ଭିଜି ଟ୍ରଫିରେ ଇଷ୍ଟ୍ ଜୋନ୍ ଟିମ୍ରୁ ଖେଳିବେ କେନ୍ଦୁଝରର ସାର୍ଥକ ସ୍ୱୟଂପ୍ରକାଶ
ଜିଲ୍ଲାର ପ୍ରଥମ ଖେଳାଳୀ ଭାବେ ଗଢ଼ିଲେ ନୂଆ ଇତିହାସ
କେନ୍ଦୁଝର, ୨୭ ଫେବୃଆରୀ ୨୦୨୬: କେନ୍ଦୁଝର ଜିଲ୍ଲା ପାଇଁ ଗୌରବର ମୁହୂର୍ତ୍ତ। ଭାରତୀୟ କ୍ରିକେଟ୍ ନିୟନ୍ତ୍ରଣ ସଂସ୍ଥା Board of Control for Cricket in India (ବିସିସିଆଇ) ଆନୁକୂଳ୍ୟରେ ଆୟୋଜିତ ଜାତୀୟସ୍ତରୀୟ ଆନ୍ତର୍ବିଶ୍ୱବିଦ୍ୟାଳୟ କ୍ରିକେଟ୍ ଟୁର୍ଣ୍ଣାମେଣ୍ଟ Vizzy Trophy ରେ ଇଷ୍ଟ୍ ଜୋନ୍ ଟିମ୍ରୁ ଖେଳିବା ପାଇଁ କେନ୍ଦୁଝରର ଉଦୀୟମାନ ତରୁଣ କ୍ରିକେଟର ସାର୍ଥକ ସ୍ୱୟଂପ୍ରକାଶ ଚୟନ ହୋଇଛନ୍ତି।
ମାର୍ଚ୍ଚ ୧ ତାରିଖରୁ ଗୋଆ ରେ ଆରମ୍ଭ ହେବାକୁ ଥିବା ଏହି ପ୍ରତିଷ୍ଠିତ ଟୁର୍ଣ୍ଣାମେଣ୍ଟରେ ଇଷ୍ଟ୍ ଜୋନ୍ ସହ ୱେଷ୍ଟ ଜୋନ୍, ନର୍ଥ ଜୋନ୍ ଓ ସାଉଥ୍ ଜୋନ୍ ଦଳ ଅଂଶଗ୍ରହଣ କରିବେ। ଦେଶର ବିଭିନ୍ନ ରାଜ୍ୟରୁ ଚୟନିତ ସର୍ବୋତ୍ତମ ବିଶ୍ୱବିଦ୍ୟାଳୟ ଖେଳାଳୀମାନେ ଏହି ମଞ୍ଚରେ ନିଜ ପ୍ରତିଭା ପ୍ରଦର୍ଶନ କରିବେ।
ପୂର୍ବରୁ ମଧ୍ୟ ଦେଖାଇଛନ୍ତି କୃତିତ୍ୱ
ସାର୍ଥକ ପୂର୍ବରୁ ୨୦୨୪ ଓ ୨୦୨୫ ମସିହାରେ ଓଡ଼ିଶା ଅଣ୍ଡର–୧୯ ଟିମ୍ରୁ ଖେଳି ପ୍ରସିଦ୍ଧ Cooch Behar Trophyରେ ଅଂଶଗ୍ରହଣ କରିଥିଲେ। ଏହାସହ ୨୦୨୧ ମସିହାରେ ଓଡ଼ିଶା ଅଣ୍ଡର–୧୬ ଦଳରୁ ଖେଳି Vijay Merchant Trophyରେ ମଧ୍ୟ ନିଜ ପ୍ରତିଭା ପ୍ରମାଣ କରିଥିଲେ।
ଶିକ୍ଷା ଓ ନେତୃତ୍ୱରେ ମଧ୍ୟ ଆଗୁଆ
