ଓଡ଼ିଆ ସିନେମାରେ ଏବେ ‘କାହାଣୀ ହିଁ ପ୍ରକୃତ ହିରୋ’: ‘ମନ୍ତ୍ରମୁଗ୍ଧ’ କଲା କମାଲ, ୧୦ ଦିନରେ ୨ କୋଟିରୁ ଅଧିକ ବ୍ୟବସାୟ
ଓଡ଼ିଆ ଚଳଚ୍ଚିତ୍ର ଜଗତରେ ଏବେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳୁଛି। ଦିନ ଥିଲା, ଯେତେବେଳେ କୌଣସି ବଡ଼ ପର୍ବପର୍ବାଣି କିମ୍ବା ନାମୀଦାମୀ ‘ସୁପରଷ୍ଟାର’ଙ୍କ ବିନା ସିନେମା ହଲକୁ ଦର୍ଶକ ଆସିବା କଷ୍ଟକର ଥିଲା। କିନ୍ତୁ ଏହି ପାରମ୍ପରିକ ଧାରାକୁ ଭାଙ୍ଗି ଏକ ନୂଆ ଇତିହାସ ରଚିଛି ଯୁବ ନିର୍ଦ୍ଦେଶକ ଅନୁପମ ପଟ୍ଟନାୟକଙ୍କ ନିର୍ଦ୍ଦେଶିତ ଚଳଚ୍ଚିତ୍ର ‘ମନ୍ତ୍ରମୁଗ୍ଧ’।
କୌଣସି ବଡ଼ ଷ୍ଟାର କିମ୍ବା ଉତ୍ସବର ମାହୋଲ ନଥାଇ ମଧ୍ୟ ଏହି ଚଳଚ୍ଚିତ୍ରଟି ମାତ୍ର ୧୦ ଦିନ ମଧ୍ୟରେ ୨ କୋଟିରୁ ଅଧିକ ଟଙ୍କାର ବ୍ୟବସାୟ କରି ସମସ୍ତଙ୍କୁ ଚକିତ କରିଦେଇଛି। ଏହି ସଫଳତା ପ୍ରମାଣ କରିଛି ଯେ, ଯଦି କାହାଣୀ ଦମଦାର ଏବଂ ମନଛୁଆଁ ହୋଇଥାଏ, ତେବେ ଦର୍ଶକ ସିନେମାକୁ ଆଦରି ନେବାକୁ ପଛାନ୍ତି ନାହିଁ।
ପୂର୍ବରୁ ଓଡ଼ିଶାରେ କିଛି ହାତଗଣତି ଅଭିନେତାଙ୍କୁ ହିଁ ‘ସୁପରଷ୍ଟାର’ ବୋଲି ବିଚାର କରାଯାଉଥିଲା ଏବଂ ସେମାନଙ୍କ ଫିଲ୍ମ ରିଲିଜ୍ ପାଇଁ ଖାସ୍ ତିଥି ବା ବାର ଅପେକ୍ଷା କରାଯାଉଥିଲା। କିନ୍ତୁ ‘ପ୍ରତୀକ୍ଷା’ ପରି ଜାତୀୟ ପୁରସ୍କାର ପ୍ରାପ୍ତ ସିନେମା ପରେ ଏବେ ‘ମନ୍ତ୍ରମୁଗ୍ଧ’ ଜାତୀୟ ସ୍ତରର ମନୋରଞ୍ଜନ ପ୍ରଦାନ କରିବାରେ ସଫଳ ହୋଇଛି। ଏଥିରେ ଅଭିନୟ କରିଥିବା ପ୍ରତ୍ୟେକ ନବାଗତ କଳାକାର ନିଜର ଶ୍ରେଷ୍ଠ ଅଭିନୟ ଜରିଆରେ ନିଜକୁ ଜଣେ ଜଣେ ସୁପରଷ୍ଟାର ଭାବେ ପ୍ରମାଣିତ କରିଛନ୍ତି।
ସିନେ ସମୀକ୍ଷକଙ୍କ ମତରେ, ଓଡ଼ିଆ ସିନେମାରେ ଏବେ ‘କାହାଣୀ ହିଁ ପ୍ରକୃତ ହିରୋ’। ବିଗତ ଦିନର ସମସ୍ତ ବ୍ୟବସାୟିକ ରେକର୍ଡକୁ ଭାଙ୍ଗି ‘ମନ୍ତ୍ରମୁଗ୍ଧ’ ଏକ ନୂଆ ମାଇଲଖୁଣ୍ଟ ସ୍ଥାପନ କରିଛି। ଏହା କେବଳ ଏକ ଚଳଚ୍ଚିତ୍ରର ସଫଳତା ନୁହେଁ, ବରଂ ଓଡ଼ିଆ ଯୁବ ନିର୍ଦ୍ଦେଶକ ଏବଂ ପ୍ରତିଭାବାନ ନବାଗତ କଳାକାରଙ୍କ ପାଇଁ ଏକ ବଡ଼ ବିଜୟ।
ଅମୃତ ନନ୍ଦ ଙ୍କ ରିପୋର୍ଟ୍
