ଆଜିର ଦିବସର ଅନୁଚିନ୍ତା:ଅକ୍ଟୋବର ୧୫ ତାରିଖ: ଜ୍ଞାନ,ପ୍ରେରଣା ଓ ମାନବୀୟ ସଂକଳ୍ପର ମହାମିଳନ
ଡା.ଦେବୀ ପ୍ରସାଦ ମିଶ୍ର,
ସମୟର ପ୍ରବାହରେ ପ୍ରତିଟି ଦିନ ଇତିହାସର ପୃଷ୍ଠାରେ ଏକ ନୂତନ ସ୍ୱାକ୍ଷର ଅଙ୍କନ କରିଥାଏ।ଆଜି ଅକ୍ଟୋବର ୧୫ ତାରିଖ।ସମଗ୍ର ବିଶ୍ୱ,ଭାରତବର୍ଷ ଏବଂ ଆମ ପ୍ରିୟ ଓଡ଼ିଶାର ସାଂସ୍କୃତିକ ଓ ଐତିହାସିକ ଚେତନା ପାଇଁ ଏହି ଦିବସଟି ଏକ ଅନନ୍ୟ ମହତ୍ତ୍ୱ ବହନ କରେ।ଏହି ଦିନଟି ଆମକୁ ବିଜ୍ଞାନର ଶିଖରଠାରୁ ଆରମ୍ଭ କରି ସମାଜର ମୂଳଦୁଆ ପର୍ଯ୍ୟନ୍ତ ସବୁକିଛିକୁ ଅତି ନିକଟରୁ ଅନୁଭବ କରିବାକୁ ପ୍ରେରଣା ଦିଏ।
ବିଶ୍ୱ କ୍ଷେତ୍ରରେ ଆଜି ଆନ୍ତର୍ଜାତୀୟ ଗ୍ରାମୀଣ ମହିଳା ଦିବସ ପାଳନ କରାଯାଉଛି।କୃଷି,ସାମାଜିକ ବିକାଶ ଏବଂ ଖାଦ୍ୟ ସୁରକ୍ଷା କ୍ଷେତ୍ରରେ ଗ୍ରାମାଞ୍ଚଳର ମହିଳାମାନଙ୍କର ଅଦୃଶ୍ୟ କିନ୍ତୁ ଅତୁଳନୀୟ ଅବଦାନକୁ ଏହି ଦିବସ ସମ୍ମାନ ଜଣାଏ।ଏହା ସହିତ ସ୍ୱାସ୍ଥ୍ୟ ଓ ସଚେତନତାର ବାର୍ତ୍ତା ନେଇ ଆଜି ବିଶ୍ୱ ହାତଧୁଆ ଦିବସ ମଧ୍ୟ ପାଳିତ ହେଉଛି,ଯାହା ମାନବସମାଜକୁ ସୁସ୍ଥ ରହିବାର ଏକ ସହଜ ମାର୍ଗ ଶିଖାଇଥାଏ।ଆଜିର ଦିବସଟି ମଧ୍ୟ ଆନ୍ତର୍ଜାତୀୟ ସ୍ତରରେ ବିଶ୍ୱ ବିଦ୍ୟାର୍ଥୀ ଦିବସ ଭାବେ ପରିଚିତ।ଭାରତର ପୂର୍ବତନ ରାଷ୍ଟ୍ରପତି,ମହାନ ସ୍ୱପ୍ନଦ୍ରଷ୍ଟା ତଥା ଜନସାଧାରଣଙ୍କ ପ୍ରିୟ ‘ମିସାଇଲ୍ ମ୍ୟାନ୍’ ଡକ୍ଟର ଏ.ପି.ଜେ.ଅବଦୁକଲ୍ କଲାମଙ୍କର ଆଜି ପବିତ୍ର ଜନ୍ମଜୟନ୍ତୀ।ଛାତ୍ରସମାଜ ଓ ଯୁବପିଢ଼ିଙ୍କ ପାଇଁ ସେ ଥିଲେ ଜ୍ଞାନର ଆଲୋକବର୍ତ୍ତିକା।“ସେହି ସ୍ୱପ୍ନ ସତ୍ୟ ନୁହେଁ,ଯାହା ଆମେ ଶୋଇବା ଅବସ୍ଥାରେ ଦେଖୁ;ବରଂ ସ୍ୱପ୍ନ ତାହା, ଯାହା ଆମକୁ ଶୋଇବାକୁ ଦିଏ ନାହିଁ”—ତାଙ୍କ ନାମରେ ପ୍ରଚଳିତ ଏହି ପ୍ରେରଣାଦାୟକ ବାଣୀ ଆଜି ମଧ୍ୟ ବିଶ୍ୱର କୋଟି କୋଟି ଯୁବମାନସକୁ ଉଦ୍ବେଳିତ କରୁଛି।
