କିଶୋରୀ ବାଳିକାଙ୍କ ସଚେତନତାମୂଳକ ତାଲିମ ଅନୁଷ୍ଠିତ
ଢେଙ୍କାନାଳ:ତା.୨୩/୦୯/୨୦୨୬ରିଖ: (ମ ନି ସ ): ଭାପୁରସ୍ଥିତ ଭୋଳେଶ୍ୱର ଧଳ ଉଚ୍ଚ ପ୍ରାଥମିକ ବିଦ୍ୟାଳୟ ଓ ହାଇସ୍କୁଲ୍ ପରିସରରେ କିଶୋରୀ ବାଳିକାମାନଙ୍କ ପାଇଁ ଏକ ସଚେତନତାମୂଳକ ତାଲିମ କାର୍ଯ୍ୟକ୍ରମ ବୁଧବାର ଅନୁଷ୍ଠିତ ହୋଇଯାଇଛି।ଲୋକ ବିକାଶ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଡିସିପିଓ ଅନୁରାଧା ଗୋସ୍ୱାମୀ ମୁଖ୍ୟ ଅତିଥି ଭାବେ ଯୋଗଦେଇ କିଶୋରୀ ବାଳିକାମାନଙ୍କ ପ୍ରତି ହେଉଥିବା ଅଶୋଭନୀୟ ଆଚରଣ,ନିର୍ଯାତନା ଓ ଅନ୍ୟାନ୍ୟ ଅପରାଧରୁ ସୁରକ୍ଷା ପାଇଁ ଉପଲବ୍ଧ ଆଇନଗତ ସୁରକ୍ଷା ଓ ସହାୟତା ସମ୍ପର୍କରେ ବିସ୍ତୃତ ଆଲୋଚନା କରିଥିଲେ।ଶିଶୁମଙ୍ଗଳ କମିଟିର ପ୍ରାକ୍ତନ ସଦସ୍ୟ ବିଭୂତିଭୂଷଣ ଦାସ ସାମ୍ବିଧାନିକ ମୂଲ୍ୟବୋଧ,ଅଧିକାର ଓ ସମାଜ ପରିବର୍ତ୍ତନରେ କିଶୋରୀ ବାଳିକାମାନଙ୍କ ଭୂମିକା ଉପରେ ଆଲୋକପାତ କରିଥିଲେ।ଚାଇଲ୍ଡ ହେଲ୍ପଲାଇନ୍ର ପ୍ରୋଜେକ୍ଟ କୋଅର୍ଡିନେଟର ରୋଶନ କୁମାର ନନ୍ଦ ଶିଶୁମାନଙ୍କ ଅଧିକାର ଏବଂ ଜିଲ୍ଲାରେ ଚାଇଲ୍ଡ ହେଲ୍ପଲାଇନ୍ ପକ୍ଷରୁ ଶିଶୁମାନଙ୍କ ସୁରକ୍ଷା ଓ ସହାୟତା ପାଇଁ କରାଯାଉଥିବା ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଅବଗତ କରାଇଥିଲେ।ଲୋକ ବିକାଶର ସମ୍ପାଦକ ତଥା ଏକ୍ଜିକ୍ୟୁଟିଭ୍ ଡାଇରେକ୍ଟର ଶେଖ୍ ଅବଦୁଲ ସଫୀକ୍ କିଶୋରୀ ବାଳିକାମାନଙ୍କ ସଶକ୍ତୀକରଣ,ନେତୃତ୍ୱ ବିକାଶ ଓ ସୁରକ୍ଷା ଦିଗରେ ସଂଗଠନ ପକ୍ଷରୁ ନିଆଯାଉଥିବା ପଦକ୍ଷେପ ସମ୍ପର୍କରେ ଉପସ୍ଥିତ ଅତିଥି ଓ ବାଳିକାମାନଙ୍କୁ ଅବଗତ କରାଇଥିଲେ।କାର୍ଯ୍ୟକ୍ରମରେ କିଶୋରୀ ବାଳିକାମାନେ ସକ୍ରିୟ ଭାବେ ଅଂଶଗ୍ରହଣ କରି ନିଜ ଅଧିକାର,ସୁରକ୍ଷା,ଆଇନଗତ ସହାୟତା ଓ ସାମାଜିକ ଦାୟିତ୍ୱ ସମ୍ପର୍କରେ ଜ୍ଞାନ ଆହରଣ କରିଥିଲେ।ରାଜ୍ୟ ଓ ଜାତୀୟ ପୁରସ୍କାର ପ୍ରାପ୍ତ ଶିକ୍ଷାବିତ୍ କୃଷିଦା ବେଗମ୍ ସୁନ୍ଦର ଓ ସଫଳ କାର୍ଯ୍ୟକ୍ରମ ସଂଯୋଜନା କରିଥିଲେ।ଶେଷରେ ଲୋକ ବିକାଶର ଫିଲ୍ଡ କୋଅର୍ଡିନେଟର ଅନିତା ସାହୁ ଧନ୍ୟବାଦ ଅର୍ପଣ କରିଥିଲେ।ଏହାପରେ କାର୍ଯ୍ୟକ୍ରମର ସମାପନ ଘୋଷଣା କରାଯାଇଥିଲା।
ଡା.ଦେବୀ ପ୍ରସାଦ ମିଶ୍ରଙ୍କ ରିପୋର୍ଟ୍