ନିର୍ମଳା କନଭେଣ୍ଟ ସ୍କୁଲ, କେନ୍ଦୁଝରରୁ ମାଟ୍ରିକ୍ ପାସ୍ କରି ସାର୍ଥକ କଟକର ପ୍ରସିଦ୍ଧ Ravenshaw Higher Secondary Schoolରେ ଯୁକ୍ତ ଦୁଇ ପଢ଼ିଥିଲେ। ବର୍ତ୍ତମାନ ସେ Ravenshaw Universityରେ +3 ପ୍ରଥମ ବର୍ଷ କଳା ବିଭାଗରେ ଅଧ୍ୟୟନରତ ଅଛନ୍ତି। ଚଳିତ ବର୍ଷ ସେ ରେଭେନ୍ସା ବିଶ୍ୱବିଦ୍ୟାଳୟ କ୍ରିକେଟ୍ ଟିମ୍ର ଅଧିନାୟକ ଭାବେ ମଧ୍ୟ ନିଯୁକ୍ତ ହୋଇଛନ୍ତି, ଯାହା ତାଙ୍କର ନେତୃତ୍ୱ କ୍ଷମତାକୁ ପ୍ରମାଣ କରେ।
ପ୍ରଶିକ୍ଷକଙ୍କ ନିର୍ଦ୍ଦେଶନାରେ ସଫଳତା
ବରିଷ୍ଠ ପ୍ରଶିକ୍ଷକ ଗିରୀଶ ଚନ୍ଦ୍ର ହୋତା ଓ ବୋଦାପଳସା କ୍ରିକେଟ୍ କ୍ଲବର ପ୍ରଶିକ୍ଷକ ସୁଧାଂଶୁ ନାୟକଙ୍କ ପ୍ରତ୍ୟକ୍ଷ ପ୍ରଶିକ୍ଷଣ ଓ ମାର୍ଗଦର୍ଶନା ସାର୍ଥକଙ୍କ ଏହି ସଫଳତାର ମୂଳ ଶକ୍ତି। ନିରନ୍ତର ପରିଶ୍ରମ, ଶୃଙ୍ଖଳାବଦ୍ଧ ଅଭ୍ୟାସ ଓ ଆତ୍ମବିଶ୍ୱାସ ତାଙ୍କୁ ଏହି ଉଚ୍ଚ ସ୍ଥାନକୁ ନେଇଆସିଛି।
କେନ୍ଦୁଝର ପାଇଁ ଐତିହାସିକ ମୁହୂର୍ତ୍ତ
ସୂଚନା ଅନୁଯାୟୀ, ଭିଜି ଟ୍ରଫିରେ ଇଷ୍ଟ୍ ଜୋନ୍ ତରଫରୁ ଖେଳିବାରେ ସାର୍ଥକ କେନ୍ଦୁଝର ଜିଲ୍ଲାର ପ୍ରଥମ ଖେଳାଳୀ। ଏହା ଜିଲ୍ଲାର କ୍ରିକେଟ୍ ଇତିହାସରେ ଏକ ମାଇଲସ୍ଟୋନ୍ ବୋଲି କୁହାଯାଉଛି।
ସୂଚନା ଓ ଲୋକସମ୍ପର୍କ ବିଭାଗର ଯୁଗ୍ମ ନିର୍ଦ୍ଦେଶକ ତଥା ରାଜ୍ୟପାଳଙ୍କ ଲୋକସମ୍ପର୍କ ଅଧିକାରୀ ସଂଜୀବ ବାରିକ ଓ ରଞ୍ଜିତା ବାରିକଙ୍କ କନିଷ୍ଠ ପୁତ୍ର ସାର୍ଥକଙ୍କୁ ଏହି ସଫଳତା ପାଇଁ କେନ୍ଦୁଝର ଜିଲ୍ଲା କ୍ରୀଡ଼ା ସଂସ୍ଥାର ସାଧାରଣ ସମ୍ପାଦକ ସଂଗ୍ରାମ ପଟ୍ଟନାୟକ ସହ ବିଭିନ୍ନ ସଂଗଠନ ଓ କ୍ରୀଡ଼ାପ୍ରେମୀମାନେ ଅଭିନନ୍ଦନ ଜଣାଇଛନ୍ତି।
ସମସ୍ତଙ୍କ ଆଶା — ସାର୍ଥକ ଇଷ୍ଟ୍ ଜୋନ୍ ପାଇଁ ଉତ୍କୃଷ୍ଟ ପ୍ରଦର୍ଶନ କରି କେନ୍ଦୁଝର ଓ ଓଡ଼ିଶାର ନାମକୁ ଜାତୀୟ ସ୍ତରରେ ଆହୁରି ଉଜ୍ଜ୍ୱଳ କରିବେ।
ଉର୍ମିଳା ପଣ୍ଡା ଙ୍କ ରିପୋର୍ଟ୍
