ହାତୀ ଚଲାପଥରେ ଦନ୍ତାହାତୀର ମୃତ୍ୟୁ
ବୃନ୍ଦାବାଡ଼ି ନିକଟରେ ଟ୍ରେନ୍ ଧକ୍କା; ହାତୀ ସୁରକ୍ଷା ବ୍ୟବସ୍ଥାକୁ ନେଇ ଉଠିଲା ବଡ଼ ପ୍ରଶ୍ନ
ଟ୍ରାକର ଓ ବନ କର୍ମଚାରୀଙ୍କ ଭୂମିକା ଯାଞ୍ଚ ସହ ଉଚ୍ଚସ୍ତରୀୟ ତଦନ୍ତ ଦାବି
ରାୟଗଡ଼ା/ମୁନିଗୁଡ଼ା, ୧୦ ସେପ୍ଟେମ୍ବର: ରାୟଗଡ଼ା ଜିଲ୍ଲାର ବିଷମକଟକ–ଥେରୁବାଲି ରେଳପଥରେ ଟ୍ରେନ୍ ଧକ୍କାରେ ଏକ ଦନ୍ତାହାତୀର ମୃତ୍ୟୁକୁ ନେଇ ବନ ବିଭାଗର ହାତୀ ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠିଛି। ମୁନିଗୁଡ଼ା ରେଞ୍ଜ ଅନ୍ତର୍ଗତ ବିଷମକଟକ ସେକ୍ସନ୍ର ବଡ଼ ବୃନ୍ଦାବାଡ଼ି ନିକଟରେ ବୁଧବାର ବିଳମ୍ବିତ ରାତିରେ ଏହି ଅଘଟଣ ଘଟିଥିବା ଜଣାପଡ଼ିଛି।
ସୂଚନା ଅନୁସାରେ, ବିଷମକଟକ ଓ ଥେରୁବାଲି ଷ୍ଟେସନ୍ ମଧ୍ୟରେ ରେଳଧାରଣା ଅତିକ୍ରମ କରୁଥିବା ସମୟରେ ଦନ୍ତାହାତୀଟି ଏକ ଟ୍ରେନ୍ର ଧକ୍କାରେ ପ୍ରାଣ ହରାଇଥିଲା। ଧକ୍କା ଏତେ ଜୋରଦାର ଥିଲା ଯେ ହାତୀର ମୃତଦେହ ରେଳଧାରଣାଠାରୁ ପ୍ରାୟ ତିନି ମିଟର ଦୂରରେ ପଡ଼ିଥିବା ଜଣାପଡ଼ିଛି।
ଘଟଣା ସମ୍ପର୍କରେ ଖବର ପାଇବା ପରେ ବନ ବିଭାଗର ଅଧିକାରୀ ଓ କର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ। ରେଳ ପୁଲିସ ଓ ହାତୀ ସୁରକ୍ଷା ଦଳ ମଧ୍ୟ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ମୃତ ହାତୀର ବୟସ, ଘଟଣାର ସଠିକ୍ ସମୟ ଏବଂ କେଉଁ ଟ୍ରେନ୍ ଧକ୍କା ଦେଇଥିଲା, ସେନେଇ ତଦନ୍ତ ଜାରି ରହିଛି।
ଚିହ୍ନଟ ହାତୀ ଚଲାପଥରେ ପୁଣି ଅଘଟଣ
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ବୃନ୍ଦାବାଡ଼ି ଅଞ୍ଚଳ ଦେଇ ହାତୀପଲଙ୍କ ଚଳପ୍ରଚଳ ରହିଥିବା ଏବଂ ଏହି ଅଞ୍ଚଳକୁ ହାତୀ ଚଲାପଥ ଭାବେ ଚିହ୍ନଟ କରାଯାଇଥିବା କୁହାଯାଉଛି। ମୁନିଗୁଡ଼ା ରେଞ୍ଜରୁ କଲ୍ୟାଣସିଂହପୁର ଅଭିମୁଖେ ହାତୀପଲଙ୍କ ଯାତାୟାତ ରହିଥିବାରୁ ଏହି ରେଳପଥ ଅଞ୍ଚଳରେ ବନ ବିଭାଗ ଓ ରେଳ ବିଭାଗ ପକ୍ଷରୁ ସ୍ୱତନ୍ତ୍ର ସତର୍କତା ବ୍ୟବସ୍ଥା ରହିବା ଆବଶ୍ୟକ ବୋଲି ପରିବେଶପ୍ରେମୀମାନେ ମତ ଦେଇଛନ୍ତି।
ଏହା ପୂର୍ବରୁ ମଧ୍ୟ ବୃନ୍ଦାବାଡ଼ି ନିକଟ ରେଳଧାରଣାରେ ହାତୀ ମୃତ୍ୟୁ ଘଟିଥିବା ଅଭିଯୋଗ ରହିଛି। ତେବେ ପୂର୍ବ ଘଟଣା ପରେ ମଧ୍ୟ ଏହି ଅଞ୍ଚଳରେ ହାତୀ ସୁରକ୍ଷା ପାଇଁ କେତେ ପଦକ୍ଷେପ ନିଆଗଲା ଏବଂ ସେଗୁଡ଼ିକ କେତେଦୂର କାର୍ଯ୍ୟକାରୀ ହୋଇଛି, ତାହା ଏବେ ତଦନ୍ତର ପରିସରକୁ ଆସିଛି।
ଟ୍ରାକର ଥିବା ସତ୍ତ୍ୱେ ନଜରଦାରି କେତେ ପ୍ରଭାବଶାଳୀ?
