ଆସନ୍ତୁ କଳି ଯୁଗର ୫ଟି ବାସସ୍ଥାନ ବିଷୟରେ ଜାଣିବା
ପାଣ୍ଡବମାନେ ବାନପ୍ରସ୍ତ ଗମନ କରିବା ପରେ ଉତ୍ତରା ଏବଂ ଅଭିମନ୍ୟୁଙ୍କ ପୁତ୍ର ପରୀକ୍ଷିତଙ୍କୁ ହସ୍ତିନାପୁରର ରାଜସିଂହାସନ ପ୍ରାପ୍ତ ହେଲା । ସେ ଧର୍ମ ପୂର୍ବକ ଶାସନ କଲେ । ଏହି ସମୟରେ ରାଜା ପରୀକ୍ଷିତ ଶୁଣିଲେ ଯେ ତାଙ୍କ ରାଜ୍ୟରେ କଳି ପ୍ରବେଶ କରିଛି । ସେ ତୁରନ୍ତ କଳିକୁ ତଡିଦେବା ଲାଗି ବାହାରିଲେ । କଳିକୁ ଖୋଜି ଖୋଜି ରାଜା ପରୀକ୍ଷିତ ବିଭିନ୍ନ ନଗର, ଗ୍ରାମ, ବନସ୍ତ ବୁଲିଲେ । କିନ୍ତୁ କେଉଁ ସ୍ଥାନରେ ସେ କଳିଯୁଗର ପ୍ରଭାବ ଦେଖିପାରିଲେ ନାହିଁ। ଗୋଟିଏ ସ୍ଥାନରେ ସେ ଏକ ଗାଈ ଏବଂ ବଳଦକୁ ପରସ୍ପର ମଧ୍ୟରେ କଥାବାର୍ତ୍ତା ହେଉଥିବା ଶୁଣିଲେ । ବଳଦର ୪ ଗୋଡ଼ ମଧ୍ୟରୁ କେବଳ ଗୋଟିଏ ଭଲ ଥିଲା । ଅନ୍ୟ ୩ଟି ଭାଙ୍ଗି ଯାଇଥିଲା । ସେହି ବଳଦକୁ ଗାଈ ପଚାରୁଥିଲା- ବୃଷଭଦେବ, ଆପଣଙ୍କ ତିନୋଟି ଗୋଡ଼ କିଭଳି ଭାଙ୍ଗିଗଲା । ବଳଦ କହିଲା- କଲ୍ଯାଣୀ, ଏବେ କଳିଯୁଗର ଆଗମନ ହୋଇସାରିଛି । କଳି ଆସି ମୋର ତିନି ଗୋଡ଼ ଭାଙ୍ଗି ଦେଇଛି ଏବଂ ମୋତେ ଲାଗୁଛି ଯେ ଶେଷ ଗୋଟିଏ ଗୋଡ଼ ମଧ୍ୟ ଖୁବ୍ ଶୀଘ୍ର ଭାଙ୍ଗିଯିବ । ଗାଈ ପଚାରିଲା, ଏମିତି କାହିଁକି ? ବଳଦ କହିଲା, କଳି ହିଁ ଏପରି କରିପାରେ ।
ପରୀକ୍ଷିତ ସେହି ଗାଈ ଏବଂ ବଳଦର ବାର୍ତ୍ତାଳାପ ଶୁଣିଥିଲେ । ତାଙ୍କୁ ଏହା ଅଜବ ଲାଗିଲା । ସେ ହାତଯୋଡି କହିଲେ, ହେ ମାତା ଏବଂ ଦେବତା, ଆପଣ ସାଧାରଣ ଗାଈ, ବଳଦ ଭଳି ଦେଖାଯାଉ ନାହାନ୍ତି । ଦୟାକରି ନିଜର ପରିଚୟ ଦିଅନ୍ତୁ । ଏହାପରେ ପରୀକ୍ଷିତ ଜାଣିଲେ ଯେ ସେହି ଗାଈ ହେଉଛନ୍ତି ପୃଥିବୀ ଏବଂ ବଳଦ ହେଉଛନ୍ତି ଧର୍ମ । ଧର୍ମର ଚାରିଟି ଗୋଡ଼ ଚରଣ – ସତ୍ୟ, ଶୌଚ, କରୁଣା ଏବଂ ସେବା ମଧ୍ୟରୁ ତିନୋଟି ଚରଣ ନଷ୍ଟ ହୋଇସାରିଛି । ପୃଥିବୀ ମଧ୍ୟ କ୍ଷୀଣ ହୋଇଗଲାଣି ।