ଭାରତ କ୍ଷେତ୍ରରେ ରାଜନୈତିକ ଏବଂ ରାଷ୍ଟ୍ରୀୟ ଇତିହାସ କ୍ଷେତ୍ରରେ ମଧ୍ୟ ଅକ୍ଟୋବର ମାସର ଏହି ସମୟଖଣ୍ଡ ଭାରତର ରାଷ୍ଟ୍ରୀୟ ଏକତା ଓ ଅଖଣ୍ଡତା ସହ ଜଡ଼ିତ ଅନେକ ଘଟଣାର ସ୍ମୃତି ବହନ କରେ। ତେବେ ୧୯୪୯ ମସିହା ଅକ୍ଟୋବର ୧୫ରେ ତ୍ରିପୁରା, ମଣିପୁର ଏବଂ ବାରାଣସୀ ଭଳି ଦେଶୀୟ ରାଜ୍ୟଗୁଡ଼ିକର ଭାରତୀୟ ସଂଘ ସହିତ ବିଧିବଦ୍ଧ ମିଶ୍ରଣ ସମ୍ପୂର୍ଣ୍ଣ ହୋଇଥିଲା।
ଓଡ଼ିଶା କ୍ଷେତ୍ରରେ ଆମ ଓଡ଼ିଶା ମାଟିର କଳା ଓ ସଂସ୍କୃତିର ବିଶ୍ୱସ୍ତରୀୟ ପ୍ରତିଷ୍ଠା କ୍ଷେତ୍ରରେ ମଧ୍ୟ ଅକ୍ଟୋବର ୧୫ର ଏକ ନିଆରା ସଂଯୋଗ ରହିଛି। ଓଡ଼ିଶାର ଇସ୍ପାତ ସହର ରାଉରକେଲାରେ ଜନ୍ମିତ ବିଶ୍ୱପ୍ରସିଦ୍ଧ ଚଳଚ୍ଚିତ୍ର ନିର୍ଦ୍ଦେଶିକା ମୀରା ନାୟାରଙ୍କ ଜନ୍ମ ମଧ୍ୟ ଆଜିର ଦିନରେ ହୋଇଥିଲା।ଚଳଚ୍ଚିତ୍ର ମାଧ୍ୟମରେ ଭାରତୀୟ ଜୀବନଧାରାକୁ ଆନ୍ତର୍ଜାତୀୟ ମଞ୍ଚରେ ଉପସ୍ଥାପିତ କରିବାରେ ତାଙ୍କର ଦକ୍ଷତା ପ୍ରଶଂସନୀୟ।
ଆଜିର ଦିବସର ଅନୁଚିନ୍ତା ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଆମେ କଲାମଙ୍କ ଜ୍ଞାନର ଆଲୋକକୁ ଆଦରି ନେବା,ଗ୍ରାମୀଣ ମହିଳାଙ୍କ ଶ୍ରମକୁ ସମ୍ମାନ ଜଣାଇବା ଏବଂ ବିଜ୍ଞାନ,ସାହିତ୍ୟ ଓ ସଂସ୍କୃତିର ସୁରକ୍ଷା ପାଇଁ ସଂକଳ୍ପବଦ୍ଧ ହେବା। ତେଣୁ,ଏହି ଦିବସରେ ଆସନ୍ତୁ,ଆମ ସମସ୍ତଙ୍କର ଜ୍ଞାନର ପ୍ରସାର,ମାନବୀୟ ମୂଲ୍ୟବୋଧର ସୁରକ୍ଷା ଏବଂ ସମାଜର ସାମଗ୍ରିକ ବିକାଶ ପାଇଁ ଆମର ନିଷ୍ଠାପୂର୍ଣ୍ଣ ପ୍ରୟାସ ହିଁ ହେବ ଆଜିର ଦିବସର ପ୍ରକୃତ ଅନୁଚିନ୍ତା।
