ତାଲଡ଼ିହି ଗ୍ରାମରେ ଆଦିବାସୀ ଗ୍ରାମ କମିଟିର ସଚେତନତା ସଭା ଅନୁଷ୍ଠିତ
ତେନସା, ୧୦/୦୫ : ତନ୍ତରା, ଫୁଲଝର ଓ ତାଲଡ଼ିହି ଆଦିବାସୀ ଗ୍ରାମ କମିଟିର ସମ୍ପାଦକ ଶ୍ରୀ ସୁରେଶ୍ ମୁଣ୍ଡାଙ୍କ ଆହ୍ୱାନକ୍ରମେ ରବିବାର ଦିବା ୧୦ ଘଟିକା ସମୟରେ ତାଲଡ଼ିହି ଗ୍ରାମରେ ଏକ ସଚେତନତାମୂଳକ ସଭା ଅନୁଷ୍ଠିତ ହୋଇଥିଲା । ସଭାରେ ବେରେଲ୍ ମୁଣ୍ଡା ସଭାପତିତ୍ୱ କରିଥିଲେ ।
ସଭାରେ କମିଟିର ବିଭିନ୍ନ ପଦାଧିକାରୀ ଓ ଗ୍ରାମବାସୀମାନେ ଉପସ୍ଥିତ ରହି ଗ୍ରାମ ଉନ୍ନତି, ଜଙ୍ଗଲ ଅଧିକାର, ଶିକ୍ଷା, ସ୍ୱାସ୍ଥ୍ୟ ଓ ଆଦିବାସୀ ଅଧିକାର ସମ୍ପର୍କରେ ଆଲୋଚନା କରିଥିଲେ । ଉପସଭାପତି ବେରେଲ୍ ମୁଣ୍ଡା ଗ୍ରାମର କ୍ଷମତା ବୃଦ୍ଧି, ପେସା ଆଇନ–୧୯୯୬, ଜଙ୍ଗଲ ଅଧିକାର ଆଇନ ସହ ଶିକ୍ଷା ଓ ସ୍ୱାସ୍ଥ୍ୟ ବିଷୟରେ ଗ୍ରାମବାସୀଙ୍କୁ ସଚେତନ କରିଥିଲେ ।
ସମ୍ପାଦକ ଶ୍ରୀ ସୁରେଶ୍ ମୁଣ୍ଡା ଜଙ୍ଗଲ ସୁରକ୍ଷା, ଶ୍ରମିକଙ୍କ ଅଧିକାର ଓ ୨୦୧୩ ଏବଂ ୨୦୨୨ ମସିହାରେ ହୋଇଥିବା ଜନଶୁଣାଣୀ ସମ୍ପର୍କରେ ମତ ପ୍ରକାଶ କରିଥିଲେ । ସେ କହିଥିଲେ ଯେ, SAIL କର୍ତ୍ତୃପକ୍ଷ ଦ୍ୱାରା ପ୍ରଭାବିତ ଚୋରଧରା ଓ ତେନସା ଅଞ୍ଚଳର ବିଭିନ୍ନ ଗ୍ରାମର ବେକାର ଆଦିବାସୀ ଯୁବକ–ଯୁବତୀଙ୍କୁ ନିଯୁକ୍ତି ଓ ଦକ୍ଷତା ଅଭିବୃଦ୍ଧି ଦିଗରେ ପଦକ୍ଷେପ ନିଆଯିବା ଆବଶ୍ୟକ । ସେ ଏହା ମଧ୍ୟ କହିଥିଲେ ଯେ, ବିଗତ ୧୦ ବର୍ଷ ଧରି ଚାଲୁଥିବା ଲୌହଖଣି ସମ୍ପର୍କିତ ସମସ୍ୟାଗୁଡ଼ିକୁ ଗ୍ରାମ କମିଟି ତୃଣମୂଳ ସ୍ତରରୁ ସଂଗ୍ରହ କରି ଜିଲ୍ଲା ପ୍ରଶାସନଙ୍କ ନଜରକୁ ଆଣିଲେ ଗ୍ରାମର ବିକାଶ ସମ୍ଭବ ହେବ ।
ଏହି ଅବସରରେ ଲାଦୁରା ମୁଣ୍ଡା ସାମାଜିକ ଓ ଅର୍ଥନୈତିକ ବିକାଶ ପାଇଁ ଆଧୁନିକ ଶିକ୍ଷିତ ଯୁବକମାନେ ଆଗକୁ ଆସି ସରକାରୀ ଯୋଜନା ଓ ସଚେତନତା କାର୍ଯ୍ୟରେ ସାମିଲ ହେବା ଆବଶ୍ୟକ ବୋଲି କହିଥିଲେ । ସେହିପରି ଅଭିମନ୍ୟୁ ନାଏକ ମଧ୍ୟ ସାମାଜିକ ଓ ଅର୍ଥନୈତିକ ବିକାଶର ଦିଗଦର୍ଶନ ଦେଇଥିଲେ ।ସଭାରେ କମିଟିର ଉପଦେଷ୍ଟା ସାବନ ମୁଣ୍ଡାଙ୍କ ସହ ଉଗ୍ରେସନ ବାରିକ୍, ବାଇଗ ମୁଣ୍ଡା, ମୋରା ମୁଣ୍ଡା, ଜିଗର ମୁଣ୍ଡା, କଙ୍କୁଆ ମୁଣ୍ଡା ଓ ତାଲଡ଼ିହି ଗ୍ରାମର ବହୁ ଗ୍ରାମବାସୀ ଉପସ୍ଥିତ ଥିଲେ ।
ବନମାଳି ବାରିକ ଙ୍କ ରିପୋର୍ଟ୍
