ବିଶ୍ବ ନାଟ୍ଯଦିବସ ଅବସରରେ ଜାତୀୟ ନାଟକ ମହୋତ୍ସବ ଉଦଯାପିତ
ରାଉରକେଲା : ବିଶ୍ବ ନାଟ୍ଯଦିବସ ଅବସରରେ ରାଉରକେଲାର ଅଗ୍ରଣୀ ନାଟ୍ଯାନୁଷ୍ଠାନ ସଂପର୍କ ଆୟୋଜିତ ଜାତୀୟ ନାଟକ ମହୋତ୍ସବ- ୨୦୨୬ର ଉଦଯାପନ ଦିବସଟି ବିଭିନ୍ନ ରଙ୍ଗାରଙ୍ଗ କାର୍ଯ୍ୟକ୍ରମ ଦ୍ବାରା ସମାପନ ହୋଇଯାଇଛି । ସକାଳ ଆଠ ଘଟିକାରେ ଏକତ୍ର ରାଉରକେଲା ର ମିଳିତ ଆନୁକୂଲ୍ଯରେ ଶତାଧିକ ବୟସ୍କ ଓ ଯୁବକଳାକାରଙ୍କୁ ନେଇ ଏକ ରଙ୍ଗାରଙ୍ଗ ନାଟ୍ଯ ପଦଯାତ୍ରା ଆମ୍ବାଗାନ ଛକ ସ୍ଥିତ ଗୁଣ୍ଡିଚା ମାଉସୀମା ମନ୍ଦିର ରୁ ବାହାରି ସିଭିକ ସେଣ୍ଟର ଯାଏ ଆସିଥିଲା । ପରେ ଦିବା ଦଶ ଘଟିକାରେ ଓଡିଶା ସାହିତ୍ଯ ଏକାଡେମୀ ଓ ସଂପର୍କ ର ମିଳିତ ଆନୁକୂଲ୍ଯରେ “ଶିକ୍ଷାନୁଷ୍ଠାନରେ ନାଟକ ” ଶିର୍ଷକ ଉପରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଏହି ଆଲୋଚନାଚକ୍ର ର ମୁଖ୍ଯଅତିଥି ଭାବେ ଯୋଗଦାନ କରିଥିଲେ ପ୍ରାକ୍ତନ ଅତିରିକ୍ତ ଜିଲ୍ଲାପାଳ ମହେନ୍ଦ୍ର ପଟ୍ଟନାୟକ, ସମ୍ମାନିତ ଅତିଥି ଭାବେ ରାଉରକେଲା ଇସ୍ପାତ କାରଖାନାର ପୂର୍ବତନ ମହାପ୍ରବନ୍ଧକ ଅଭୟ କୁମାର ଦାସ ଓ ଓଡିଶା ସଂଗୀତ ନାଟକ ଏକାଡ଼େମୀର ସଭ୍ଯ ଗୋପକୃଷ୍ଣ ନାୟକ ଯୋଗଦାନ କରିଥିଲେ । ପ୍ରଫେସର ଡ ସମର ମୁଦାଲି ଙ୍କ ସଭାପତିତ୍ବ ରେ ଅନୁଷ୍ଠିତ ଏହି ଆଲୋଚନାଚକ୍ର ରେ ପ୍ରଥମେ ସଂପର୍କ ର ସଂପାଦକ ତଥା ବିଶିଷ୍ଟ ନାଟ୍ଯକାର ଭାସ୍କର ଚନ୍ଦ୍ର ମହାପାତ୍ର ଶିକ୍ଷାନୁଷ୍ଠାନରେ ନାଟକ ର ଆବଶ୍ୟକତା ସମ୍ପର୍କରେ ସମ୍ଯକ ସୂଚନା ପ୍ରଦାନ କରିଥିଲେ। ଡ ସଂଜୟ କୁମାର ହାତୀ, ଡ ସୁନୀତି ଦେବତା, ଅଧ୍ୟାପକ କରୁଣାକର ପାଟ୍ଟଶାଣୀ ସମ୍ମାନିତ ବକ୍ତା ଭାବରେ ଯୋଗଦାନ କରି ନିଜ ନିଜର ମତ ଉପସ୍ଥାପନ କରିଥିଲେ । ଆଲୋଚନାଚକ୍ର ର ପ୍ରାରମ୍ଭରେ ବିଭିନ୍ନ ସ୍କୁଲ କଲେଜରୁ ଆସିଥିବା ଛାତ୍ର ଛାତ୍ରୀମାନେ ଶିକ୍ଷାନୁଷ୍ଠାନରେ ନାଟକ ର ଆବଶ୍ୟକତା ଉପରେ ବହୁଧା ମତ ବ୍ଯକ୍ତ କରିଥିଲେ । ପରିଶେଷରେ ଅନୁଷ୍ଠାନର କାର୍ଯ୍ୟକାରୀ ସଭାପତି ବିଜୟ କୁମାର ପାତ୍ର ଧନ୍ୟବାଦ ଅର୍ପଣ କରିଥିଲେ । ପରେ ଏକକ ଅଭିନୟ, ସଂପାନ ତଥା କୈ।ତୁକ ପୋଷାକ ପ୍ରତିଯୋଗିତାର ବିଜେତା ମାନଙ୍କୁ ପୁରସ୍କୃତ କରାଯାଇଥିଲା।
ଅପରାହ୍ନ ତିନି ଘଟିକାରେ ସଂପର୍କ ର ନୃତ୍ୟ ବିଭାଗ “ଉପାସନା” ଦ୍ବାରା ଉପାସନା ନୃତ୍ୟୋତ୍ସବ ଆୟୋଜିତ ହୋଇ ଥିଲା ଏହାକୁ ଉଦଘାଟନ କରିଥିଲେ ବିଶିଷ୍ଟ ସମାଜସେବୀ କମଲ ଅଗ୍ରୱାଲ , ମୁଖ୍ୟଅତିଥି ଭାବେ ଯୋଗଦାନ କରିଥିଲେ ରାଉରକେଲା ଇସ୍ପାତ କାରଖାନାର ପୂର୍ବତନ ମହାପ୍ରବନ୍ଧକ ନାରାୟଣ ପତି । ସମ୍ମାନିତ ଅତିଥି ଭାବେ ଯୋଗଦାନ କରିଥିଲେ ବିଶିଷ୍ଟ ଆଇନଜୀବୀ ପ୍ରଦୀପ ନାୟକ ।
ସ୍ବର୍ଗତ ଗୁରୁ ବିଚିତ୍ରାନନ୍ଦ ଦଳାଇ ଙ୍କୁ ଉପାସନା ସମ୍ମାନ ରେ ସମ୍ମାନିତ କରାଯାଇ ଥିଲା । ରାଉରକେଲାର ୧୪ଜଣ ଯୁବ ଓ କିଶୋର ଓଡିଶୀ ନୃତ୍ୟଶିଳ୍ପୀମାନଙ୍କୁ ଯଥାକ୍ରମେ ନୃତ୍ଯଭୂଷଣ ଓ ନୃତ୍ୟଶ୍ରୀ ସମ୍ମାନ ରେ ସମ୍ମାନିତ କରାଯାଇଥିଲା । ଉପାସନା ନୃତ୍ୟାନୁଷ୍ଠାନ ର ଗୁରୁ ସୁଦେଷ୍ଣାରାଣୀ ରାଉତ ସ୍ବାଗତ ଭାଷଣ ସହ ଧନ୍ୟବାଦ ଅର୍ପଣ କରିଥିଲେ । ରାଉରକେଲା ଓ କଟକର ନୃତ୍ୟଶିଳ୍ପୀମାନେ ନୃତ୍ୟ ପରିବେଷଣ କରିଥିଲେ ।
ଉଦଯାପନୀ ସନ୍ଧ୍ୟାର ଉଦଘଟକ ଭାବେ ରାଉରକେଲା ବିଧାୟକ ସାରଦା ପ୍ରସାଦ ନାୟକ ଯୋଗଦେଇ ଥିବା ବେଳେ ମୁଖ୍ୟ ଅତିଥି ଭାବେ ଯୋଗଦାନ କରିଥିଲେ ଦୀପିକା ମହିଳା ସଂଘତିର ସଭାପତି ନମ୍ରତା ବର୍ମା । ଅନୁଷ୍ଠାନର ସଭାପତି ସୁବ୍ରତା ପତିଙ୍କ ସଭାପତିତ୍ବ ରେ ଅନୁଷ୍ଠିତ ଏହି ସଭାର ପ୍ରାରମ୍ଭରେ ସଂପାଦକ ଶ୍ରୀ ଭାସ୍କର ଚନ୍ଦ୍ର ମହାପାତ୍ର ବିଶ୍ବ ନାଟ୍ଯଦିବସ ଅବସରରେ ଜାତୀୟ ନାଟକ ମହୋତ୍ସବର ଉଦ୍ଦେଶ୍ଯ ଓ ତାର ସଫଳତା ଉପରେ ଆଲୋକପାତ କରିଥିଲେ । କାର୍ଯକାରୀ ସଭାପତି ବିଜୟ ପାତ୍ର ଧନ୍ୟବାଦ ଅର୍ପଣ କରିଥିଲେ । ରାଉରକେଲା ଇସ୍ପାତ କାରଖାନାର ଭାରପ୍ରାପ୍ତ ନିର୍ଦ୍ଦେଶକ ଆଲୋକ ବର୍ମାଙ୍କୁ ଏବର୍ଷ ର ନାଟ୍ୟବନ୍ଧୁ ସମ୍ମାନ ଏକତ୍ରର ସବୁ କଳାକାରଙ୍କ ଉପସ୍ଥିତିରେ ପ୍ରଦାନ କରାଯାଇଥିଲା । ଭୁବନେଶ୍ବର ର ବରିଷ୍ଠ ନାଟ୍ୟକାର ଅଭିନେତା ନବୀନ ପରିଡାଙ୍କୁ ସଂପର୍କ ସମ୍ମାନ ରେ ଓ ଆନ୍ତର୍ଜାତିକ ଖ୍ୟାତିସମ୍ପନ୍ନ ଓଡିଶୀ ନୃତ୍ଯାଙ୍ଗନା ମୀରା ଦାସଙ୍କୁ ଉପାସନା ସମ୍ମାନରେ ସମ୍ମାନିତ କରାଯାଇଥିଲା । ଏତତ୍ ବ୍ୟତୀତ ଶ୍ରେଷ୍ଠ ମଂଚ ଶୀଳ୍ପୀ ଭାବରେ ପ୍ରଳୟ ଶତପଥୀ ଓ ଶ୍ରେଷ୍ଠ ଉଦଘୋଷିକା ଭାବେ ଝିଲିମା ମହାନ୍ତିଙ୍କୁ ସମ୍ମାନିତ କରାଯାଇଥିଲା ।
ପରେପରେ ଜାମସେଦପୁରର ପାଥ ନାଟ୍ଯାନୁଷ୍ଠାନ ମନୋଜ ମିତ୍ରଙ୍କ ରଚିତ ମହମ୍ମଦ ନିଜାମ ଙ୍କ ନିର୍ଦ୍ଦେଶିତ ନାଟକ ପଞ୍ଛି ମଂଚସ୍ଥ କରିଥିଲେ । ପକ୍ଷୀ ଆକାଶରେ ଆନନ୍ଦ ରେ ପରିଭ୍ରମଣ କରିବାକୁ ସବୁ ବେଳେ ଚିନ୍ତା କରେ । ହେଲେ ଖାଦ୍ୟ ଅନ୍ବେଷଣ ରେ ଦିନ ତମାମ ବ୍ଯସ୍ତ ରହି ସେ ଜୀବନ ସାରା ଟିକିଏ ବି ଆନନ୍ଦ ପାଏନା । ଠିକ ସେହିପରି ନିମ୍ନ ଅତି ନିମ୍ନ ବିତ୍ତ ଶ୍ରେଣୀର ମଣିଷ କିପରି ଜୀବନ ସାରା ସୁଖ ଅନ୍ବେଷଣ ରେ ରହି କର୍ମରେ ବ୍ଯସ୍ତ ରହେ ହେଲେ ଟିକିଏ ବି ଶାନ୍ତି ପାଏନା ତାହାହିଁ ସୁନ୍ଦର ଓ ନିଖୁଣ ଅଭିନୟ ମାଧ୍ୟମ ରେ ଉପସ୍ଥାପନ କରି ଦର୍ଶକ ଙ୍କୁ ମନ୍ତ୍ର ମୁଗ୍ଧ କରିଥିଲେ ।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