ହାତୀଙ୍କ ଗତିବିଧି ଉପରେ ନଜର ରଖିବା ପାଇଁ ବନ ବିଭାଗ ପକ୍ଷରୁ ଏଲିଫେଣ୍ଟ ଟ୍ରାକର ନିୟୋଜିତ ହୋଇଥିବା ବେଳେ ସମ୍ପୃକ୍ତ ବିଟ୍ର ଦାୟିତ୍ୱରେ ଫରେଷ୍ଟର ଓ ଅନ୍ୟ ବନ କର୍ମଚାରୀ ରହିଛନ୍ତି। ଏଭଳି ସ୍ଥିତିରେ ଚିହ୍ନଟ ହାତୀ ଚଲାପଥ ନିକଟରେ ହାତୀପଲଙ୍କ ଗତିବିଧି ବିଷୟରେ ଆଗୁଆ ସୂଚନା ମିଳିଲା ନାହିଁ କାହିଁକି?
ହାତୀପଲ ରେଳପଥ ଆଡ଼କୁ ଗତି କରୁଥିବା ସୂଚନା ମିଳିଥିଲେ ରେଳ ବିଭାଗକୁ ଆଗୁଆ ସତର୍କ କରାଯାଇଥିଲା କି ନାହିଁ? ରେଳ ଚଳାଚଳ ସମୟରେ ଏହି ଅଞ୍ଚଳରେ ସ୍ପିଡ୍ ନିୟନ୍ତ୍ରଣ କିମ୍ବା ଅନ୍ୟ କୌଣସି ସତର୍କତାମୂଳକ ବ୍ୟବସ୍ଥା ଥିଲା କି? ଏଭଳି ଅନେକ ପ୍ରଶ୍ନ ଏବେ ସାଧାରଣରେ ଉଠୁଛି।
କାଗଜରେ ନୁହେଁ, କ୍ଷେତ୍ରରେ ସୁରକ୍ଷା ଦାବି
ସ୍ଥାନୀୟ ବୁଦ୍ଧିଜୀବୀ ଓ ପରିବେଶପ୍ରେମୀମାନେ କହିଛନ୍ତି ଯେ ହାତୀ ସୁରକ୍ଷା ପାଇଁ କେବଳ ଯୋଜନା ଓ କର୍ମଚାରୀ ନିଯୁକ୍ତି ଯଥେଷ୍ଟ ନୁହେଁ। ଚିହ୍ନଟ ହାତୀ ଚଲାପଥରେ ନିୟମିତ କ୍ଷେତ୍ରସ୍ତରୀୟ ନଜରଦାରି, ରେଳ ବିଭାଗ ସହ ତୁରନ୍ତ ସୂଚନା ବିନିମୟ ଏବଂ ବିପଦ ସମୟରେ ଦ୍ରୁତ ପଦକ୍ଷେପ ଆବଶ୍ୟକ।ଏହି ଘଟଣାରେ ଦାୟିତ୍ୱରେ ଥିବା ଫରେଷ୍ଟର, ଏଲିଫେଣ୍ଟ ଟ୍ରାକର ଓ ସମ୍ପୃକ୍ତ ବନ କର୍ମଚାରୀଙ୍କ ଭୂମିକା ଯାଞ୍ଚ କରାଯିବା ଦାବି ହୋଇଛି। ତେବେ ତଦନ୍ତ ଶେଷ ନହେବା ପୂର୍ବରୁ କୌଣସି କର୍ମଚାରୀଙ୍କୁ ଦୋଷୀ ଠାବ କରାଯିବା ଉଚିତ ନୁହେଁ ବୋଲି ମଧ୍ୟ ମତ ପ୍ରକାଶ ପାଇଛି।