ଏହାପରେ ରାଜା ସେମାନଙ୍କୁ କଳିଯୁଗର ବାସସ୍ଥାନ କେଉଁଠି ବୋଲି ପଚାରିଲେ । ଧର୍ମ କହିଲେ, କଳି ମନରେ ରହିଥାଏ ଏବଂ ସେ ହିଁ ମନୁଷ୍ୟକୁ ବିଭ୍ରାନ୍ତି କରିଥାଏ । ତେଣୁ କଳିର ପ୍ରଭାବରେ ଧର୍ମପୂର୍ଣ୍ଣ ହୃଦୟ ଅଧର୍ମ କରିବା ଲାଗି ବାଧ୍ୟ ହୋଇଥାଏ । ପରୀକ୍ଷିତ କଳିକୁ ଖୋଜିଲେ ଏବଂ ଏକ ଶିଶୁ ରୂପରେ ତାକୁ ଦେଖିବାକୁ ପାଇଲେ । ତାକୁ ମାରିବା ଲାଗି ରାଜା ଉଦ୍ଯତ ହେଲେ ।
କଳି ଚିତ୍କାର କଲା ଏବଂ କହିଲା- କ୍ଷମା କରନ୍ତୁ ମହାରାଜ ! ମୁଁ ଆପଣଙ୍କ ଶରଣାପନ୍ନ । ପରୀକ୍ଷିତ ତାକୁ ଅଭୟ ବର ଦେଇ କହିଲେ, ମୁଁ ତୁମକୁ ଗୋଟିଏ ସର୍ତ୍ତରେ କ୍ଷମା କରିପାରେ । ତୁମେ ଏହି ପୃଥିବୀ ଛାଡି ଚାଲିଯାଅ । କଳି ନିଜ ନିରାଶା ଜାହିର କରି କହିଲା – କୁଆଡ଼େ ଯିବି ? ବିଧାତା ମୋତେ ପୃଥିବୀରେ ରହିବା ଲାଗି ଆଦେଶ ଦେଇଛନ୍ତି । ହଁ ଏତିକି କରିପାରେ ଯେ ଆପଣ ମୋତେ ଯେଉଁ ୫ଟି ସ୍ଥାନ ଦେବେ , ମୁଁ ସେଇଠି ରହିବି । ତିଳେମାତ୍ର ସେହି ସ୍ଥାନରୁ ଏପଟ ସେପଟ ହେବି ନାହିଁ ।
ପରୀକ୍ଷିତ କହିଲେ – ଠିକ୍ ଅଛି, ତା ହେଲେ ତୁ ଦ୍ଯୁତ(ଛଳ), ମଦ୍ୟପାନ(ବ୍ଯସନ), ପରସ୍ତ୍ରୀ ସଙ୍ଗ(ବ୍ଯଭିଚାର), ହିଂସା ଏବଂ ସୁବର୍ଣ୍ଣ(ଭୋଭ) ମଧ୍ୟରେ ଯାଇ ରହ । ରାଜା ପରୀକ୍ଷିତ ଏହା କହିବା କ୍ଷଣି କଳିଯାଇ ଏହି ୫ଟି ସ୍ଥାନରେ ରହିଲା । ରାଜା ଭୁଲି ଯାଇଥିଲେ ଯେ ତାଙ୍କ ମସ୍ତକରେ ସୁବର୍ଣ୍ଣ ମୁକୁଟ ଥିଲା ।
ଦିନେ ରାଜା ପରୀକ୍ଷିତ ମୃଗୟାକୁ ଯିବା ସମୟରେ ଶମିକ ଋଷିଙ୍କ ଆଶ୍ରମରେ ପହଞ୍ଚିଲେ । ସେଠାରେ ସେ ତପସ୍ୟାରତ ଋଷିଙ୍କୁ ପାଣି ମାଗିଲେ । ମାତ୍ର ଧ୍ଯାନରେ ବସିଥିବାରୁ ସେ କିଛି ଜାଣିପାରିଲେ ନାହିଁ । କ୍ରୋଧର ବଶବର୍ତ୍ତୀ ହୋଇ ସେ ଋଷିଙ୍କ ଗଳାରେ ଏକ ମୃତ ସର୍ପ ଟାଙ୍ଗିଦେଇ ଆସିଲେ । ଏହାପରେ ଋଷିଙ୍କ ଅଭିଶାପ ଯୋଗୁ ରାଜା ପରୀକ୍ଷିତଙ୍କର ତକ୍ଷକ ଦଂଶନରେ ମୃତ୍ୟୁ ଘଟିଲା ।।
ସଂଗ୍ରାହକ – କବିକମଳ ନରେନ୍ଦ୍ର ପ୍ରସାଦ ବେହେରା
ସମ୍ପାଦକ – ମୋ ଅନୁଷ୍ଠାନ, ଆଳଦା, ଖଇରା, ବାଲେଶ୍ବର
