ସକଳ ଘଟେ ନାରାୟଣ
କବି ସୌରଭ ବୈଜୟନ୍ତୀ ମାଳା ମହାପାତ୍ର
ସକଳ ଘଟେ ନାରାୟଣ
ବଦ୍ରିକା ଯିବ କି କାରଣ ll
ତୋଷିବ ଯେବେ ହେ ଜୀବକୁ
ଲଭିବ ପରମ ଗତିକୁ ll
ସମ ଭାବନା ସମାଦର
ପୀରତି ଢାଳି ନିରନ୍ତର ll
ସକଳ ଆତମା ତୃପତ
ଯେ କରେ ଲଭେ ଶାନ୍ତି ଶତ ll
ଈଶ୍ୱର କରୁଣା ଢାଳନ୍ତି
ପ୍ରିୟ ଭକତ ସେ ବୋଲାନ୍ତି ll
ଦୟା ଭାବକୁ ଯେହୁ ଧରି
ପ୍ରାଣୀକୁ ଆପଣାର କରି ll
ଅସହାୟକୁ ସାହା ହୁଏ
ଇଶ୍ଵର କୃପା ସେହୁ ପାଏ ll
ହୁଅନ୍ତି ତୃପତ ଇଶ୍ଵର
ଆଶିଷ ଢାଳି ନିରନ୍ତର ll
ପ୍ରତି ହୃଦରେ ବିଜେ କରି
କରି କରାନ୍ତି ସେ ମୁରାରି ll
ସଦାଚାରରେ ଯେହୁ ରହେ
ତାଙ୍କ ଆଶିଷ ସେହୁ ପାଏ ll
ସେ ନିରାକାର ନାରାୟଣ
ପ୍ରତି ଘଟରେ ଥାନ୍ତି ପୁଣ ll
ତେଣୁ ସଭିଙ୍କୁ କଲେ ତୋଷ
ସେ ହରି ହୁଅନ୍ତି ସନ୍ତୋଷ ll
ତାଙ୍କରି କୃପା ଯିଏ ପାଏ
ସଦ ଭାବନା ତା’ର ଥାଏ ll
ସତ୍ୟ,ଧର୍ମ ଓ କ୍ଷମା, ନ୍ୟାୟ
ପ୍ରେମକୁ କରଇ ପାଥେୟ ll
ଜୀବରେ ଦୟା ଭାବ ବହି
ନାମରେ ବିଶ୍ଵାସ ରଖଇ ll
ସନ୍ତୋଷ କରେ ସବୁ ଚିତ୍ତ
ତାହା ହିଁ ତାହା ପାଇଁ ବିତ୍ତ ll
ସଦା ଆନନ୍ଦ ସିଏ ହୁଏ
ଶେଷେ ବିଭୁଙ୍କ ପାଶେ ଯାଏ ll
ସକଳ ଘଟେ ନାରାୟଣ
ତେଣୁ ହେ ତୀର୍ଥ କି କାରଣ ll
ଫୁଲବାଣୀ, କନ୍ଧମାଳ
