରଣ ଅପରେସନ ପଛରେ ଜିଲ୍ଲାପାଳଙ୍କ ନିରନ୍ତର ପ୍ରୋତ୍ସାହନ ଓ ପ୍ରେରଣା ଆମକୁ ବଳ ଯୋଗାଇଥିଲା l ତାଙ୍କ ପ୍ରଚେଷ୍ଟାରେ ଏଠାରେ ଉନ୍ନତ ମାନର ଅପରେସନ ଥିଏଟର, ଓଟି କାର୍ଯ୍ୟକ୍ଷମ ହୋଇ ପାରିଛି, ଯାହା ଏଭଳି ବିଶେଷ କାମରେ ଆସୁଛି l ଏହି ସମର୍ପିତ ସର୍ଜରୀ ଟିମ୍ ର ସମସ୍ତ ସଦସ୍ୟ ମାନଙ୍କୁ ଜିଲ୍ଲାପାଳ ମଧୁସୂଦନ ଦାଶ ଧନ୍ୟବାଦ ଜ୍ଞାପନ କରିଛନ୍ତି l
ନୂଆପଡା ରୁ ସୁଜିତ କୁମାର ପ୍ରଧାନ ଙ୍କ ରିପୋର୍ଟ