ଉଚ୍ଚସ୍ତରୀୟ ତଦନ୍ତ ଓ ସ୍ଥାୟୀ ସୁରକ୍ଷା ବ୍ୟବସ୍ଥା ଦାବି
ଦନ୍ତାହାତୀର ମୃତ୍ୟୁ ଘଟଣାର ଉଚ୍ଚସ୍ତରୀୟ ତଦନ୍ତ କରାଯିବା ସହ ଘଟଣାରେ କୌଣସି ପ୍ରକାର ଅବହେଳା ହୋଇଥିଲେ ଦାୟିତ୍ୱ ନିର୍ଦ୍ଧାରଣ କରିବାକୁ ଦାବି ହୋଇଛି।
ଏଥିସହ ଚିହ୍ନଟ ହାତୀ ଚଲାପଥରେ ରେଳ ବିଭାଗ ଓ ବନ ବିଭାଗ ମିଳିତ ଭାବେ ସ୍ପିଡ୍ ରେଷ୍ଟ୍ରିକ୍ସନ୍, ନିୟମିତ ଟ୍ରାକ୍ ମନିଟରିଂ, ସତର୍କତା ସଙ୍କେତ, ଆବଶ୍ୟକ ସ୍ଥାନରେ ଅଣ୍ଡରପାସ୍/ୱାଇଲ୍ଡଲାଇଫ୍ କ୍ରସିଂ ଭଳି ସ୍ଥାୟୀ ବ୍ୟବସ୍ଥା କରିବାକୁ ଦାବି ହୋଇଛି।
ହାତୀଙ୍କ ଜୀବନ ରକ୍ଷା ପାଇଁ ବନ ବିଭାଗ ଓ ରେଳ ବିଭାଗ ମଧ୍ୟରେ ନିୟମିତ ସମନ୍ୱୟ ବୈଠକ କରି ଏକ ସ୍ପଷ୍ଟ ଏବଂ ଦାୟିତ୍ୱଭିତ୍ତିକ ସୁରକ୍ଷା ପ୍ରୋଟୋକଲ୍ ପ୍ରସ୍ତୁତ କରିବା ଜରୁରୀ ବୋଲି ସ୍ଥାନୀୟ ମହଲରେ ଦାବି ଉଠିଛି।
ମୁଖ୍ୟ ଦାବି:
– ଦନ୍ତାହାତୀ ମୃତ୍ୟୁର ଉଚ୍ଚସ୍ତରୀୟ ତଦନ୍ତ କରାଯାଉ।
– ସମ୍ପୃକ୍ତ ଫରେଷ୍ଟର ଓ ଏଲିଫେଣ୍ଟ ଟ୍ରାକରଙ୍କ ଭୂମିକା ଯାଞ୍ଚ କରାଯାଉ।
– ହାତୀ ଚଲାପଥରେ ରେଳ ଚଳାଚଳ ସମୟରେ ସ୍ପିଡ୍ ନିୟନ୍ତ୍ରଣ ଓ ସତର୍କତା ବ୍ୟବସ୍ଥା କଡ଼ାକଡ଼ି କରାଯାଉ।
– ବନ ବିଭାଗ ଓ ରେଳ ବିଭାଗ ମଧ୍ୟରେ ତୁରନ୍ତ ସୂଚନା ବିନିମୟ ବ୍ୟବସ୍ଥା ସୁଦୃଢ଼ କରାଯାଉ।
– ଚିହ୍ନଟ ହାତୀ ଚଲାପଥରେ ସ୍ଥାୟୀ ୱାଇଲ୍ଡଲାଇଫ୍ କ୍ରସିଂ/ଅଣ୍ଡରପାସ୍ର ସମ୍ଭାବନା ଅନୁଧ୍ୟାନ କରାଯାଉ।
ଗୌରୀ ପଟ୍ଟନାୟକ ଙ୍କ ରିପୋର୍ଟ୍
