୧୪ ବର୍ଷରୁ କମ୍ ଆନ୍ତଃଜିଲ୍ଲା ସ୍ତରୀୟ ଫୁଟବଲ୍ ଚାମ୍ପିଅନସିପ୍ ୨୦୨୬ (ବାଳକ ଓ ବାଳିକା) ସମାପନ ସମାରୋହ
ରାଉରକେଲା ୧୧/୬, ଓଡିଶା ସରକାରଙ୍କ ସହଯୋଗରେ, ଫୁଟବଲ୍ ଆସୋସିଏସନ୍ ଅଫ୍ ଓଡ଼ିଶା ପକ୍ଷରୁ ବୁଧବାର ସନ୍ଧ୍ୟାରେ ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମରେ ଅନୁଷ୍ଠିତ ଦ୍ବିତୀୟ ୧୪ ବର୍ଷରୁ କମ୍ ଆନ୍ତଃଜିଲ୍ଲା ସ୍ତରୀୟ (ବାଳିକା ଓ ବାଳକ) ମୁଖ୍ୟମନ୍ତ୍ରୀ ଟ୍ରଫି ୨୦୨୬, ଫୁଟବଲ୍ ଚାମ୍ପିଅନସିପ୍ ସଫଳତାର ସହିତ ଶେଷ ହୋଇଯାଇଛି।
ଓଡିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦୃଷ୍ଟିକୋଣରୁ ଆରମ୍ଭ ହୋଇଥିବା ଏହି ଚାମ୍ପିଅନସିପ୍ ରାଜ୍ୟରେ ତୃଣମୂଳ ସ୍ତରରେ ଫୁଟବଲର ପ୍ରଚାର ଏବଂ ବିକାଶ ପାଇଁ ଏକ ଐତିହାସିକ ପଦକ୍ଷେପ ଭାବରେ ଉଭା ହୋଇଛି। ଏହି ଚାମ୍ପିଅନସିପକୁ ସଫଳ କରିବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କ୍ରୀଡା ଓ ଯୁବ ସେବା ମନ୍ତ୍ରୀ ସୂର୍ଯ୍ୟବଂଶୀ ସୁରଜ ଏବଂ ଓଡ଼ିଶା ସରକାରଙ୍କ କ୍ରୀଡା ଓ ଯୁବ ସେବା ବିଭାଗକୁ ସେମାନଙ୍କର ଅମୂଲ୍ୟ ସମର୍ଥନ ଓ ପ୍ରତିବଦ୍ଧତା ପାଇଁ ଓଡ଼ିଶା ଫୁଟବଲ୍ ଆସୋସିଏସନ୍ ଆନ୍ତରିକ କୃତଜ୍ଞତା ପ୍ରଦାନ କରାଯାଇଥିଲା।
ସମାପନ ସମାରୋହରେ ରାଉରକେଲା ବିଧାୟକ ସାରଦା ପ୍ରସାଦ ନାୟକ, ଜିଲ୍ଲା ଏସଡିସି ଅଧ୍ୟକ୍ଷ ସନ୍ତୋଷ ଅମାତ, ରାଉରକେଲା ଅତିରିକ୍ତ ଜିଲ୍ଲାପାଳ ତଥା ମହାନଗର ନିଗମ କମିଶନର ଦୀନାଃ ଦସ୍ତଗୀର୍, ପାନପୋଷ ଉପଜିଲ୍ଲାପାଳ ଚନ୍ଦ୍ରକାନ୍ତ ମଲ୍ଲିକ, ରାଉରକେଲା ସୂଚନା ଓ ଲୋକସମ୍ପର୍କ ଅଧିକାରୀ ଶ୍ରୀମତୀ ସୀମା ଫାତିମା ଏକ୍କା, ଡିଏସ୍ଓ୍ବାଇଏସ୍ ଉପ-ନିର୍ଦ୍ଦେଶକ ସୁଦିପ୍ତ ନାଏକ, ଓଡ଼ିଶା ଅଲିମ୍ପିକ୍ ଆସୋସିଏସନର ସଚିବ ତଥା ଏଫ୍ଏଓ ଯୁଗ୍ମ ସଚିବ ଅଭିଜିତ୍ ପାଉଲ, ସୁନ୍ଦରଗଡ ଡିଏଏ ସଚିବ ପ୍ରଭାତ ଭୋଳ, ଓଡିଶା ଫୁଟବଲ୍ ଆସୋସିଏସନର ଯୁଗ୍ମ ସମ୍ପାଦକ ବିଶ୍ବରଞ୍ଜନ ଘଡେଇ ପ୍ରମୁଖ ଉପସ୍ଥିତ ଥିଲେ।
ଫାଇନାଲରେ ଭୁବନେଶ୍ୱର (ବାଳିକା) ୧-୦ରେ ବିଜୟୀ ହୋଇ ଟ୍ରଫି ଏବଂ ପୁରସ୍କାର ୧ ଲକ୍ଷ ଟଙ୍କା ପାଇଥିଲା ବେଳେ ରନର୍ସ ଅପ୍ କେଉଁଝର ୭୫ ହଜାର ଟଙ୍କା ପୁରସ୍କାର ପାଇଥିଲେ। ସେହିପରି ମ୍ଯାନ ଅଫ ଦି ମ୍ୟାଚ୍ ସକୁନ୍ତଳା ସିଂକୁ (ଭୁବନେଶ୍ୱର) ୧୦ ହଜାର ଟଙ୍କା ପ୍ରଦାନ କରାଯାଇଥିଲା। ମ୍ଯାନ ଅଫ୍ ଦି ଟୁର୍ଣ୍ଣାମେଣ୍ଟ ଭାବରେ ଖେଳାଳି ପୂଜା ଓରାମ (କେଉଁଝର)ଙ୍କୁ ୧୫ ହଜାର ଟଙ୍କା ପୁରସ୍କାର ରାଶି ପ୍ରଦାନ କରାଯାଇଥିଲା।
ସେହିପରି ବାଳକ ବର୍ଗରେ ବରଗଡ଼ ୧-୦ ଗୋଲରେ ବିଜୟୀ ହୋଇ ଚାମ୍ପିଅନ୍ ହୋଇଥିଲା। ବରଗଡ଼କୁ ଟ୍ରଫି ଏବଂ ପୁରସ୍କାର ରାଶି ୧ ଲକ୍ଷ ଟଙ୍କା ପ୍ରଦାନ କରାଯାଇଥିଲା। ରନର୍ସ-ଅପ୍ ଯାଜପୁରକୁ ପୁରସ୍କାର ରାଶି ୭୫ ହଜାର ଟଙ୍କା ପ୍ରଦାନ କରାଯାଇଥିଲା। ଫାଇନାଲ ମ୍ୟାଚର ମ୍ଯାନ୍ ଅଫ୍ ଦି ମ୍ୟାଚ୍ ଖେଳାଳି ରୋହନ ସୁନା (ବରଗଡ଼) ପୁରସ୍କାର ରାଶି ୧୦ ହଜାର ଟଙ୍କା ଏବଂ ଟୁର୍ଣ୍ଣାମେଣ୍ଟର ଖେଳାଳି ଭାବେ ଲକ୍ଷ୍ମଣ ମାଝୀ(ଯାଜପୁର)ଙ୍କୁ ୧୫ ହଜାର ଟଙ୍କା ପ୍ରଦାନ କରାଯାଇଥିଲା।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
