ଆମେ ଓଡ଼ିଆ
ବେଣୁଧର ସୂତାର
ଓଡ଼ିଶା ଆମ ଜନମ ଭୂଇଁ
ଏମିତି ମାଆ ମରତେ ନାହିଁ
ପରିଚୟ ଆମ ଓଡିଆ
କେଡ଼େ ସୁନ୍ଦର ଭାଷା ଆମର
ଚାରୁ ଲଳିତ ସୁର ଝଙ୍କାର
ଛନ୍ଦ ସୁଧା ଯାର ବଢିଆ
ଓଡ଼ିଆ, ଆମେ ଓଡିଆ ।।
ଆମରି ଭାଷା ଆମ ସଂସ୍କୃତି
ଆମରି ଇତିହାସ
ମାତୃଭୂମି ର ମମତା ତୋଳେ
ଆମ ମୁଖରେ ହସ
ସୁନ୍ଦର କ୍ଷେତ ଶ୍ୟାମ ବନାନୀ
ସବୁଜ ଘାସ ପଡିଆ
ଓଡ଼ିଆ, ଆମେ ଓଡ଼ିଆ ।।
କଳା ଭାସ୍କର୍ଯ୍ୟ ଶିଳ୍ପ ଐଶ୍ୱର୍ଯ୍ୟ
ଶିକ୍ଷା ରେ ଆମେ ଆଗୁଆ
ଏଜାତି ପ୍ରୀତି ଶାନ୍ତି ମଇତ୍ରୀ
ଦେଶ ସେବାରେ ଜାଗୁଆ
ଆମ ଠାକୁର ନୀଳାଦ୍ରୀଶ୍ୱର
ବାଣ୍ଟେ କୈବଲ୍ୟ କୁଡୁଆ
ଓଡିଆ, ଆମେ ଓଡ଼ିଆ ।।
କେଡ଼େ ମଧୁର ତା ବକ୍ଷ ଧାର
ମମତା ମଧୁ ଝର
ପ୍ରତି ଓଡ଼ିଆ ପ୍ରାଣ ସ୍ପନ୍ଦନ
ଜୀବନ ସୁଧା ଧାର
ସ୍ୱାଧୀନ ଆମେ ସରଳ ଆମେ
ସ୍ବାଭିମାନୀ ପାଠ ପଢୁଆ
ଓଡ଼ିଆ, ଆମେ ଓଡ଼ିଆ ।।
ସାମ୍ୟ ମଇତ୍ରୀ ଏକଦା ଆମ
ଜୀବନ ମୂଳମନ୍ତ୍ର
ଅହିଂସା ଆମ ପରମ ଧର୍ମ
ଶାସନ ଗଣତନ୍ତ୍ର
ଚିନ୍ତା ଚେତନା ଭକ୍ତି ଭାବନା
ବିଶ୍ବରେ ଆଗ ଧାଡିଆ
ଓଡ଼ିଆ, ଆମେ ଓଡ଼ିଆ ।।
ଯା ପୁଣ୍ୟ ମାଟି ପାଣି ପବନ
ସ୍ୱର୍ଗଠୁଁ ଗରିୟାନ
ଜଗତନାଥ ଧାମ ଆମର
ମରତେ ମହୀୟାନ
ଆମ ଅତୀତ ଐତିହ୍ୟ କହେ
ଓଡ଼ିଆ ବୀର ଲଢ଼ୁଆ
ଓଡ଼ିଆ, ଆମେ ଓଡ଼ିଆ ।।
କେଶଦୁରାପାଳ କେନ୍ଦୁଝର