ସରସ୍ଵତୀ ଶିଶୁବିଦ୍ୟା ମନ୍ଦିର, ବଡବିଲରେ ସଫଳ କନ୍ୟା ଶିବିର ଆୟୋଜିତ
ବଡବିଲ : ସରସ୍ଵତୀ ଶିଶୁବିଦ୍ୟା ମନ୍ଦିର, ବଡବିଲ ପରିସରରେ ଅଦ୍ୟ ତା. ୧୯/୧୨/୨୦୨୫ ରିଖରେ କନ୍ୟା ଶିବିର ସଫଳତାର ସହିତ ଆୟୋଜିତ ହୋଇଯାଇଛି। ଏହି ଶିବିରର ମୂଳ ଉଦ୍ଦେଶ୍ୟ ଥିଲା ଶିଶୁମାନଙ୍କ ମଧ୍ୟରେ ସଂସ୍କାର, ଦେଶଭକ୍ତି ଓ ନୈତିକ ମୂଲ୍ୟବୋଧର ବିକାଶ କରିବା।
ଶିବିର ଅବସରରେ ଶିଶୁମାନେ ଯୋଗ ଓ ପ୍ରାଣାୟାମର ଅଭ୍ୟାସ କରିଥିବା ସହ ଧୀରେ ଧୀରେ ଲୁପ୍ତ ହୋଇଯାଉଥିବା ବିଭିନ୍ନ ପାରମ୍ପାରିକ ଖେଳ ଖେଳିଥିଲେ। ଆମ ଓଡ଼ିଆ ସଂସ୍କୃତିର ପାରମ୍ପାରିକ ଖାଦ୍ୟର ପ୍ରଦର୍ଶନୀ, ବର୍ଯ୍ୟବସ୍ତୁରୁ ବିଭିନ୍ନ ଉପଯୋଗୀ ସାମଗ୍ରୀ ପ୍ରସ୍ତୁତି ଓ ଓଡ଼ିଆ ପର୍ବପର୍ବାଣୀ ଯଥା ଖୁଦୁରୁକୁଣୀ, ମାଣବସା ଗୁରୁବାର ଆଦିର ସଜୀବ ନମୁନା ଦେଖାଇ ଶିଶୁମାନେ ସମସ୍ତଙ୍କୁ ଆକର୍ଷିତ କରିଥିଲେ।
ଏହା ସହ ଶିଶୁମାନେ ମହିୟସୀ ମହିଳାମାନଙ୍କ ବେଶ ଧାରଣ କରି ତାଙ୍କର ଅବଦାନକୁ ସ୍ମରଣ କରିଥିଲେ। ନାଚ-ଗୀତ କାର୍ଯ୍ୟକ୍ରମ ଓ ସହଭୋଜ ମାଧ୍ୟମରେ ଶିବିର ଅତ୍ୟନ୍ତ ଆନନ୍ଦମୟ ପରିବେଶରେ ସମାପ୍ତ ହୋଇଥିଲା। ଏହି କନ୍ୟା ଶିବିରରେ ପ୍ରାୟ ୪୦୦ ଜଣ ଭଉଣୀ ଉପସ୍ଥିତ ଥିଲେ। ସଂସ୍ଥାର ପ୍ରଧାନ ଆଚାର୍ଯ୍ୟ ବିପିନ ବିହାରୀ ଖଣ୍ଡାୟୀଙ୍କ ତତ୍ତ୍ୱାବଧାନରେ ଏବଂ ସମସ୍ତ ଗୁରୁଜୀ ଓ ଗୁରୁମାଙ୍କର ସହଯୋଗ ଓ ପ୍ରଚେଷ୍ଟାରେ ଏହି କାର୍ଯ୍ୟକ୍ରମ ସାର୍ବିକ ଭାବେ ସଫଳ ହୋଇଥିଲା।
ଉର୍ମିଳା ପଣ୍ଡା ଙ୍କ ରିପୋର୍ଟ୍
