ବିଜିୟୁ ପକ୍ଷରୁ ବିର୍ଲା ସ୍କୁଲ୍ ଅଫ୍ ଲ’ର ନୂତନ ବିଦ୍ୟାର୍ଥୀଙ୍କ ପାଇଁ ଶିକ୍ଷାରମ୍ଭ ଉତ୍ସବ -୨୦୨୬ ଅନୁଷ୍ଠିତ
ବିବିଏ ଏଲ୍ଏଲ୍.ବି. (ଅନର୍ସ) ୨୦୨୬–୩୧ ଏବଂ ଏଲ୍ଏଲ୍.ଏମ୍. ୨୦୨୬–୨୭ ପାଠ୍ୟକ୍ରମର ଛାତ୍ରଛାତ୍ରୀମାନଙ୍କ ଶୈକ୍ଷିକ ଯାତ୍ରା ଆରମ୍ଭ
ଭୁବନେଶ୍ୱର, ଜୁଲାଇ ୩୦, ୨୦୨୬ : ପୂର୍ବ ଭାରତର ଅଗ୍ରଣୀ ଉଚ୍ଚଶିକ୍ଷା ଅନୁଷ୍ଠାନ ବିର୍ଲା ଗ୍ଲୋବଲ୍ ୟୁନିଭର୍ସିଟି (ବିଜିୟୁ) ପକ୍ଷରୁ ବିର୍ଲା ସ୍କୁଲ୍ ଅଫ୍ ଲ’ର ନୂତନ ଛାତ୍ରଛାତ୍ରୀଙ୍କ ପାଇଁ ଶିକ୍ଷାରମ୍ଭ ଉତ୍ସବ -୨୦୨୬ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମ ମାଧ୍ୟମରେ ବିବିଏ ଏଲ୍ଏଲ୍.ବି. (ଅନର୍ସ) ୨୦୨୬–୩୧ ଏବଂ ଏଲ୍ଏଲ୍.ଏମ୍. ୨୦୨୬–୨୭ ପାଠ୍ୟକ୍ରମରେ ନାମ ଲେଖାଇଥିବା ବିଦ୍ୟାର୍ଥୀମାନେ ସେମାନଙ୍କର ଶୈକ୍ଷିକ ଯାତ୍ରାର ଶୁଭାରମ୍ଭ କରିଛନ୍ତି।
ଏହି ସମାରୋହରେ ଓଡ଼ିଶା ଉଚ୍ଚନ୍ୟାୟାଳୟର ପ୍ରାକ୍ତନ ବିଚାରପତି ମାନ୍ୟବର ଜଷ୍ଟିସ୍ ବିଜୟ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ‘ଖୈତାନ୍ ଆଣ୍ଡ୍ କମ୍ପାନୀ’ର ପ୍ରିନ୍ସିପାଲ୍ ଆସୋସିଏଟ୍ ଶ୍ରୀ ଦିବ୍ୟାଂଶ ଯୋଶୀ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏଥିସହ ବିର୍ଲା ଗ୍ଲୋବଲ୍ ୟୁନିଭର୍ସିଟିର କୁଳପତି ପ୍ରଫେସର କୁଲଭୂଷଣ ବଲୁନି, ବିର୍ଲା ସ୍କୁଲ୍ ଅଫ୍ ଲ’ର ଡିନ୍ ପ୍ରଫେସର ଡଃ ସୁକାନ୍ତ କୁମାର ନନ୍ଦ ଏବଂ କୁଳସଚିବ ଶ୍ରୀ ତନ୍ମୟ କୁମାର ପଟ୍ଟନାୟକଙ୍କ ସମେତ ଅଧ୍ୟାପକ, ଅଧ୍ୟାପିକା, ପୁରାତନ ଛାତ୍ରଛାତ୍ରୀ, କର୍ମଚାରୀ ଓ ବିଦ୍ୟାର୍ଥୀମାନେ ଉପସ୍ଥିତ ଥିଲେ।
ଦୀକ୍ଷାନ୍ତ ଅଭିଭାଷଣ ପ୍ରଦାନ କରି ମାନ୍ୟବର ଜଷ୍ଟିସ୍ ବିଜୟ କୁମାର ନାୟକ ଗୁରୁତ୍ୱାରୋପ କରି କହିଥିଲେ,* “ଆଇନର ବିସ୍ତୃତ କ୍ଷେତ୍ର ଏକ ସୀମାହୀନ ଆକାଶ ସଦୃଶ। ଜଣେ ସଫଳ ଆଇନଜୀବୀ ହେବା ପାଇଁ କେବଳ ଆଇନ ଜାଣିବା ଯଥେଷ୍ଟ ନୁହେଁ; ଏହା ସଚ୍ଚୋଟତା, ଦୃଢ଼ ନୈତିକ ମୂଲ୍ୟବୋଧ ଏବଂ ଗଭୀର ଦକ୍ଷତା ଉପରେ ନିର୍ଭର କରେ।”
