ନବରଙ୍ଗପୁର ଜିଲ୍ଲାରେ NILP ଅନ୍ତର୍ଗତ ପ୍ରଥମ FLNAT ପରୀକ୍ଷା ସଫଳତାର ସହ ଅନୁଷ୍ଠିତ
ନବରଙ୍ଗପୁର:(ତା. ୨୦.୦୯.୨୦୨୬)(ରବି ନାରାୟଣ ମହାନ୍ତି)ନବ ଭାରତ ସାକ୍ଷରତା କାର୍ଯ୍ୟକ୍ରମ (New India Literacy Programme–NILP) ଅନ୍ତର୍ଗତ ୨୦୨୬-୨୭ ଆର୍ଥିକ ବର୍ଷର ପ୍ରଥମ ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ ମୂଲ୍ୟାୟନ ପରୀକ୍ଷା (Foundational Literacy and Numeracy Assessment Test–FLNAT) ଆଜି ନବରଙ୍ଗପୁର ଜିଲ୍ଲାରେ ସୁଚାରୁ, ଶୃଙ୍ଖଳିତ ଓ ସଫଳତାର ସହ ଅନୁଷ୍ଠିତ ହୋଇଛି।ଜିଲ୍ଲାର ସମସ୍ତ ବ୍ଲକ୍ ଅଞ୍ଚଳରେ ପ୍ରାୟ ୧,୬୬୨ଟି ପରୀକ୍ଷା କେନ୍ଦ୍ରରେ ଏହି ମୂଲ୍ୟାୟନ ପରୀକ୍ଷା ଆୟୋଜିତ ହୋଇଥିଲା। ନବ ଭାରତ ସାକ୍ଷରତା କାର୍ଯ୍ୟକ୍ରମ ଅଧୀନରେ ପଞ୍ଜୀକୃତ ବହୁ ସଂଖ୍ୟକ ଶିକ୍ଷାର୍ଥୀ ଉତ୍ସାହର ସହ ଏହି ପରୀକ୍ଷାରେ ଅଂଶଗ୍ରହଣ କରିଥିଲେ। ଶିକ୍ଷାର୍ଥୀମାନଙ୍କର ମୌଳିକ ପଢ଼ିବା, ଲେଖିବା ଓ ସଂଖ୍ୟାଜ୍ଞାନ ସମ୍ପର୍କିତ ଦକ୍ଷତାର ମୂଲ୍ୟାୟନ କରିବା ଏହି ପରୀକ୍ଷାର ପ୍ରମୁଖ ଉଦ୍ଦେଶ୍ୟ ରହିଥିଲା।ଜିଲ୍ଲାରେ ପରୀକ୍ଷାକୁ ସୁଚାରୁ ଓ ଶାନ୍ତିପୂର୍ଣ୍ଣ ଭାବେ ପରିଚାଳନା କରିବା ନିମନ୍ତେ ଜିଲ୍ଲା ଓ ବ୍ଲକ୍ ସ୍ତରରେ ବ୍ୟାପକ ପ୍ରସ୍ତୁତି ଓ ତଦାରଖ ବ୍ୟବସ୍ଥା କରାଯାଇଥିଲା। ପରୀକ୍ଷା କେନ୍ଦ୍ରଗୁଡ଼ିକରେ ଆବଶ୍ୟକୀୟ ବ୍ୟବସ୍ଥା ସୁନିଶ୍ଚିତ କରିବା ସହ ପରୀକ୍ଷାର୍ଥୀମାନଙ୍କୁ ଅନୁକୂଳ ପରିବେଶ ଯୋଗାଇଦେବା ଉପରେ ଗୁରୁତ୍ୱ ଦିଆଯାଇଥିଲା।ପରୀକ୍ଷା ପରିଚାଳନାର ତଦାରଖ ନିମନ୍ତେ ଜିଲ୍ଲା ଶିକ୍ଷା ଅଧିକାରୀ, ନବରଙ୍ଗପୁର, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ, ନବରଙ୍ଗପୁରଙ୍କ ସମେତ ସମସ୍ତ ବ୍ଲକ୍ର ବ୍ଲକ୍ ଶିକ୍ଷା ଅଧିକାରୀ ଓ ନୋଡାଲ ଅଧିକାରୀମାନେ ବିଭିନ୍ନ ପରୀକ୍ଷା କେନ୍ଦ୍ର ପରିଦର୍ଶନ କରିଥିଲେ। ସେମାନେ ପରୀକ୍ଷା କେନ୍ଦ୍ରରେ ଉପଲବ୍ଧ ମୌଳିକ ସୁବିଧା, ପରୀକ୍ଷା ପରିଚାଳନା ବ୍ୟବସ୍ଥା, ଶୃଙ୍ଖଳା ଓ ଅନ୍ୟାନ୍ୟ ପ୍ରସ୍ତୁତିର ସମୀକ୍ଷା କରିଥିଲେ।ପରିଦର୍ଶନ ସମୟରେ ଅଧିକାରୀମାନେ ଶିକ୍ଷାର୍ଥୀମାନଙ୍କ ସହ ଆଲୋଚନା କରି ପରୀକ୍ଷା ସମ୍ପର୍କରେ ସେମାନଙ୍କ ଅନୁଭୂତି ଓ ସୁବିଧା-ଅସୁବିଧା ବିଷୟରେ ଅବଗତ ହୋଇଥିଲେ। ଏଥିସହ ପରୀକ୍ଷା ପରିଚାଳନାରେ ନିୟୋଜିତ କାର୍ଯ୍ୟକର୍ତ୍ତାମାନଙ୍କ ସହ ଆବଶ୍ୟକ ଆଲୋଚନା କରି ପରୀକ୍ଷାର ସୁଚାରୁ ପରିଚାଳନା ନିଶ୍ଚିତ କରିଥିଲେ।ନବ ଭାରତ ସାକ୍ଷରତା କାର୍ଯ୍ୟକ୍ରମ ମାଧ୍ୟମରେ ନିରକ୍ଷର ବୟସ୍କମାନଙ୍କୁ ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ ପ୍ରଦାନ କରି ସେମାନଙ୍କୁ ଆତ୍ମନିର୍ଭର ଓ ସଚେତନ କରିବା ଦିଗରେ ପ୍ରୟାସ କରାଯାଉଛି। FLNAT ମାଧ୍ୟମରେ ଶିକ୍ଷାର୍ଥୀମାନେ ହାସଲ କରିଥିବା ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ ଦକ୍ଷତାର ମୂଲ୍ୟାୟନ କରାଯାଇ ସେମାନଙ୍କ ଶିକ୍ଷାଗତ ଅଗ୍ରଗତି ସମ୍ପର୍କରେ ଆକଳନ କରିବାରେ ଏହା ସହାୟକ ହେବ।ଜିଲ୍ଲାରେ ଆଜିର FLNAT ପରୀକ୍ଷାର ସଫଳ ଆୟୋଜନ ବୟସ୍କ ସାକ୍ଷରତା ଅଭିଯାନକୁ ଆହୁରି ସୁଦୃଢ଼ କରିବା ସହ ଶିକ୍ଷାରୁ ବଞ୍ଚିତ ବୟସ୍କମାନଙ୍କୁ ଶିକ୍ଷାର ମୁଖ୍ୟସ୍ରୋତରେ ସାମିଲ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ପରିଗଣିତ ହୋଇଛି।
