କୋକସରା,୫ା୬-( ମ ନି ସ ) କଳାହାଣ୍ଡି ଜିଲ୍ଲା କୋକସରା ବ୍ଲକରେ ଦାଦନ ଦୁଃଖ ଥମିବାର ନାଁ ଧରୁନି । ସପ୍ତାହେ ନ ପୁରୁଣୁ ପୁଣି ଜଣ ଦାଦନ ଶ୍ରମିକଙ୍କ ଶବ ଗାଁ କୁ ଫେରୁଛି । ମୃତ ଦାଦନ ଶ୍ରମିକ ହେଲେ ମୁଷାପାଲି ପଞ୍ଚାୟତ ଖପ୍ରାମାଲ ଗ୍ରାମର କୃଷ୍ଣ ଚନ୍ଦ୍ର ନାଏକଙ୍କ ସାନ ପୁଅ ଗଜିନ ନାଏକ (୨୧) । ଗଜିନ ପ୍ରାୟ ୪ବର୍ଷ ତଲେ ପେଟ ପାଟଣା ପାଇଁ ବେଙ୍ଗାଲୁର କୁ କାମ କରି ଯାଇଥିଲେ । ହେଲେ ଗତ କାଲି ସନ୍ଧ୍ୟା ରେ ହଠାତ ଗଜିନଙ୍କ ସ୍ୱାସ୍ଥ୍ୟ ଖରାପ ହୋଇଥିଲା । ଘର ଲୋକେ ଖବର ପାଇବା ପରେ ତାଙ୍କୁ ପଇସା ପଠାଇଥିଲେ । ହେଲେ ଡାକ୍ତରଖାନା ରେ ଚିକିତ୍ସା ହେଉଥିବା ବେଳେ ଅତ୍ୟଧିକ ସ୍ୱାସ୍ଥ୍ୟ ବିଗିଡି ଯିବାରୁ ଶନିବାର ରାତ୍ରିରେ ଗଜିନ ମୃତ୍ୟୁ ବରଣ କରିଥିବା ସୁଚନା ମିଲିଛି । ମୃତକ ଙ୍କ ବଡ଼ ଭାଇ ଟିକ ନାଏକ ମଧ୍ୟ ଅନ୍ୟ ଏକ ସ୍ଥାନରେ ଦାଦନ ଖଟୁଥିବା ବେଳେ ଭାଇଙ୍କ ମୃତ୍ୟୁ ଖବର ପାଇ ସେଠାକୁ ପହଞ୍ଚି ଥିଲେ । ଗରୀବ ପରିବାର ହୋଇଥିବାରୁ ଶବ ଆଣିବା ସକ୍ଷମ ନଥିବାବେଳେ ଧାର କରଜ କରି ଶବ ଆଣୁଥିବା ଜଣାପଡିଛି । ତେବେ ସୋମବାର ରାତିରେ ଗଜିନଙ୍କ ମୃତ ଦେହ ଗାଁ କୁ ପହଞ୍ଚିବ ବୋଲି ପରିବାର ପକ୍ଷରୁ ସୂଚନା ମିଲିଛି ।
