ସତ୍ୟମ ଶିବମ ସୁନ୍ଦରମ୍
ଆହେ ସଦାଶିବ ପ୍ରଭୁ ଶଙ୍କର
ପାରିକର ମୋ ଜୀବନ ଚକର
ତୁମରି ଆଶିଷ ଥିଲେ ଯେ ସଦା
ଜୀବନେ ଆସେନି କେବେବି ବାଧା ।।
ହୃଦୟରେ ମୋର ତୋଳିଛ ଘର
ଘର ନୁହେଁ ସେ ମୋ ପୂଜା ମନ୍ଦିର
ଜନ୍ମଜନ୍ମ ପାଇଁ ଆମ ବନ୍ଧନ
ସାଜନ୍ତି କି ତୁମ ମଥା ଚନ୍ଦନ ।।
ତୁମେ ମୋର ବନ୍ଧୁ ଅଟ ଯେ ସଖା
ଦେବନାହିଁ ମୋତେ କେବେ ଯେ ଧୋକା
ତୁମରି ପ୍ରେମରେ ପଡିଛି ବନ୍ଧା
ତୁମ ସାଥେ ମୋ ମନ ଯେ ଛନ୍ଦା ।।
ଧନଜନ ସବୁ ଅଟେ ଅସାର
ତୁମରି ଭଜନ ଏକା ହିଁ ସାର
ସଂସାର ନାଆରେ ତୁମେ ନାଉରୀ
ତୁମରି କୋଳରେ ଯାଆନ୍ତି ମରି ।।
ସବୁ ସଫଳତା ତୁମରି ଲାଗି
ତୁମେ ଏକା ପ୍ରଭୁ ଅଟଇ ଯୋଗୀ
ସୁଖଦୁଃଖ ଭରା ଏଇ ଦୁନିଆଁ
ମରିଗଲେ ଦେହେ ଦେବେରେ ନିଆଁ ।।
ମୁକ୍ତିରାଣୀ ଦେବତା
ମନ୍ଦାରଖଣ୍ଡ,ଯାଜପୁର