ଉପସ୍ଥିତ ବିଦ୍ୟାର୍ଥୀଙ୍କୁ ସମ୍ବୋଧିତ କରି ଶ୍ରୀ ଦିବ୍ୟାଂଶ ଯୋଶୀ କହିଥିଲେ, “ଛାତ୍ରଜୀବନ ପରେ ଆପଣ ଏପରି ପରିବେଶ ବିରଳ ଭାବେ ପାଇବେ—ଯେଉଁଠାରେ ପ୍ରଶ୍ନ ପଚାରିବାକୁ ସ୍ୱାଗତ କରାଯାଏ ଏବଂ ଭୁଲଗୁଡ଼ିକୁ ଶିଖିବାର ଗୁରୁତ୍ୱପୂର୍ଣ୍ଣ ସୁଯୋଗ ଭାବେ ଗ୍ରହଣ କରାଯାଏ। ସମୀକ୍ଷାତ୍ମକ ଦୃଷ୍ଟିକୋଣରୁ ଚିନ୍ତା କରନ୍ତୁ, ଗଭୀର ଭାବେ ନିରୀକ୍ଷଣ କରନ୍ତୁ ଏବଂ ନିଜ ସହପାଠୀ, ଗୁରୁଜନ ଓ ଆଖପାଖର ଦୁନିଆରୁ ନିରନ୍ତର ଶିଖନ୍ତୁ। ନିଜର ବ୍ୟକ୍ତିଗତ ବିକାଶ ପାଇଁ କୃତ୍ରିମ ବୁଦ୍ଧିମତ୍ତା (ଏଆଇ) ଏବଂ ଆଧୁନିକ ଜ୍ଞାନକୌଶଳର ସାହାଯ୍ୟ ନିଅନ୍ତୁ।”
ନୂତନ ବ୍ୟାଚ୍ କୁ ଉଦବୋଧନ ଦେଇ କୁଳପତି ପ୍ରଫେସର କୁଲଭୂଷଣ ବଲୁନି କହିଥିଲେ, “ପାଠ୍ୟପୁସ୍ତକ ବାହାରେ ବ୍ୟାପକ ପଠନ କରିବା ଅତ୍ୟନ୍ତ ଆବଶ୍ୟକ। ଯଦିଓ ପ୍ରଯୁକ୍ତିବିଦ୍ୟା ଏବଂ କୃତ୍ରିମ ବୁଦ୍ଧିମତ୍ତା (ଏଆଇ) ସାଧାରଣ କାର୍ଯ୍ୟକୁ ସମାନ କିମ୍ବା ଅଧିକ ଦକ୍ଷତାର ସହ କରିପାରନ୍ତି, କିନ୍ତୁ ମାନବୀୟ ଚିନ୍ତନ, ସୂକ୍ଷ୍ମ ତର୍କଶକ୍ତି ଏବଂ ଗଭୀର ଅନୁଧ୍ୟାନ ଆପଣଙ୍କୁ ସଦାସର୍ବଦା ଆଗରେ ରଖିବ।”
ନୂତନ ଛାତ୍ରଛାତ୍ରୀଙ୍କୁ ସ୍ୱାଗତ କରି ବିର୍ଲା ସ୍କୁଲ୍ ଅଫ୍ ଲ’ର ଡିନ୍ ପ୍ରଫେସର ଡଃ ସୁକାନ୍ତ କୁମାର ନନ୍ଦ କହିଥିଲେ, ” ଏକ ଭବିଷ୍ୟତମୁଖୀ ଅନୁଷ୍ଠାନ ଭାବେ, ଆମେ ଶିଳ୍ପ ଜଗତର ଆବଶ୍ୟକତା ଅନୁଯାୟୀ ଆମର ପାଠ୍ୟକ୍ରମକୁ ନିୟମିତ ଭାବେ ଅପଡେଟ୍ କରିଥାଉ, ଯାହାଦ୍ୱାରା ଆମର ଛାତ୍ରଛାତ୍ରୀମାନେ ଉତ୍ତୀର୍ଣ୍ଣ ହେବା ପରେ କାର୍ଯ୍ୟକ୍ଷେତ୍ର ପାଇଁ ସମ୍ପୂର୍ଣ୍ଣ ପ୍ରସ୍ତୁତ ହୋଇପାରିବେ।”
ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇ କୁଳସଚିବ ଶ୍ରୀ ତନ୍ମୟ କୁମାର ପଟ୍ଟନାୟକ କହିଥିଲେ, “ଆଜିର ଏହି ପ୍ରତିଯୋଗିତାମୂଳକ ବିଶ୍ୱରେ, ରଣନୈତିକ ଯୋଜନା, ଶୃଙ୍ଖଳା, ନିରନ୍ତର ଅଭ୍ୟାସ, ଆତ୍ମବିଶ୍ୱାସ ଏବଂ ସୁଦୃଢ଼ ନୈତିକତାକୁ ବଜାୟ ରଖି ନିଜ ଲକ୍ଷ୍ୟ ପ୍ରତି ଏକାଗ୍ର ରହିବା ହିଁ ସଫଳତାର ପ୍ରକୃତ ଚାବିକାଠି। ମନେରଖନ୍ତୁ: ଶ୍ରେଷ୍ଠତା ହାସଲ କରିବା ପାଇଁ କୌଣସି ସଂକ୍ଷିପ୍ତ ମାର୍ଗ ନାହିଁ।”ବିର୍ଲା ସ୍କୁଲ୍ ଅଫ୍ ଲ’ର ଆସୋସିଏଟ୍ ପ୍ରଫେସର ଡଃ ମିତାଶ୍ରୀ ତ୍ରିପାଠୀ ଧନ୍ୟବାଦ ଅର୍ପଣ କରିବା ପରେ କାର୍ଯ୍ୟକ୍ରମ ସମାପନ ହୋଇଥିଲା।
ଲିପିକା ରାଣୀ ରାଉତ ଙ୍କ ରିପୋର୍ଟ୍
